انتقام العيون

البارت ٧

العصر ..كعدت جمانه تدرس وخابرت امها تطمن عليها وعرفت منها ان طالب رجع من تركيا اسبوع اجازه وتخلص عطلته کلش ضاجت ماراح تشوف اخوها بس اهم شي يكون بخير ومازال هو اخر سنه كلشي يهون كلمته وسلمت عليه وبقا يوصيها على نفسها عبالك طالعه تدرس بلندن مو عند بيت عمهم شیخ جاسم ...

.واثناء ماهي تدرس سمعت صياح برا ورمي هالشي جديد عليها صح هي سامعه رمي بس مو هنا بالبصرة وخصوصا كان قريب على بيت الشيخ ...

وعلى صوت الرمي طلع الشيخ وولده والتمت الحرس والفلاحين ووجهاء المنطقه .والتمت الناس حول شهاب والفلاح الي كمش اسلاحه من الحارس ورمه بالسما تهديدا لشهاب والناس تصیح علیه اجه شیخ جاسم وهو اول مره يشوف شهاب ابن حسن...

شیخ جاسم : شنو بويه شبيكم خيررك سعيد ( الفلاح ) نزل سلاحك .والتفت لشهاب منو انت بويه وشعندك بكاعنه وليش متعاركين ؟

شهاب وهو عرف الشيخ جاسم من الوصف ومن الشبه كال : انه شهاب ابن حسن ابن شيخ ياسين ما اعتقد داخل لكاع احد غريب هاي كاع لعمومتنا والفلاح هو الي بدا بالصياح على الحارس  ومن اجيت افكهم غلط بحقي . ( شهاب وهو يعرف الحك وياه ) ...

شیخ جاسم داخله فرح وحس هذا الشاب من دمه رغم كل الطلايب وبعد كل هالسنين ماناسي اصله وفصله : هلا بيك ( والتفت لسعيد ) سعيد على شنو ترمي ومنو هيج سوا بيك ؟

سعيد بعصبيه : عمي الشيخ تقبل يفكون الماي على زرعاتنا ويغركونه وهي ثاني مرة ومن حاجيت الحرس يجيني هذا اللوليد ( تصغير كلمت ولد ) ويكلي كفينه شرك ..
هنا شهاب قاطعه بصياح : اسمي شهاب وانت تعرفني زين وتعرف منو انه فلا تنكر اشكلت ...

شیخ جاسم اشر لشهاب يهدا وهو انتبه لسيارات وصلن واكيد هذول حسن واولاده واخوانه فراد ينهي النزاع قبل لايفوت ويدخل ...

شیخ جاسم : بويه سعید غلط وانه اعتذر نيابه عنه...

سعيد وهو يدري بنفسه غلطان وصعبت عليه الشيخ يعتذر نيابه عنه فقاطعه وقال : لا شيخ السموحه منكم ماكنت اعرفه ؟!!

هنا شهاب عرفه يكذب حت يداري غلطه ماراد يكبرها حت لاينکال بیت شیخ حسن رجعو بالطلايب فسكت وهو يشوف ابوه واخوانه وصلوا ...

وصل شيخ حسن وبصوت عالي : السلام علیکم..

شیخ جاسم والبقيه : وعليكم السلام بقت ناس بین تصافح وبين تحضن بالشيخ لان من مده ماجاي للمنطقه ...وتعالت اصوات السلام والترحيب
سعيد الفلاح انسحب لان شاف مااله مكان بين الشيوخ واولادهم وهم كلهم نفس العشيره وعرف هذا ابن شيخ اذا راد يحجي فالكل يوكف وياه ومحد يدافع لفلاح بين الشيوخ...

شهاب واخوانه محمد واحمد واكفين واولاد شیخ جاسم واكفين شي تباوع لشي كانما نفس الافكار داخلهم ونفس السؤال شنو من طلايب ومشاكل تنتظرنه شیخ جاسم وبفخر تفضلوا على الديوان الكل توجه للديوان وبعد ما الكل يسال ویسلم شیخ حسن وبصوت الحاد : كل الهلا بعمامنه واخوتنه وهو ينظر للكل ويتحاشا يلتفت لعيون شیخ حسن وكمل كلامه : ان شاء الله الكل بخير والكل : كل الهلا بالشيخ..