انتقام العيون

البارت ٢٩

زيد ماصدك الي صار وصل للمستشفى وهو طول الطريق بس يبجي وبداخله يشعر بالذنب لان ما رفع الخط من اتصلت  ...
اما طالب فكان مامصدك الخبر ان اخته اندعمت ورجع بطريقه للمستشفى

كانت نور تتصل بابوها تبلغه اما شهاب يروح ويرجع ويجيب اي شي يحتاجونه..

زيد بعد ما وصل قال  : زهورة شنو صار ؟؟

زهورة ركضت وحضنت زيد وهي تكول : كله بسببي انه الغلطانه..انه الي اذيتها..

نور وهي تبجي : لا ... انه الغلطانه انه اجيت وحجيت كلام عليك وعليها ...

زيد وهو يباوع لشهاب بعصبيه : وشعنده هذا هنا؟؟

زهورة وهي تكض ايد زيد : لازيد  لاتظلمه لوما شهاب جابنه كان لحد هسه هي بنص الشارع محد قبل يجيبها .

زيد وهو قابض ايده ومايريد يتعارك بالمستشفى..لكن حتى هالموقف ماشفع لشهاب عنده ..

زهورة :  كله مني زيد...لان  جمانه بس عرفت انت سمعت كلامنا تخبلت ماعرفت شنو تسوي خافت تخسرك انه السبب ..

زيد : سدي الموضوع هسه خليها تكوم بالسلامه . الشيخ جاسم ومازن وام زيد وصلوا للمستشفى..

ام زيد وهي تبجي : وينها يمه كلت لامها امانه عندي امانه اسبوع واندعمت شکول لامها هسه شكول ؟؟

طالب دخل وهو  وصيح : زيد وينها جمانه وينها ؟؟

زيد حاول يهدئه لكن طالب كان يصيح  : كلولي اختي شلون اندعمت تركتها مثل الورده  قبل ساعه  مابيها شي شلون هسه اندعمت ...انت مو وصلتها ؟؟

الدكتور : وين قرايب المريضه جمانه حسان ؟؟

الشيخ جاسم : هاا دكتور انه عمها ...
زيد : نعم دكتور

الدكتور : حجي انت ايمانك بالله جبير وتعرف من احد يصيرله حادث كلشي نتوقع البنيه اجت الضربه براسها وبظهرها يعني كل الاحتمالات جائزه ...
طالب بعصبيه : دكتور اختي شبيها
الدكتور وهو يلتفت لطالب كمل كلامه : البنيه طلعت من العمليه بس مانعرف شنو وضعها منا لباجر وكل الاحتمالات توقعوها ...مااريد اتايسون بس ادعولها ينكتب الها عمر جديد

الشيخ جاسم : دكتور البنيه امانت اخوي عندي ورايدها من الله ثم  منك !!
الدكتور : وانه راح اتابع حالته بالذات وشخصيا بس ارجع واكلك نسبت تعيش مع الاسف قليله جدا لان الضربه بالراس وعدها ضربه  بالحبل الشوكي..

طالب قاطعه  : دكتور انت بس خليها تعيش واني اسفرها للخارج ..

زيد  كان يتذكر ضحكاتها وكلامها كان يتخيل لو فقد جمانه شلون راح يعيش ...رغم محاولته انه يكون قوي لكن دموعه كانت تنزل بدون مايشعر بيهن ...

شهاب : شيخ انه اترخص راح نرجع.. الف سلامه عليها
زيد ماتحمل وكانما لهنا حده بالصبر  وهو يتذكر كلام نور عنه هجم على شهاب وضل يضرب بيه وهو يصيح : انتوا السبب انتوا .. بسببكم اندعمت ..