နေ့လည် ထမင်းစားသောက်ပြီးကတည်းက တိမ်တိုက်တို့ သားအဖနှစ်ယောက် ရေမိုးချိူးကာ သပ်သပ်ရပ်ရပ် ဝတ်စားထားကြနေပြီးဖြစ်သည်။ ပုဆိုးဝတ်ရတာသိပ်မကြိုက်ပေမယ့်လည်း ဒီနေ့တော့ တိမ်တိုက်တစ်ယောက် ပုဆိုး အပြာလေးနဲ့ ခန့်ညားနေတော့သည်။ ဆည်းဆာမောင်လေးကိုတော့ ကလေးမို့ တီရှပ်လေးနဲ့ ချည်ဘောင်းဘီ လေးကိုသာ ပေါ့ပေါ့ပါးပါး ဝတ်ပေးထားလိုက်သည်။
အနက်ရောင်ကြိုက်သည့် ခွန်း နှင့် အဝါရောင်ကြိုက်သည့် တိမ်တိုက် တို့၏ သား ဆည်းဆာမောင်ကတော့ မိုးပြာရောင်လွင်လွင်လေးကို ကြိုက်ပါသတဲ့။ ညိုဝင်းလှသော သူ့အသားအရည်နဲ့ သိပ်မလိုက်ပေဘူး ဆိုပေမယ့် သူတကယ်ကို ကြိုက်ပါသည်တဲ့လေ။
သုံးနှစ်သားကလေးလေးက တစ်ခါတလေ ကောင်းကင်ပေါ်ကို မော့ကြည့်ရင်း '' ဖော့ က ရှုပ်လိုက်တာ '' တဲ့ ။ အမှန်တော့ ကောင်းကင်မှာ အဖြူရောင်တိမ်တိုက်တွေက သူကြည့်ချင်သော အပြာရောင် ကောင်းကင်ကြီးကို လာလာကွယ်နေလို့တဲ့လေ။
အများစုက တိမ်ဖြူတိမ်ရိပ်တွေ ပြန့်ကျဲနေတဲ့ကောင်းကင်ကို သဘောတကျ ကြည့်တတ်ကြပေမယ့် ဆည်းဆာကတော့ တိမ်တွေကင်းစင်နေတဲ့ အပြာရောင် ကောင်းကင်ကိုသာ နှစ်သက်လေသည်။
အခုလည်း မိုးပြာရောင်တီရှပ်နဲ့ ဆည်းဆာက အညိုရောင်ပါးဖောင်းဖောင်းလေးတွေနဲ့ သိပ်လိုက်ဖက်နေပြန်တယ်။
'' ခွန်ဖော့ သားချောလား ''
မှန်ရှေ့ ပုဆိုးဝတ်နေရင်း ဘေးတွင်လာရပ်ကာမေးသော ဆည်းဆာမောင်။
တိမ်တိုက် ပုဆိုးဝတ်ပြီးတော့ ဆည်းဆာရှေ့ ဒူးထောက်ထိုင်ချလိုက်ကာ ပုခုံးနှစ်ဖက်ကို ဖွဖွလေး ဆုပ်ကိုင်လိုက်ပြီး ဆည်းဆာ ပါးဖောင်းဖောင်းလေး တစ်ဖက်ကို ရွှတ်ခနဲ တစ်ချက်နမ်းလိုက်သည်။
'' ချောတာပေါ့ ဒါပေမယ့်ကွာ မူရင်းကို ဘယ်မိတ္တူက မှီပါ့မလဲ ''
'' မူရင်း...မိတ္တူ ''
ဆည်းဆာမောင်တစ်ယောက် တိမ်တိုက်ပြောသည့် စကားအဓိပ္ပါယ်ကို မသိပေ။
'' နားမလည်ဘူး ''
ခေါင်းကုတ်ရင်း ပြောတော့ တိမ်တိုက်တစ်ယောက် ဟက်ဟက်ပက်ပက် ရီချတော့သည်။ ဒါကို ဘုကြည့်ကြည့်နေသူက ဆည်းဆာမောင်။
ESTÁS LEYENDO
NotWithStanding...(မည်သို့ပင်ဖြစ်စေ... ) (Completed)
De Todoဤဘဝအတွက် တာဝန်ဟာ မောင့်ထံပါး ချစ်ခြင်းတို့နှင့် ခစား၍သာ အဆုံးသတ်ပေလိမ့်မည်။ ............. Start - 19.2.2022 End - 25.8.2022
