عاصفة هوجاء

100

[ عـــــاصـــــفــــــة هــــــوجـــــاء ]
_______________𝐏 𝐀 𝐑 𝐓 496_______________

𝐁𝐘 : كـاپـيـطـوسـة الـمـغـربـيـة

حياة : [ جاوباتو بحدة ] و باقي كاتهدد فيا؟؟؟

داوود : [ ببرود ] ختاصرت لك

حياة : [ ضحكات بتهكم ] على هاد الحساب ماكاتعرفنيش مزيان حيت ماشي انا لي كنت غانكون فالروضة .. نتا لي كنتي غاتكون فيها [ رجعات ضحكات ضحكة استهزاء ] هادشي كون لقاو مايجمعو فيك ولا لقاوك مجموع ، كون فصصلتك وكل طرف نلوحو فقنت و ماتبردش ليا

قرب لودنيها وبقا ساكت لثواني عاد نطق
داوود : تيقي بيا [ بهمس بينو وبينها ] كون بقيتي فايقة فداك الوقت

حياة : [ قاطعاتو وشددات على هضرتها ] كون لقاوك مدبوح 

داوود : الهضرة بالفم دغيا كادوز

شكون هو فملك الله حتى يهضر معاها هاكا و يهدد فيها هاكا و يستفزها بهاد الطريقة؟؟ ... واش كايسحابليه صافي غير صحيح يقدر يدير لي بغا؟؟ كاع هادي تقة فالنفس؟؟ .. ماكانتش حاسة براسها و بيديها لي غارزة فيهم ضفارها

حياة : [ تبسمات بتهكم ] يمكن تغالطت لك مع ختك [ شافتو بدا كايتزير وزادت كملات هضرتها ] يممكن كايسحابلك انا هي وفاء لي وليد..

حسات بسنانها تسدو على لسانها قبل حتى ماترجعو لحلقها .. تكا لها ضهرها على الكونطوار لي كان من موراها حتى ولا الجزء العلوي من جسدها ناعس على السطح الرخامي .. تكا على المرفق ديالو حداها واليد التاني كان جامع ليها فمها بيها .. حسات بلسانها غايتقطع بلا مقص بلا زيزوار

داوود : ندير فيك خير نهنيك منو ولا تزميه!

الحريق لي كانت كاتحس بيه لا كلام عليه ولكن حالو وهو فديك الحالة كانت حاجة لي عاجباها كيفما كايعجبها تحك على الضبرة ديال بنادم .. كانت باينة الضحكة على وجهها وحتى هو لمح ديك الضحكة ، يمكن هي ماحاساش بديك العافية لي كاتشعل فيه وقتاش ما جا لبالو داكشي لي طرا لوفاء .. يمكن ماحاساش بدوك التخبطات لي كايكونو فيه على مدار اليوم و الساعة ويمكن ماحاساش و ماعارفاش بلي راه غير شاد راسو عليها .. ولكن كان فخضم معركة غير بينو و بين راسو ، معركة لي ماغاتسالي حتى للنهار يقتانعو ب2 بلي وفاء كانت ضحيتهم ب2

ماكانتش محتاجة ترجع دقتها حيت ديك الضحكة بوحدها كانت كافية باش تستفزو وتلعب ليه على شيطانو ، طلق منها

داوود : [ تتكا على الكونطوار وشبك يديه من مور رقبتو جامعهم عندو عليها و نطق ] غبري من قدامي

رجعات اللور عاطية الراحة للسانها لي تضبر بسنانها او بالمعنى الادق كانو سنانها غايخليو فيه جرح غائر على دورتو .. باش تبقا ساكتة كان شبه مستحيل