فزينا على طبكه الباب باوعنا طب عمو عمار عيونه بكصتا وصاح بلولد
...ابوكم وين
جاوبه عزام ...طالع شكو
مارد صعد فوك واحنه رجعنه ندرس اكتب ويصير اعوج وامسح واكتب هم يصير اعوج بعدين عزام اخذ دفتري وخطط الي خطوط بلطول وكال ..امشي عدل ولاتتجاوزين الخط
سويت مثل ماكال وقرينه وخلصنه وتونه انلم كتبنه اجه عمو سعد كال ..السلام عليكم
ردوو عليه الولد عزام باوعلي وكال بصوت ناصي
..من احد يكول السلام عليكم ردي عليه وكولي وعليكم السلام
باوعتله وهزيت راسي بمعنى اي
شويه وسمعنا صياح عمو سعد وعمو عمار يصيح بصوت عالي
عمار..شلون تخلي يسحب اسهمه كلهن
سعد ..شسويله لعد رجال شكده شكبره تريدني اجبره
عمار..بس هيج معناها ميرجع بعد
سعد ..لا يرجع علمود بنته على الاقل
عمار ..ميرجع هسه تشوف يستقر بدبي مدام سحب اسهمه وراح يفتح شركه هناك ميرجع بعد
بيبي وخاله فاتن وعمه اشواق اجن على صوت صياحهم بيبي من سمعت هيج ضربت على صدرها وكالت ...عزاا بعيني يعني مروان بعد ميرجع
سعد ..يمه كولي يالله شلون ميرجع بس هو نفسيته تعبانه ويريد يبعد حتى يرتاح
بيبي ..جا ماارتاح هنا واحتضن بنته الا يرتاح بعيد
فاتن ..خلص خلو على راحته قابل حيضل طول عمره بغربه لابد يرجع
عرفت الحجي على بابا دمعت عيوني وباوعت
لعزام كاعد يمي وكتله
...والله بابا جان حيل يحبني بس مدري ليش عافني وراح عبالي يرجع
حط ايده يمسد على شعري وكال
.. لسه يحبج انت بنته الوحيده
...بس هو عافني وراح حتى مخابرني ابد
ضل يباوعلي حسيته ميعرف شلون يواسيني مسح دموعي وكال
..صعب هسه تفهمين راح تكبرين وتفهمين ان شاء الله هسه يلا كومي لمي كتبج خلي نتعشى حتى نام عدنا صباحي
دفع شفتي الجوه داخل حلكي ورجعت طلعت
ضحك وكال.. مابطلتي هاي الحاله
..اي حتى ماما كالت بطليها بس متروح ش
سويلها
..لا خليها حلوه يلا كومي
كمنا صاحت عمتي اشواق
..تعاي زنوبه اشوف دروسج
..لا عمه بس كتابه عندي كتبت
..اي خلشوفها عدله عوجه
جاوبها عزام ..عدله عمه اني خططتله
