انتقام العيون

البارت ٣٠

وصل الشیخ حسن ونور الى بيت الشيخ جاسم ..

الشيخ حسن : السلام علیکم..

الشيخ جاسم واولاده : وعلیکم السلام..

الشيخ جاسم شاف نور وكال فوتي بويه دخلي يم البنات

مازن اتصل على السيد حتى يحضر

الشيخ حسن : خويه منو راح يعقد عليها ؟؟

الشيخ جاسم : زيد ..

الشيخ حسن : والنعم منه ...
التفت لزيد الي كان يهز برجله من العصبيه وكمل كلامه وقال : بويه البنيه عرفت غلطها وهي امانتك ومهما يكون هي ماسوت شي ومو ذنبها حرمتك اندعمت بس انه انطيتها فصل بس حتى انهي الخلاف الي بينا وما تشيل على اخوها لان الولد بريء وما يعرف شنو جرا بين البنيات...

زید بقا ساكت لان مايريد يدخل بنقاش مع شیخ حسن وكانت بنظره كافي كعدت الشيخ حسن بالديوان مذلول وكسر عينه واخذ منه بنته فصليه .

حضر السيد وقال : صيحو للبنيه حت نعقد عليها . ... وعقد السيد على زيد ونور ..
وكف  زید بعد ماانهى السيد وهو يتوجه بالكلام للشيخ حسن وقال بحده :  صح انه اخذت نور بس مستحيل انسه الي صار لجمانه بسببكم... بس  مو انه الي  انتقم من مرة راح اعاملها بما يرضي  الله ..

كان كلام زيد شال هم من قلب  الشيخ حسن وبعدها ودعهم وطلع من الديوان .. ..

اما نور فدخلت وجلست بالصاله قرب ام زيد وكانت خايفه وهي تقره الشر بعيون زيد ..

ام زيد : يمه نور انه مااريد اظلمج بس انتي تعرفين الفصليه شنو .. راح افرغ الج غرفه وبكيفه زيد اذا رادج او لا .

نور : تمام عمه والله انه اسفه جمانه صديقتي قبل لا تكون قرايبي وحتى قبل لا تنخطب وبسبب هالخلافات الي صارت تخاربنا..

زهورة دخلت وهي تنظر لنور بطرف عينها وتهز ايدها وقالت بحده : كومي كومي تعاي ادليج غرفتج ...

نور وكفت وشالت جنطها بيدها ودخلتهن بالغرفه شافت غرفه عاديه جربايه ام نفر وكنتور صغير عادي التفتت لزهورة وهي مستغربه وقالت : هي هاي غرفت زيد ؟

زهورة : ليش حبوبه عبالج زید راح يكلبج هاي غرفه زایده واصلا زيد مايريد يشوفج لذا لاتحلمين بغرفه زيد تمام ...

طلعت زهورة وسدت الباب نور كعدت على الجربايه وظلت تبجي حتى فرصه انه تكون زوجه خسرتها مثل ماخسرت امها وابوها بسبب جمانه ...

انتصار بعد مده دكت الباب ودخلت الها

انتصار : السلام علیکم

نور وهي تمسح دموعها : وعلیکم السلام..

انتصار تقربت وكعدت على السرير وهي تقول : شوفي خيه احنه هاي اول مره تفوت فصليه لبيتنه وخالتي تكول اعتبرنها خيتجن اي شي تحتاجينه بلغيني تمام ..اني مرت مازن اسمي انتصار