انتقام العيون

البارت ٣١

بعد اسبوع ...

انتصار : زهورة عمو يكول اكو مدرسه قريبه طالبين معلمه ومديرها قرايبنا  وطالب تشتغلين محاضره ...
زهورة بفرح :  صدك ؟ اخيرا ...زين يمته اروح اداوم ؟

انتصار : عمو كال من تكعد زهورة الصبح خلي تبدل وراح يجي ابو رضوان يوديج للمدرسه مو كلش بعيده سامعه بيها مدرسه ال...

زهورة : اي ...اي بدايه المنطقه يله لعد بس نخلص الريوك و ابدل

انتصار بتعب : كون تكعد ست نور  تساعدني  انه هاي الاسبوع كله ماجاي اصير زينه كلش تعبت وهاي ماصدكت تكول حامل  ...ماتساعدني بشي

زهورة : ليش ماتصدكوني اول خلي نسويلها تحليل خاف متوهمه

انتصار : والله مااعرف

نور وهي تدخل المطبخ سمعتهم وضلت تفكر شلون تخلص من قصه الحمل ...دخلت وهي مرتبكه
نور : صباح الخير

انتصار : صباح النور
زهورة : هلا 😒

نور : اكول انتصار زيد طلع ؟
انتصار : اي طلع ليش ؟
نور: هاا ..مو ردت اكله اريد اروح لاهلي ازورهم ...

انتصار بتعجب : اول تالي تروحين لاهلج صار الج شكد من اسالج تكولين مااروح ...
زهورة : شنو تروحين انتي سامعه فصليه تروح لاهلها ؟
زهورة تعمدت تذكرها هي شنو ...

نور بحده : صح انه فصليه بس هاي قبل هسه صرت مرت اخوج

زهورة : تبقين فصليه وشنو تسوين ما ننسى سوايتج بجمانه ...

الشيخ جاسم وهو يدخل المطبخ قال بصوت عالي : شنو هاي من الصبح ...شهاللغوه هاا

نور التفتت للشيخ وبتصنع قالت : عمو تقبل زهورة تكلي تضلين فصليه
زهورة : شنو ترقيتي لو  ...

الشيخ جاسم قاطعهن بصياح : زهورة ...بعد منا وجاي نور تسمينها مرت اخوي وغير هالكلام مااسمع فهمتي ...ويله صعدي بدلي حتى تروحين  للمدرسه ...ومااريد اسمع بينجن مرة  ثانيه لغوه ...

نور بابتسامة مكر كانت عيونها بعيون زهورة ...وهي تحس بالانتصار عليها ..
زهورة صعدت ودمعه تلالت بعيونها وهي تتذكر جمانه وبداخلها تقول : معقوله نور تصير مرت اخوي بدالها ....معقوله هيج نسيت  جمانه يا بابا ...نسيت بنت اخوك والي سوته نور بيها ....

اما شيخ جاسم فكان كل همه ان يحافظ على بقايا بيته ما كان يريد يفقد احد .. بعد ما بيت اخوه حسان قطعوا اخبارهم عنهم ...

.........
في تركيا .....

جمانه : ماما ....ماما ... ساعديني امشي اغسل !!!
زينب كانت خارج الغرفه ..
زينب : اي ماما دقيقه هياتني جايه ...
جمانه حاولت تتلمس الحايط حتى توصل للمغسله لكن ايدها زلكت ووكعت بالارض  ومن رفعت راسها كانت الرؤيا ترجع شوي شوي الها ...