يا صُدفتي النادرة وياهلاك البشر

Part 9

بـ قرية " آل ثايب "

بعد صراعات اخرى من العائلتين المعروفه ، انتهت معركتهم بدون اي مصابين ولله الحمد وهذا شي غريب عليهم بما ان وجودهم بالقرية يزعزع آمانها ..
ابو فالح بأسى : قلة مروه وقلة مرجله يخوفون الآوادم بأسلحتهم لا بارك الله فيهم
الجازي ابتسمت : بالطقاق دام الشرطة عندهم ومتكفلين بأمرهم لا تشيل هم
ابو فالح بنرفزه : هذي حالة يعني الواحد ما يأمن نفسه بداره اذا كل يوم والثاني بيطلقون هالرصاص ويسببون شوشرة
الجازي بحنية : اجل خلنا نروح لبيتنا بالريف انت وجدتي ونرتاح هناك الجو هادي بالقرية اللهم ان الجو بارد عكس هنا
ابو فالح بإصرار : لا و الف لا الأرض الي تربيت فيها ما اتركها عشان كم شخص رفع سلاحه
اعتدلت بجلستها من سمعت صوت عمها الي أمرها تتغطى عشان هزاع بيدخل ..
ابو هزاع ابتسم : ياهلا والله بـ بنت اخوي
الجازي ابتسمت بخجل : يا هلا فيك
ابو هزاع بستغراب : دخلت والبيت هادي وين الذيب ماله حس؟
الجازي: مانام الا متأخر خايف من المشكلة الي صارت وطول الليل يهوجس بهم
ابو هزاع بأسى : لا بارك الله فيهم كانهم حاسونا معهم
هزاع متعمد يفتح السيرة بما ان مر اسبوع على سماع هالطاري ولا شافه : الا وش صار على ابو ذيب متى ناوي يجي ياخذه؟
ناظرته لوهله وتكلمت بحدة : وانت وش عرفك؟
هزاع ابتسم : وليه ناويه تخبين الموضوع علينا؟
ابو هزاع بستغراب : صدق يابنتي ابو ذيب بياخذه؟
الجازي بنرفزه : لا ماراح ياخذه
هزاع بستفزاز : لا تكونين ناويه تحرمينه من ابوه عاد! ترا مايجوز
الجازي وقفت بسرعة متناسيه عمها وجدها وتكلمت بغضب : مو انت الي تعلمني الي يجوز ومايجوز و مواضيعي الخاصة مالك حق تنبش وراها ولا تتدخل فيها مرة ثانية عشان ما اتعامل معك تعامل ثاني
ابو فالح بذهول : افا يالجازي ما احترمتي لا جدتس ولا عمتس!
هزاع ابتسم بنرفزه : لا خلها تطلع على حقيقتها لو انها تعرف الأصول ما هدمت بيتها ويتمت ولدها وابعدته عن ابوه وهو حي
ابو هزاع التفت عليه بعصبيه : يـا ولــد!!!
هزاع تسند وناظرها بستفزاز : وانا قلت شي غلط؟
ماعاد عرفت ترد عليه ولو تكلمت بكت وماتبي تبكي قدامه وتوضح له انه اوجعها ، شالت نفسها ودخلت داخل بسر تبي تختلي بنفسها وتطلع كل المشاعر الي نبش فيها و ألمها فيه ..
ابو فالح التفتت عليه بقهر : اقسم بالله يا هزاع ان ما احترمت حالك واحترمت بنت عمك ان بيتي يتعذرك!
هزاع بعصب : تطردني عشان هالمطلقه الي ميتمه ولدها وابوه حي!
ابو فالح بحدة : هذاني حذرتك لا اشوفك مقلل احترامك معها والله ان تشوف شي مايسرك يا هزاع!
ابو هزاع بزعل : والله انك قليل ادب وقليل حياء بعد ماتقول بنت عمي عيب احاكيها بهالطريقة
