رنس والعقيد اسر

آلبہآرت39

...................

ابو ديم ...والقران وقسماً بالله اذا رفضتي اخذج يمي واحرمج من كلشي لا كلية ولا طلعه ولا موبايل ولا تشوفين امج ولا اخوانج ولا كلشي اخليج بحسرره شوفت الشارع اذلج ذل العبيد

ديم ...حجاها وطلع ، كومتني دينا احس بطني تملخت

طاحلي دك دفرات احس امعائي تكطعت شسوي وين اروح
وين انطي وجهي ، غسلت وجهي دخلت الغرفه الثانيه

ماريد اشوف اي احد كعدت وصفنت ع الشباك

وافكر اريد اوصل لحل ماكو كلها طارت من عقلي
لا عندي الاخو الجبير الي يكدر يوكف بوجها ويمنعه ولا امي الي رفضت
اريد اعرف ليش ما رفضت ومنعته ما ادري ، والله كلشي

تكدر اتسوي وتكدر اتمنعه بس ما منعته ، هوه هذا حظي
من يوم يومه اسود مصخم ، خاله ايدي ع خدي وصافنه
شسوي شسوي بس اريد حل ، وين ما افكر بيها ما تضبط

اشرد مستحيل هاي وين اروح ما اندل أحد واذا اروح لعمامي اكيد يساندوا ، خو خوالي ذوله غاسله ايدي منهم
حرت وين انطي وجهي اتذكر حجيه إذا ارفض ياخذني يمه واني اتمنه الموت ولا اشوفه
مستحيل ينوصف كرهي تجاهه هوه سبب كلشي صار وياي وما اسامحه منا للموت ،
صوتي مبحوح من كثر ما صيحت وبجيت امس واليوم اختفه بالكوه احجي

بس فكره اعيش وي رجال بس تخطر ع بالي مدري شيصير بيه حس جسمي كله يكزبر ويكش لحاله
يعني اعيش وي رجال لا شايفته ولا عارفته مستحيييل
شسوي حرت ماكو كلها نسدت بوجهي اريد حل ماكو

جريت مخده وتمددت ، غفيت احلام مزعجه ..

كعدت ع صوت الاذان كمت توضيت وصليت ونخيت رب العالمين يدليني طريق الصح ماعندي اي حل

كون تتفركش هاي السالفه كون تتطلع ميت سالفه وتروح
كون يموت ونخلص من هاي السالفه ولا من كال ولا من دره
اندعي وره ما خلصت صلاه وانخي رب العالمين بحل مرت اربع ايام واني الح ع امي اكلها رفضي انتي
تكدرين تسوين كلشي دكلي
امي ..اسكتي خوش قسمه عليمن ترفضين الولد دارس وموظف وحباب ليش دفرين النعمه برجليج

...ماما يا نعمه لخاطر الله ، هاي النعمه للي تنخطب مثل البشر مو ابوها ينطيها هديه
...نفس الشي
...اسكت وارجع ثاني يوم افتح وياها الموضوع ونفس الحجي مليت وسكتت اشوف اخوي عيونه حايره

من يشوفني هيج هوه هم صغير ما بيده شي واختي هم قابل راح يسمع كلمتها
نسدت بوجهي مين ما ادور ، اقترحت عليه رنس احاجي الولد بس لا أعرف رقمه ولا حساباته
دورت عليهن ماكو وأصلا ما اعرف شكله بس اسمه سراج

يعني حتلو يطلعلي حسابه ما اعرفه ، خلص شهر صفر

انطه خبر ثاني يوم المشيه صادف سبت ، هوه منطي خبر

لعمامي وامي خابرت خوالي ، من ال ٢ نصبوا جادرين سوا واحد بصف الخ بالطول ب 3 اجو الزلم10
الشارع انترس من خوالي وعمامي أولادهم وهمه هم
ماقاصرين هواي جايين وياهم ، بدت امي اتسوي جاي