عاصفة هوجاء

98

[ عـــــاصـــــفــــــة هــــــوجـــــاء ]
_______________𝐏 𝐀 𝐑 𝐓 486_______________

𝐁𝐘 : كـاپـيـطـوسـة الـمـغـربـيـة

قطعات معاه وخشات التيليفون فصاكها .. دوزات يديها على شعرها ، وهزات التيليفون كاتشوف التاريخ ديال النهار .. البلان لي كان فبالها على ود أصيل و لي اصلا بدات فيه .. كان شوية قاصح و العواقب ديالو وخييمة بزاف وكون ماكانتش عارفاه غايغرق ليها الشقف ماكانتش غاتزيد حتى الضغط ديال داوود عليها فهاد المرحلة ولكن دابا بدات ولي عطا الله عطاه ، خاصها غير تكمل و تحاول ماتغلطش 

خدات نفس عمييق و عاودات خرجاتو .. عاودات العملية مرارا و تكرارا حتى حسات براسها رتاحت عاد هزات التيليفون صونات على داك السيد لي متافقة معاه على داكشي لي باغا ديرو

_ لقيتيني غانصوني عليك ا مدام

حياة : ياك لاباس؟

_ كنت ناوي نبدل بلاصة داك التابوت ولكن ا مدام البلاصة لي كنت غانديه ليها مابقاتش لايقة لينا

حياة : ايوا؟ كاتسناني نقول لك تجي تحطو عندي فالدار؟؟ على اخرة يامي نمشي للحباسات على ضهر جيفة ماعارفاها حتى ديالمن؟

_ عيطت لك باش نعلمك بلي كاين ا مدام باش ماتقوليش كاندير لي فراسي بلا مانشاورك

حياة : كانخلصك باش دير خدمتك .. غاتخليها عندك حتى للنهار نحتاجها ، كي غادير و أش غادي دير ضبر راسك .. شغلك هداك لي كانعرف فاش نبغيها نلقاها عندك

_ كنت كانفكر نخبيه فواحد البراكة ديال واحد السيد كانعرفو ولكن ݣلت حتى نشوف واش تبغي

حياة : شوف الله يرحم الواليدين .. هادشي كان خاص يبقاو عارفينو 4 ديال الناس و مؤخرا لقيت وحداخر حتى هو عارف بهاد الموضوع

_ كيفاش عرف؟؟

حياة : نسولك نتا نيت كيفاش حتى عرف .. السيد عندو فيديوهات ديالي انا وياك و المقفقف و الشيبة العاصية لي جايب ليا

_ [ بقلق واضح فصوتو ] و شنو فهاد الفيديوهات؟؟ واش مصور كلشي؟؟

حياة : [ تبسمات ابتسامة ديال الفقصة ] و كون ماكانش مصور فيهم كلشي كنتي غاتلقاني كانقول لك دابا داكشي لي كاين؟؟ ... مصور فيهم البلان من اللول حتى للأخر ديالو

_ و دابا شنو غانديرو؟؟ ماتافقناش على هادشي فاللول

حياة : [ ضغطات على محاجر عينيها كاتبرد راسها ] خلي عليا هادشي انا قادة بيه نتا شوف غير فين تغبر داك التابوت ... حفر شي قبر وخشيه فيه و بقا راد البال حتى للنهار نحتاجو

_ شوفي ا مدام نتي عارفة ايلا لقاو عليا شي حاجة البوليس غايرجعوني لبلادي .. ماباغي مشاكل مع القانون