انتقام العيون

البارت ١٢

جمانه وهي تباوع بعيون زيد خافت تكول هو نفسه اخو نور !!    تذكرت الصبح والي صار بينهم فکرت زید لو عرف راح يبعدها عن نور صديقتها الوحيده وتذكرت نور من كالت اخوها بالكليه فقررت تكذب حت تبرر معرفتها بيه ..

جمانه والتوتر باين من صوتها : هاا .. هو ..هو شايفته ويانه بالكليه ..هو مسؤل مال شؤون طلبه يمكن!!

زيد شك انها تكذب عليه من توترها  وكال( بداخله حبل الجذب قصير ياجمانه واكيد راح اكتشفه اذا تكذبين عليه)فقال  : شؤون طلبه ؟ ها ..خوش...

تركها ومشى وهي بقت قلقانه لان اول مرة تكذب عليه وهي تباوع بعيونه دخلت للغرفه وطلعت ملابسها وراحت تسبح وتذكرت جنطتها الي بقت بالسياره بداخلها (اوف ياربي شلون راح اجيبها ).

الشيخ طلب من الحرس ينقلون السياره للتصليح فلما الحارس وصل للسياره شاف جنطت جمانه بالکشن واكعه اتصل على زيد وخبره الجنطه والملازم راح يجيبهم للبيت هنا زيد كله من توصل خابرني الي لان راد يتاكد بنفسه من تلفون جمانه ..

اما داخل بیت شیخ حسن فاول مارجعوا للبيت بقى الشيخ يلومهم على التسرع لان ما استشاروا ابوهم

احمد الصغير ماكان يعرف بدايت القصه لذا كل الملامه وكعت على شهاب الي كان عقله متشوش و شارد عند جمانه وصورتها من حضنت زيد وصورتها وهي خايفه وخاتله وراه كان شهاب متوتر ومايعرف شنو الربط بينهم حتى من  سئله الشيخ كان شهاب صافن وبغير عالم . !

شیخ حسن بعصبيه : وليش ماكلتلي  من البدايه انتو لاكينها بالبستان ؟؟؟ ( يقصد السبحه )

شیخ حسن وهو انتبه لابنه بغير عالم فالتفت على ابنه الثاني احمد يساله الي كان صافن هو الثاني : بويه كتال اخوك وعرفنا بس هسه هذا اخوك شبيه ؟

احمد بداخله صافن و متسائل منو هاي جمانه الي عرفها شهاب و شنو علاقتها بيه لدرجه خربطت احواله من شافها وشنو علاقتها ببيت شیخ جاسم ؟

الاب وهو محتار بحالت اولاده اثنينهم ساكتين وصافنين لحد ما صاح بيهم اثنينهم
شیخ حسن : هسه تحجون شكو لو لا ؟

احمد تدارك الوضع : هاا ... لاماكو شي بويه بس هاي ماكانت على بالنه سعيد الفلاح يطلع الكتال!!

شهاب : بویه بس محمد الله يرحمه ماله عداوه وياه . هذا سعيد اكيد جان کاصدني .

الشيخ حسن : رب العالمين كتب لك عمر   واخذ عمر  اخوك بدالك قدر الله وماشاء فعل ( ودمعت عيونه ) .مانعترض على حكم الله بس يا وليدي بعد لاتتسرع ووجب تشاورني بكل شي شفت اليوم كان هدرت دم بسبب تسرعك وكان ضيعت حكنا بفعلتك  ..

(شيخ حسن يعرف ولده الي تسرعوا من ضربوا زيد  ومعناها لازم يعتذرون من الشيخ جاسم وابنه )

شیخ حسن : بویه فوتوا سبحوا وتغدوا ولاتنسون الليله واجب نروح نعتذر عن الي صار بس عندي سوال واحد بقا الكم ؟