هزاع بملل : اوهوه عاد! ان قلت الصدق زعلتوا منه وش اسوي لكم
ابو هزاع بحدة : احترم حالك
بالجهه الأخرى ..
طلعت من الحمام وبدت تمشط شعرها وهي تشوف اختها منسدحه وتلعب بشعر ولدها النايم ..
نوف ابتسمت : خليه نايم ما نزل عليك الحب الا بذا الوقت!
الجازي وعيونها على ولدها تكلمت بهدوء : كل يوم احبه اكثر من اول
التفتت عليها بستغراب من نبرتها : فيك شي؟
عدلت جلستها وتنهدت بزعل وناظرتها بعيون دامعه : انا سويت غلط يوم تطلقت و ابعدت الولد عن ابوه؟
تقدمت لها بسرعة ومسكتها من يدها بحنية وهزت راسها بهدوء : لا ما غلطتي الي سويتيه شي نابع من طهارتك مارضيتي تكونين مع واحد بيدنس هالطهارة وردة فعلك طبيعية لأي وحده كرامتها أولوية لها
سكتت شوي وكملت : وبعدين ولدك شوفيه يتكلم مع ابوه بين الفترة والثانية وان بغى يشوفه يجيه حتى!
الجازي خنقتها العبرة : هزاع دمرني بكلامه ، الأيام الي فاتت هاجد قلت الحمدلله لعل وعسى انه هجد وعقل عني بس واضح انه كان مخبي كثير وكبه كله بوجهي قدام عمي وجدي!
نوف بعصبية : وش قالك !!!
الجازي سحبت يدها ورجعت تنسدح : ولا شي
نوف سحبتها بقوة : انا اكلمك ماتعطيني ظهرك ، علميني وش قالك ؟
بدت تعلمها الي قاله بالتفصيل ، ومعرفته الغريبة بموضوع مقابلة ابو ذيب وذيب!!..
نوف بعصبية : غبية انتي غبية اخذي البيالة وصنيها على راسه! ما ابي اطلع الحين واقلب الجلسة عليه ابيك انتي الي تطلعين وتعرفين تردين
الجازي بقهر : انا مو مثلك قوية! ما اعرف اوقف قدامه وارد عليه من دون لا تنزل دمعة!
مسكتها من كتوفها وهزتها تعبيرًا عن عدم تقبلها لكلام اختها : لا انتي قوية وكل وحده فينا لها طريقتها بقوتها ، لو انك مو قوية ما ربيتي هالولد لحالك ست سنين من دون لا تتحلطمين لو انك مو قوية ما كان وقفتي بوجه علي "ابو ذيب" وطلبتي الطلاق وانتي قلبك يموت بحُبه ..
سكتت شوي وتكلمت بزعل : هالدموع الي تطلع منك قدام الكل انا اتمناها يا الجازي! انا انخلقت ما اعرف اعبر حتى دموعي ابخل عليها تطلع و ارتاح فيها من شعور مزحوم بداخلي..انا قوتي تأذيني يا الجازي تأذيني! لا تكونين مثلي ولا تتمنين تكونين مثلي
الجازي دمعت عيونها وحضنتها بسرعه من دون ولا حرف منها ..
مسحت على ظهرها بحنيه وابتسمت بزعل : عمرك لا تشوفين دموعك ضعف ..كل انسان له الحق يعبر عن مشاعره بطريقته
ابتعدت عنها وابتسمت وهي تناظر ملامحها المتوردة من البكي : وانتي طريقتك بتعبيرك بدموعك ، فيها شي غلط؟
الجازي مسحت دموعها وابتسمت : لا
نوف تنهدت ومدت لها المشط : مشطي شعري طيب
الجازي بضحكه : تعرفين تستغلين الفرص
نوف بتعمد لتلطيف الجو : المهم ماعلينا عمليه "ظفريه" لي من فوق
الجازي ابتسمت : ابشري
-
في قرية " آل هازع "