عاصفة هوجاء

Part 1

الزحام و شي لاصق فشي و المكابيت فينما لقاو شي قاع كايتمحككوو فيه و بلا مانهضرو على دوك لي هازين يديهم و شادين فديك الحديدة ديال الطوبيس و خارج من بيطانهم ريحة السردين ديال سيمانة ... العيالات الكبار واقفين و قلالين النفس العرض جالسين و كايتفرجو فيهم واقفين ولكن لي عندو شي قاع راه جالس بيه قليل فين لي كايشوف شي شارفة و كاينوض يعطيها بلاصتو باش تجلس .. الصهد و انا شخصيا تخنقت ... ماكاتعرف واش هدا طوبيس ولا صندوق ديال السردين بنادم بحالا ماعندوش الما فدارهم و على قلة الروايح ماكايخسر على راسو حتى درهم يشري بيها ساشية يغطي بيها خنزو

كان مقابل معاها واحد هاز يدو و شاد فديك الحديدة ديال الطوبيس خنقها حتى قلبات وجهها للجهة لاخرا .. معروفة بلي نهار تنين كايكون زحام فالطوبيسات و كايكون الصف طويل على الطاكسيات ... موالفة كاتسلك راسها فداك الصف ديال الطاكسيات ولكن هاد الساعة الحزقة و مزيرة و ديك 30 ريال لي غاتزيدها فالطاكسي زايدة فيها داكشي علاش صابرة على هاد الخنز ... واقفة مخنزرة و ماعاجبها حال فهاد الحال كاتتسنا غير ايمتا توصل و مزال ماتكافات حتى مع داك لي قدامها شوية بدات كاتحس بشي واحد كايتمحكك عليها من اللور .. دورات وجهها ليه و خنزرات فيه

- ا شريف واش ماناويش تحشم على راسك؟

- ماعندي ماندير لك كايدفعوني من اللور

هههه واش هاد المكبوت من نيتو؟ كايسحابليه شي وحدة اول مرة غاتركب فالطوبيس و ماكاتفرقش بين لي مزاحم معاها و بين لي كايتمحكك بيها؟ .. ماجاوباتوش و ماجمعاتش عليه الجوقة .. عضات على لسانها و بقات كاتتزاحم و تتقاتل باش تبدل بلاصتها حتى شدات بلاصتها موراه هبطات يديها لتحت و خشات صبعها لوسطاني فخرزتو حتى قفزاتو و دور كمارتو لعندها ناوي يكشكش على مول الفعلة حتى لقاها هي نيت لي ولات موراه

- ماعندي ماندير لك الزحام و كايدفعوني من اللور ماعجبكش الحال سير شد لك طاكسي

ماكانتش عندو الكمارة اصلا باش يجاوبها من فاش رجعات ليه الصرف حيت هو لي بدا اللول و كون بغات كون جمعات عليه امة محمد لي فالطوبيس مايخليوه يهبط حتى مايخليو فيه حتى عضم صحيح و هو عارف هادشي مزيان و عارف راسو اش داير داكشي علاش ماجاوبهاش و بدل بلاصتو و هو كايشوف فيها بشي شوفات ديال القتيلة عارفها دارتها ليه بلعاني و حتى هي بقات مخنزرة فيه حتى مشا وقف فقنت اخر دار.
وصل طوبيس للمحطة لي كاتهبط فيها .. هبطات و وقفات حدا واحد الطوموبيل كاتشوف فالزاج ديالها و كاتقاد حوايجها و شعرها جبدات البارفان من صاكها و رشات منها عاد كملات طريقها للافاك و هي بكااامل أناقتها ويي الحزقة و الأناقة .. بديك الطولة و المشية و الفصالة ديال العود الفرنسي لي يشوفها يحلف عليها موديل .. تمات داخلة حتى سمعات صوت مألوف كايعيط لها

_ حياة حياة تسناي ا صاحبتي

شافت موراها لقات 3 ديال البنات من الملامح ديالهم غايكونو يلاه فبداية العشرينات .. وحدة منهم كانت كاتجري و كاتعيط ليها و 2 بنات لاخرين جايين بشوية عليهم