اليوم كعدت مثل كل يوم على انين ماما وكلعاده بابا مكابلها وكاعد واحسها يتألم وياها
باب الغرفه جان مفتوح اسمع ماما تكوله
..مروان عفيه اذا متت ازوج ادري بيك تحبني بس الحياة متوكف على احد ازوج بس لاتنسى زنوبه هاي قطعه مني
بابا بجه
وكللها.. سكتي فتون فدوه اروحلج مااتخيل حياتي بعدج
..حبيبي هذا الي الله كاتبه النا ولازم نرضى بي ماوصيك بزينب لاتلهيك الدنيا عنها
..زنوبه عزيزه روحي شلون التهي عنها
دمعت عيوني من اكتشفنا ماما بيها سرطان بلدم ومرحله جدا متأخره وهذا حالنه
تمشيت للمطبخ الضاهر بابا طالع لان لكيت علاكه صمون حار وجبن عرب اخذت نص من الصمونه وتوني احط جبن اندك الباب رحت افتحها شفت عمي سعد يابه شكد حنين وكلبه طيب وحيل يحب بابا ابتسملي وفتح ايده رحت حضنته وكتله
..صباح الخير عمو
..صباح العافيه بعد عمج ابوج كاعد
..اي عمو كاعد هسه اصيحله فوت عمو للهول
طب عمو وجان وراه عزام ابنه شكد غثيث ودائما يكلي تتنعوصين لان صوتي بي نعومه بعدهم ديدخلون واجه حسام وراهم هم ابن عمو سعد الصغير بس فد مرح وروحه حلوه حيل حباب طبعا اني جان بهاي الاحداث عمري ٦ سنوات وعزام ١٢ جان سادس ابتدائي وحسام جان عمره ١٠ رابع ابتدائي
اني علساس بابا يسجلني روضه بس التها بمرض ماما من يوم الي تمرضت بي ماما عمو ولده دائما يمنه وعمتي اشواق اخت بابا حيل احبها احسها حنينه وخالتي ام عزام الي هيه اخت ماما الجبيره كلش حبابه بس عمتي سناء مدري شبيها تكره الكل مو بس اني وماانسى نضرات الشماته بيوم الي عرفت بمرض ماما
طب عمو للهول وطبو ولده وياه داسد الباب صاح عزام
..ساعه تسدين الباب فضيها شكد فاهيه
باوعتله بطرف عيني ومشيت اصيح لبابا سمعت عمو يكله ..شبيك متكابل وياها
.. مامتكابل وياها بس دقني تتنعوص وفاهيه
..والله ياله علساس شلونه هو ابو عيون مخنزره رحت طبيت للغرفه لكت بابا متمدد وحاط ماما على صدره
ابتسمت الهم كال بابا
..تعاي يروحي شبيج
..بابا اجه عمو سعد ولده
..اي حبيبتي اجيت
كام بابا طلع رحت صعدت على الجربايه يم ماما لزمت ايدي وكالت
..زنوبه يانظر عيني انتي سمعيني وهذا الكلام خلي ترجيه بأذنج
باوعتلها بأهتمام
..حبيبتي من يصير عمرج ٩ سنوات اريدج تلتزمين بصلاتج ومن تتعلمين تقرين زين اقري قران هواي لانه يريح القلوب ويزيل الهموم وحافضي على نفسج وتلبسين حجاب حتى من ولد عمج وتسمعين كلام ابوج ولا تردين بوجه احد ونفس الوكت ماريدج تكونين ضعيفه دافعي على نفسج بأدب وابتعدي عن عمتج سناء وخليج دائما ويه عمتج اشواق وخالتج ام عزام
جرت نفس وكملت ...ياروحي يعز عليه فراكج وفراك ابوج بس هذا مكتوب علينه
بجيت وذبيت نفسي بحضنها
..ماما اني حيل احبج
..واني احبج يروحي لاتنسين الي وصيتج عليه والسنه الجايه ان شاء الله انتي مدرسه اهتمي بدراستج لانها سلاحج ..حبيبتي فهمتي كلامي
..اي ماما فهمت
..يلا يروحي روحي يم ابوج خلي انام شويه
بستها من خده حيل وطلعت رحت للهول لكيت بابا وعمو يسولفون رحت كعدت يم حسام كالي
..اشتريت اصباغ واشتريتلج وياي
..صدك شكرا
..من تجي امي تعاي نرسم اني وياج
..اي ميخالف انت متريك
..لا طلع ابويه وعزام واجيت وراهم
..كوم نتريك اني وياك
..يلا
كمنا اني وحسام ورحنه للمطبخ كعدنا على الميز ناكل
سمعت خالتي ام عزام اجت هيه مديره مال مدرسه متوسطه بس من تمرضت ماما لسه هيه داوم نص دوام المطبخ مفتوح على البيت سمعتها طبت سلمت وكالت البابا
..خويه فتون شلونها اليوم .
..على حالها خيتي
..الله يشافيها ادخل اشوفها
مرت ثواني وسمعت صرخه خالتي طاحت اللفه من ايدي رحنه نركض اني وحسام ...يتبع ..
