جنّة إبليس

هام جدا 🤎

طب خلينا نفهم ❤️

علاج النرجسي بيجي من الحوار وتصحيح أفكاره المغلوطة ونظرته للعاطفة والعلاقات ونظرته لكل لشيء لانه بيشوف كل حاجة بعين مختلفة عننا تماما ..

طب لو العلاج بالحوار يبقا سهل أهو
لا طبعا مش سهل لأن النرجسي للأسف من أهم صفاته أنه مش بيشوف نفسه غلطان ومؤمن بأفكاره جدا فبالتالي هو دايما مش شايف نفسه عنده مشكلة ولا محتاج للحوار دا.. واستحالة يحكي عن نفسه او عن أفكاره ونظرته دي لأنه شايفها صح لدرجة انها مينفعش تكون مجال للمناقشة

هنا القضاء و القدر هيأ الظروف أن هشام يتكلم عن نفسه وعن أفكاره علميا دا تقريبا نص العلاج حتى لو هو ما زال غير ندمان أو معندوش شك أنه غلطان اصلا وحكى من باب أن يتلاعب بدانيا ويسيطر عليها
بس من غير ميحس دا كله بيصب في مصلحة أنه يفوق ليه بقا؟؟
لأنه اتكلم حط أفكاره في مجال المناقشة ودا كان استحالة يحصل مع الشخصيات اللي زيه
ومدام أفكاره اتحطت في المكان دا فممكن جدا بسهولة حد متخصص يهدمهاله ..
للأسف دانيا مش متخصصة.. بس دانيا حلت تقريبا نص المشكلة بأنه يتكلم.. دانيا هتحاول تعالج لأنها شايفة أن أنكاره للندم مش حقيقي وأكبر دليل لانه دايما عايز يوصلها أنه مرتاح للي بيعمله معندوش مشكله مش شايف نفسه غلطان مش شايف نفسه ظالم، ومع ذلك هو واقعيا مش مرتاح وعنده مشاكل كتير وبيتعالج نفسيا
فترجمتها لده أنه حاسس من جواه أنه ندمان بس مش مدرك دا بسبب جبروته وقوته وانتصاراته اللي دايما بيحققها بالطريقة دي... وجهة نظرها دي سواء صح او غلط بس أكبر حاجة بتصب في مصلحة أنه يفوق..
هشام استكبر أنه يقول انه ندمان حتى لو من باب الكدب عشان يضحك عليها ودا بيدل على أد إيه هو بيقدس أفكاره بصورة مرضية، اللي هو مش قادر حتى ينطقها بل بالعكس بكررها كتير وكأنه بيثبتها لنفسه مش ليها هي، عشان يعزز أفكاره لنفسه أكتر وأكتر..

هشام كان ممكن يفوق لو قوته كانت خانته زي ما حصل في حكاية أمير وكان فعلا قرب للانهيار ولو كان أمير كمل ومكنش قدر يكشفه هشام كان هينكسر وكان الشك هيدخل دماغه من ناحية افكاره وسلوكياته، لكن اللي حصل رجعه لنقطة الصفر تاني واداله ثقة في نفسه أنه صح واداله ثقة أكتر في أفكاره اللي هي غلط أساسا..

طب دانيا إيه تأثيرها عليه.. طبعا دانيا هتتصرف غلط لأننا عارفين انها مش متخصصة حتى لو هتتبع معاه طريقة صحيحة..
بس هي هتقدر تفرض نفسها عليه كشخصية وهتقدر تخليه محتاجلها.. احتياجه ليها مع قوة شخصيتها في العموم بعيدا عن تعاطفها اللي مش بيلغي عقلها وبيخليها تقف قصاده في الغلط هيبقى هو دا حجر الأساس

القصة معقدة واحنا لسة في أول خطوة وهنرجع كتير للنقطة صفر حتى يقضي الله أمرا كان مفعولا
في النهاية مفيش حد كبير على الهداية والتوبة مهما عمل.. لان القلوب في إيد ربنا وبس.

انا معملتش رواية طويلة عريضة بتكلم فيها عن النرجسي عشان في الآخر اخلقله شخصية تحبه ويحبها فتغيره انا كدا أبقى بخدعكم وبلبسكم في الحيطة وبقولكم you can fix him ودا مش حقيقي ولا صح..
طب إيه اللي هيحصل؟!!
اللي هيحصل اكيد مخالف لتوقعاتكم كلها ..

هناخد هدنة شوية من لعبة الانتقام اللي دايرة لان اللي جاي مهم كتجربة نفسية فريدة من نوعها.. أكيد هنستفاد منها على المستوى الشخصي والنفسي والاجتماعي..

استعدوا.. وكونوا على الموعد 🤎❤️