جنّة إبليس

توضيح هام جدًا، لا تتخطوه

زواج حبيبة و أمير باطل أم صحيح؟!

اولا زواجهم بالطريقة اللي تمت بالظبط، دي فيها خلاف شرعي لكنها صحيحة قانونا في مصر..

جمهور العلماء اقروا ان الزواج بدون ولي للعروسة باطل استنادًا للحديث الشريف

عن عائشة رضي الله عنها مرفوعًا: «أيُّما امرأةِ نَكَحَت بغير إذن مَواليها، فنِكاحها باطل»، ثلاث مرات «فإن دخلَ بها فالمهرُ لها بما أصاب منها، فإن تَشاجروا فالسلطان وَلِيُّ مَنْ لا وَلِيَّ له»

مواليها يعني الرجال الأقرب لها من عصبتها، الي هو في الحالة دي اخوها..

لكن حسب رأي الإمام ابي حنيفة النعمان ان المرأة تقدر تزوج نفسها بدون ولي مدام عاقلة وراشدة والشخص اللي هتتجوزه دا كفء لها وهيقدملها مهر مش أقل من أقل بنت في عيلتها،  وبما اننا ماشين في مصر على مذهب ابي حنيفة النعمان اذا الزواج صحيح شرعًا وقانونًا

طب مسأله التوثيق، امير اتجوزها بعقد وشهود بس بدون توثيق، هنا التوثيق لحفظ الحقوق فقط لكنه مش شرط من شروط صحة الزواج، بمعني ان لو زواجها صحيح شرعا فتوثيقه من عدمه مش هيبطله ولو باطل شرعا يبقا باطل كليا..
كمان اسم الزوج مش هيأثر في صحة الزواج يعني لو الزواج صحيح شرعا زواجها باسم آدم مش هيبطله..

طب تاني هل زواجها صحيح ام باطل؟! 

ما زالت مسألة خلافية.
بس لو جيت لرأي الشخصي انا شايفة ان مكانش ليها حل تاني اخوها وولي امرها مانعها من حلال ربنا ووقت جوازها مكانش فيه اي بوادر لتغيره خالص، دا غير انها كانت بتهرب من جواز تاني بالاجبار، كان ممكن تاخد معاها اي حد من اهلها مثلا خال او ابن خال لان امها كان ليها اهل في نفس منطقتهم لكن دي مجازفة ومخاطرة كبيرة جدا لان اخوها لو عرف كان هياذيها هي وجوزها بشكل مباشر وضرر جسيم كمان..
انا مش اهل فتوى بس انا شايفة حالتها استثنائية..

طب بالنسبة لرأي في الموضوع بشكل عام
انا ضد زواج البنت بالطريقة دي حتى لو الزواج صحيح..
لان على ارض الواقع فيه بنات حرفيا حصلهم كوارث من ورا الموضوع دا..

الماذون عموما بيكون مأذون منطقة سكن العروسة واللي بيجبوه اهلها عشان يكون ثقة بالنسبة لاجراءات التوثيق وكدا لاننا شوفنا بسهولة الراجل ممكن يتفق مع مأذون معندهوش ضمير وميوثقش الزواج
او مثلا يطلقها بعد الجواز عن المأذون اللي تبعه دا والمأذون ميخطرهاش بالطلاق ويعيش ويكمل معاها.

طب بنوتة صغيرة رايحة تتجوز بدون حد من عيلتها ابوها او اخوها تفتكروا دي ممكن يحصلها إيه
ابسط حاجة هيحصلها زي حبيبة جواز مزيف ولو جواز حقيقي هيعايرها ويبهدلها بعد كدا ويطلع ايمانها ومش هيكون ليها عين تستنجد بأهلها..

فوالله ربنا مش بيمنع عننا حاجة إلا لو لينا مصلحة فيها..
البنت البكر مينفعش تتجوز بدون ولي.. لحفظ حقوقها اولا يعني لمصلحتها هي مش مجرد تشريف لرجالة العيلة يعني.. ودا لان الحب ممكن يعميها ويخليها تفرط في حقوقها

تخيلو معايا مصير حبيبة في الجوازة دي.. وتخيلوا اللي كان في دماغ امير من البداية

حبيبة اللي انقذ حياتها تفصيلة صغيرة جدا جدا وهي ان امير كان هاكر فونها، لولا التفصيلة دي كان  فضل شايفها زي اخوها متكبرة ومتعجرفة وسارقة ثروته وحياته، تخيلوا نهايتها معاه هتكون ازاي؟
عشان كدا الموضوع عموما غلط وفيه مخاطرة كببرة للبنت

انا حبيت اوضح النقطة دي من خلال القصة وعشان انا مش عايزة نهاية القصة دي تكون كارثة الموضوع اتحل لكن هو على ارض الواقع بيحصل من وراه كوارث..

ياريت ناخد بالنا كويس.. ونعرف ان اهلنا اكتر حد عايز مصلحتنا.. ❤

ملحوظة بقا
البارت ليه تكملة وكان طويل جدا عشان كدا انا قسمته وعشان متأخرش في التنزيل على اخر الاسبوع كدا هتلاقوا الباقي 😍❤