နွယ်သည် ဒေါသတွေငယ်ထိပ်ရောက်ကာ ကိုယ့်ထမင်းကိုယ်စားပြီး သူများကိစ္စဝင်စွက်ဖက်သော ဂျစ်ကန်ကန်ကောင်လေးကို လက်သီးဖြင့် ခပ်ပြင်းပြင်းထိုးချလိုက်သည်။ ကျောင်းသားများကလည်း နွယ့်ဘေးနားကနေ အဝေးသို့ရှဲသွားကာ.. ခပ်ဝေးဝေးကပင် ဝိုင်းအုံပြီးကြည့်နေကြသည်။ ထို့နောက် ဆရာမဝင်လာကာ..
' ဟယ်.. ဘာဖြစ်ကြတာတုန်း...'
အထိုးခံရသောကောင်လေးက မြေပြင်ပေါ်က လူးလဲထကာ သွေးစနည်းနည်းစွန်းသော နှုတ်ခမ်းကို လက်ဖြင့်ထိရင်း..
' ဆရာမ.. သားကို အဲ့ဟာမ ထိုးတာ..'
နွယ်ကတော့ ခေါင်းကိုမော့၊ ရင်ကိုကော့ကာ ခပ်ပေပေပင် အဝေးတစ်နေရာကို စိုက်ကြည့်နေလိုက်သည်။ ဆရာမက နွယ့်ရှေ့လာကာ..
' သမီး... သူ့ကို ဘာလို့ထိုးလိုက်တာလဲ..'
နွယ်က အံကိုတင်းတင်းကြိတ်ကာ ဘာမှပြန်မပြော..။ ထိုစကားကို နွယ့်ပါးစပ်ကထွက်ဖို့ရာ အားမရှိ။ နွယ် ငိုမိလိမ့်မည်..။ အမေကပြောဖူးတယ်.. ငိုတဲ့သူက အရှုံးတဲ့။ နွယ် အရှုံးမခံပေ...။
မကြာခင် ကျောင်းရုံးခန်းထဲသို့ နွယ်ထိုးလိုက်သော ကောင်လေး၏မိဘများ ရောက်လာကာ သူတို့သားလေးကို ကြည့်ရင်း..
' ကျွတ်ကျွတ်.. သားရယ် ဘယ်လိုဖြစ်ရတာလဲ..'
ဟု ဆိုရင်း ဆေးထည့်ပေးနေကြသည်။ ထိုသူတို့မှာ ပြည့်ပြည့်စုံစုံမရှိကြသော်လည်း.. မေတ္တာတရားအားဖြင့် နွေးနွေးထွေးထွေးရှိကြပေသည်။
နွယ်က သစ်သားခုံယိုင်နဲ့နဲ့လေးမှာ ထိုင်ရင်း ထိုမြင်ကွင်းကိုငေးနေမိသည်။ အဖေက ခေါင်းလေးကိုပွတ်ကာ.. အမေက မျက်နှာလေးကိုသပ်ရင်း.. ဂျစ်ကန်ကန်လေးကတော့ ရှုံ့မဲ့ကာ ချွဲပြနေသည်။ ထို့နောက် ထိုကောင်လေးက ဘာပြောလိုက်မှန်းမသိ.. သူ၏မိဘများက နွယ့်ဘက်လှည့်ကာ..
' မင်းလား... ငါ့သားကိုထိုးလိုက်တာ..'
နွယ်က ထုံပေပေဖြင့် ဘာမှပြန်မပြောဘဲ အပေါက်ဝကို လှမ်းကြည့်နေလိုက်သည်။
' အထီးကျန်လိုက်တာ အမေရယ်..။ မြန်မြန်လာပါတော့...။ ငိုလို့ရှုံးရမယ်ဆိုရင်လဲ အမေ့ရင်ခွင်ထဲမှာဘဲ ရှုံးချင်ပါတယ်..'
YOU ARE READING
ချစ်ရပါသောနွယ်
Romanceတစ်ပါးသူတစ်ယောက်ကို အမှီပြုပြီးမှရှင်သန်ရတဲ့ဘဝမျိုးကို မင်းသိလား...၊ ခပ်မြင့်မြင့်ရောက်ချင်လွန်းလို့ တွေ့ကရာဖက်တွယ်ပြီး ရှင်သန်ရတဲ့နွယ်မျှင်တွေနဲ့တော့ တို့ကမတူဘူး ကိုယ်ဟာ တိမ်မျှင်တွေပေါ်က စိမ်းမြနွယ်...၊
