السجيـن " بـ اللهجـة العراقيـة "

بـارت هديـة

#السجيـن

بـ قلم الڪاتبـة : فاطمـــة مُســـلم

وانتضرتك
بين صفنات الليالي
وجرح دخان الجگاير
وبين لچماتي وحسرتي
وحيرتي وكسرة الخاطر
وبين مدري
و وين صاير ؟
وانتضرتك
هلبت تمُر بية طيف
إيضمضم دموعي أعلى باچر ...

♡♡♡♡♡♡♡♡♡♡♡♡♡♡♡♡♡

• ريــا

بعد ما راحو بيت عمي العصـر صعدت الغرفتي وراسي يوجعني من التفكـير ما اعرف ليش رغم دائماً من يجون عليه خطابـة مباشرةً ارفض بس هسه احس متردده بـ قراري وما اعرف شسوي...

بـ الليل جنت كاعده العب بـ التلفون ما احس الا امي دخلت عليه للغرفـة

- كاعده

- اي ماما كاعده تعاي

- جيت احجي وياج

جتي كعدت يمي ؏ الجربايـة وباوعت عليه وكالت :- علمـود ابن عمج

- اهاا اي شبي ابن عمي

- شوفي يمه هي البنية اول وتالي تتزوج لو شكد ما تضل يم اهلها ومدللها لازم يجي يوم وتتزوج وتستقر ويصير عدها عائلـة ومسؤلية وتتحمل كلشي ويا زوجها وتعيش ؏ المره قبل الحلوة هاي سنة الحياة وڪل بنية يجي يوم وتتزوج

- بس ماما اني علي ما اعرف آي شي عنه يعني ما اعرف شلون عايش حياته ولا اعرف اطباعه ما ادري اذا هو زين لو موزين

- لعد الغريب شنو تعرفين عليه ؏ الاقل هذا ابن عمـچ

- ما اعرف ماما افكر

- ابوج يكول خلي تفكر زين مو مثل كل مره ترفض هل مره تختلف

- الصراحة ماما اني متردده بين اوافق او لا

- ليش متردده اكو سبب

- اي اكـو

- شنو هو امي احجيلي

- شوفي ماما هذا الكلام يبقى بيناتنه اني قبل فترة عرفت انو سدن بت عمه أمل تحب علي فـ انتي فكري بيها شلون اني اعرف بـ هذا الشي واروح اوافق هاي انانيه يعني هسه انتي تحبين شخص ويجي واحد ياخذه منج شلون تقبليها

- بس يمه لو الولد يحبها ويريدها جان راح وخطبها بدال ما يخطبج

- مو علي ميعرف بـ هذا الشي

- بس يمه هو الولد رايدج الج

- اي ادري بي... بس يمه تدرين هو علي يحبني

- شمدريج يمه

- هو جان يلمحلي وحتى مره شفت صورتي بـ غرفته

- عززا يمه صورة شنو

- صورتي

- اي ادري صورتج بس خاف بيها شي

- لا يمه صوره عادية حتى جنت لابسه عباية بيها