ချစ်ရပါသောနွယ်

Part 15(Unicode)

လင်းထိုက်သည် ကွန်ဒိုကားပါကင်သို့ ချိုးဝင်လိုက်စဉ် လုံခြုံရေးနှင့်စကားပြောနေသော လင်းထိုက်သူငယ်ချင်း ကျော်ဇင်နှင့် အောင်သူကို လှမ်းမြင်လိုက်သည်။

' ဟာ.. ဒီကောင်တွေ.. အကြောင်းမကြား ဘာမကြား...'

ဟု စိတ်ထဲမှာတွေးရင်း ဘီယာပုလင်းတွေပါ မြင်သဖြင့် ' တစ်ညလုံးပြန်ကြတော့မှာမဟုတ်ဘူး..' ဟု ရေရွတ်ရင်း သက်ပြင်းချမိသည်။

ပြဿနာက နွယ်နှင့်အိမ်ချင်းကပ်ရပ်မို့.. ဟိုကောင်တွေမူးပြီး သောင်းကျန်းလျှင် နွယ် အိပ်မရဖြစ်လိမ့်မည်။ လင်းထိုက်က နွယ့်ဘက်ကိုလှည့်ကာ

' နွယ်.. အရင်တက်နှင့်..။ ကျွန်တော်.. ကားထဲမှာ ပစ္စည်းရှာရအုံးမှာမို့လို့..'

နွယ်က ခေါင်းညိမ့်လိုက်ပြီး ကားပေါ်ကဆင်းကာ ဓာတ်လှေကားပေါ် တက်သွားသည်။ ထိုအခါမှ လင်းထိုက်က အောင်သူနှင့်ကျော်ဇင့်ဆီ လျှောက်သွားကာ

' ဟေ့ကောင်တွေ.. ဘာလာလုပ်တာလဲ..'

' အိမ်တက်ပွဲလာလုပ်ပေးတာ...'

ဟုဆိုကာ ဘီယာပုလင်းနှင့် ခေါက်ဆွဲကြော်ထုပ်တွေ မြှောက်ပြသည်။

' မင်းတို့ကလည်း.. အကြောင်းမကြားဘာမကြား..'

' ဟေ့ကောင်.. မင်းဘဲ အရင်တုန်းက လာချင်တဲ့အချိန်လာဆို.. အခုမှ နှင်ထုတ်နေတာလား..။ ဒီလုံခြုံရေးကြီးက ငါတို့ကိုမယုံလို့ မင်းရှင်းပြလိုက်အုံး..'

လင်းထိုက်လည်း အားနာနာနှင့် ကားဆီခေါ်ထုတ်လာကာ

' ဆိုင်သွားသောက်မယ်.. တက်..'

' အပြန်က ကား ဘယ်သူမောင်းမှာလဲ..'

' မင်းနော်.. မရိုးသားဘူး..။ မင်းအိမ်မှာ ဘယ်ကောင်မလေး ဖွက်ထားလို့လဲ...'

လင်းထိုက်လည်း ခေါင်းကုတ်ကာ သက်ပြင်းတစ်ချက်ချရင်း

' ဘယ်ကသာ.. မဟုတ်ပါဘူး..'

' အဲ့တာဆို ငါတို့တက်ပြီ‌နော်..'

ဟု ပြောပြောဆိုဆိုနှင့် ဓာ‌တ်လှေကားဆီ လျှောက်သွားကြသည်။ လင်းထိုက်လည်း ဘယ်လိုမှတားမရသည့်အဆုံး လက်လျှော့ကာ လိုက်လာခဲ့ရသည်။