⚜أحببت رجلا ⚜

part 50💖

🙈الجزء 257🙈

نعيمة: (شافت فشيماء زعما سمعي واش قابلة) شنو نݣولك الحاجة باش توصل لبنت لفااك راه تقاتلات نجحات فلباك عاشت 5 شهور فوجدة وجابت بسلامتها نقطة زويينة باش تحبس دابا ميبغيها لا ربي (شافت فلكاملة) لا عبدو
الكاملة: اوا حنا معدنا بنات يقراو
نعيمة: اوا نشوفو خطيبها شنو ݣولو
الكاملة: لا كلام من مور كلامي
الحاجة: (شافتها غتحمى) لا لا الكلام بلعقل ابنتي الكاملة
نعيمة: هه يهديك الله لبنت راه بنتي حنا للي نݣولو تقرا ولا لا ونهار تعقد ولدك للي يݣول وانا عاد بغيت نعطيك بنتي أمانة عندك ونتي نهار اللول بديتي تقمعي فيها وݣدامي واش هاد الهضرة فخبار رجال الحاجة؟؟؟
الحاجة: (قاست لكاملة فرجلها باش تسكت حيت الا عرفوها هضرت فهادشي للي صباح قالولها لقراية غتكملها غيشوهها لكبير قدامهم) صليو على نبي
الكل: عليه الصلاة والسلام
الحاجة: بنتي لبارح منين هضرتي مع أنوار علاش تفاهمتو
شيماء: (بحياء) نكمل قرايتي
الكاملة: (حنات راسها ورجعت الحاجة قاستها برجليها) اوا الا تفاهمتو معندي منݣول انا اختي نعيمة ݣلت تجلس مرتاحة تݣابل راجلها أما حتى شغل راه كلها ݣاد برااسو
نزهة: (هزت حاجبها شافت فلكاملة للي مقبلاتهاش تكمل لباك ونغزت جهان للي دارت اشارة براسها زعما فهمت)
نعيمة: لالة لكاملة انا عارفاكم نتوما مالين الدار لكبيرة بنتي مغيخصها خير معاكم ولدي وليد منين عرف غنتناسبو معاكم فرح ورتاح من جيهة ختو وݣال غتمشي من دار تخلي خوتها وغتلݣى عندكم خوها زهير
الكاملة: (تبسمت بالزز) كاينين حتى ولادي عبد الله وعبد الوافي وعيالاتهم تبارك الله عليهم دايريني الراي وشواار
نعيمة: الله يخليك ليهم والله يدومها محبة ولكن لقراية ديال بنتي هو شرطي ليكم مهامني لا فلوس لا واالو بغيت المعاملة لمزيانة وقرايتها وهي ها هي ݣدامكم نهار تقلل احترامكم غت...
الحاجة: لوااه لوااه واش ݣربنا لهادشي بنتي شيماء الزين ورزاانة غنديروها فعينيينا
نعيمة: الله يكبر بيك الحاجة اري ازيد كويس أتاي (تقلبات الهضرة كملو لفطور سمعو رجال ناضو حتى لعبالات ناضو مشات نعيمة طارت جابت لكل وحدة تفصيلة وشال ولكاملة عطاتها بيجامة وتفصيلة وحوايج لداخل وشال والحاجة عطاتخا تفصيلة جوهرة قفطان وجلابة فلبيض وشالهم فرحو بزاف وحتى لكاملة كبرت فعينها عمر شي وحدة فعريسات مكساتها فالخطوبة شكرووهم وتمو خارجين نعيمة شافت ففتيحة)
نعيمة: لش ظهر ليك افتيحة؟
فتيحة: زدتي فيه اصاحبتي شكون هدا للي يكون مجوج ويقبل على مرتو تمشي تزاحم مع رجال فلقراية
نعيمة: مكنهضرش على لقراية كنهضر على لكاملة
فتيحة: واا مݣالت غير كلام الحق
نعيمة: تفقسي حتى نتي
فتيحة: اوا بالعقل نهار تجوجتي نتي خلاك سي احمد تمشي تقراي
نعيمة: هانتي ݣلتيها نهار تجوجت لبنت ياله تخطبت لبارح وهي جالسة تشرط راه لعروس للي كتشرط (شافت فشيماء للي جات داخلة) ونتي لاش كنتي ساكتة
فتيحة: أحااي وبغيتي لبنت تقابح مع عكووزتها ههه سمعي سمعي لخبار الزين
نعيمة: الله يسمعنا خبار الخير ياكما أمال تخطبت
فتيحة: اشكون يديها فديك المسخوطة انا هاضرة على ولدي محمد غدا نمشيو نخطبولو بنت خالتو مريم
شيماء: (تصدمات وبقات غير كتشوف)
نعيمة: اوا مبروووووك بانلي هاد العام ولادنا كانلين غيمشيو كرجة وحدة ههههه
فتيحة: هههه وييه عݣبال لديك لمتعوسة
نعيمة: لاش متعوسة لاااش أمال راها زينة لبنات وسعدات للي يتجوجها شتي وكان ماشي نبيل للي مشا يخطبها كنت غنديها لوليد..
فتيحة: اوا لمكتاب
نعيمة: شيماء سيري ابنتي هبطي عند بنت عمك
شيماء: (طلع معاها سخون) نجمع بعدا
نعيمة: (خرجت عينها) غير سيري انا نجمع...
🙈الجزء 258🙈