عاصفة هوجاء

99

[ عـــــاصـــــفــــــة هــــــوجـــــاء ]
_______________𝐏 𝐀 𝐑 𝐓 491_______________

𝐁𝐘 : كـاپـيـطـوسـة الـمـغـربـيـة

مازادش طول معاها الهضرة .. هز الكاسكيط ديالو وطلع للفوق مخليها تشوف شي بيت تنعس فيه وهاد التصرف هي ماكانتش متوقعاه منو حيت كان كايسحابلها غايلصق فيها ولا فالبيت لي غاتبغي تنعس فيه ولكن وقع العكس

كانت هادي خطوة زوينة على الاقل غاتبقا عندها الخصوصية ديالها فشي بيت ... ختارت البيت التحتاني حيت قريب للباب ديال الزنقة ، مشات طرفات ودخلات باش تنعس أو بالاحرى حاولات تنعس حيت .. كانت شوية فشكل ترجع تنعس هي وياه فدار وحدة واخا البيوت مفروقين ولكن جامعهم سقف واحد

سدات عينيها باغا تستغل هاد سويعات لي باقيين ليها باش تفيق الصباح بكري على ود حوايجها ، سمعاتو هبط فالدروج و موراها سمعات صوت الباب ديال الزنقة تحل وعاود تسد ... طلات عليه من الشرجم لقاتو خرج

رجعات لبلاصتها وتكات باش تنعس .. و من تما مافاقت حتى ضرباتها الفيقة مع 7h00 .. ناضت على التخرشيش و الحركة فالدار كان عند بالها هو لي كاين فالدار ولكن لقات الخدامة كانت مرا فالثلاثينات و من ملامحها باين فيها ماشي من إيطاليا يمكن من الفليبين

الخدامة : [ بإبتسامة لطيفة ] صباح الخير ا لالة واش نحط لك الفطور دابا؟

طولات حياة الشوفة فيها عاد جاوبات
حياة : حطيه

تحركات من تما وقلبات عليه بعينيها ولكن مالقاتوش .. دابا كيفاش هي غاتمشي لخدمتها؟ لا تيليفون لا حوايج ، بان ليها الفيكس ديال الدار وبغات تصوني عليه بيه ولكن ماكانتش حافضة نمرتو ، مشات لعند الخدامة

حياة : عندك نمرة داوود؟

الخدامة : وي ا لالة هانا نجبدها لك

جبدات تيليفونها كاتقلب على نمرتو حتى خرجات فيها عاد عطات التيليفون ديالها لحياة لي غير شداتو من عندها مشات لجهة الفيكس كادوز نمرتو .. بقا كايصوني شوية عاد جاوبها

حياة : واش ماجبتيش ليا حوايجي من الدار هاد الصباح؟

داوود : [ عرفها غاتكون ماقلباتش مزيان ] قلبتي عليهم فالبيت الفوق؟

حياة : وشكون قال لك انا باغا نتشارك معاك فالبيت؟

داوود : البيت لي نعستي فيه البارح ديال الخدامة لي لقيتيها هاد الصباح

حياة : إيوا و هاد خيتي واش كاتبقا هنا 24 على 24 ساعة؟

داوود : باقي غاتجي واحد المرا ، الوقت لي ماغانكونش فيه فالدار غايونسوك

حياة : وشكون قالك انا باغيا لي يونسني؟ مابغيتهمش وزايدون راك عارف انا ماكانجلسش فالدار بزاف و حنا ماتفاهمناش عليهم وعلى شحال من حاجة