راجعة من دوامي المتعب كالعادة اني واختي الصغيره وبت عمتي الي ساكنه يمنه ركضت على موبايلي الي مجان بي بس يوتيوب ولعبة سابري صارت ب 2 الظهر واجت اختي الجبيره الي تداوم بالجامعه كعدنا نتغده لان منعرف اذا منلتم كلنا الرباعي المرح لمتنا جانت حلوه خربت شوي من تزوجت خامستنا الي هيه بت عمتي الجبيره
..............................................
ايه بت عمتي الجبيره مواليد 1998 طالبه قانون حبت شخص من الموصل بس مصار من نصيبها وبسبب مرض ابوها انجبرت تزوج دكتورها بالجامعه وجان احلى نصيب الها
سارة اختي مواليد 2001الجبيره طالبه صيدله تحب طالب وياها بالجامعه
ايات بت عمتي مواليد 2002الي مالها اي خلك بالدراسه صف خامس علمي
اني بنين مواليد 2003 طالبه ثالث متوسط
اختي روان مواليد 2004 وهم مالها خلك بالدراسه صف اول متوسط
...............................................
واحنه كاعدات كالت ساره: بنين متسويلج فيس وتجين ويانه بالكروب
بنين: يي سويلي انتي احسن ما ابقه وحدي وانتن ملتهيات بالكروب
سوتلي بنين فيس ودخلت للكروب اول مرا ادخل لبرنامج فصارلي واهس دخلت وياهن جان تفاعل وكذا تعرفت ع اشخاص من الكروب بس مجان عندي ماسنجر بس فيس يعني ع كد التعليقات فقط مرت الايام وواهسي بالكروب يزيد بس كل هذا ما اثر ع دراستي جنه دوم اني وايات سوا بس جانت المقربة مني لدرجه محد يتخيلها ايه وخاصه ان هنه ساكنات يمنه لان ابوهن متوفي وبيتهم بي بس امهن واخوهن واصلا تربن ويانه بحسبه خواتنه مو بس بنات عمه بس جانت شخصياتنه متناقضه ايه جانت هادئه مينسمع صوتها ساره جانت عاقله وفاهمه ايات جانت طايشه اني جنت وكحه ولسان وروان مايعه وفاهيه
بيوم كاعده ع الفيس وصارت تعليقات بيني وبين ولد تعليق يجر تعليق شقه وضحك وكذا الولد اسمه عبدالله من الانبار وكل يوم ع نفس الاسطوانه تعليقات اني وياه دزلي طلب ووافقت
اجه شهر الرابع وبحساب اني وزاري انسحب الفون مني اختي صارت متنطي الي بس الخميس فمر الاسبوع بدون اي احداث مهمه واجه يوم الخميس واني بالشارع اركض مو امشي علمود الحك ع الفون رجعت وخابت امالي اختي بعدها مراجعه والفون يمها 🥺
انتضرت جيتها ع نار واول ما اجت اخذت الفون ورحت نزلت ماسنجر لكيت الاخ حارك الماسنجر عليه وينج وماكو ومختفيه ومن هلحجي اني دكات كلبي انسمعن راسلته وكوتله ولله دادرس فما فاتحه الفون عاد جاوبني وتعرفنا جان انسان لطيف بس البدايات تخدع بقينا نحجي بيومها حتى اكل ما اكلت شغلني صارت الساعه 1 بليل واني غفيت واني داحجي وياه واجه يوم الجمعه ولكيت ساره ماخذه الفون حتى قبل لا اكعد ومر الاسبوع الثاني بملل وعقلي جان بين الدراسه وبين التفكير بيه طبعا اني انطيته معلوماتي غلط لا المكان ولا اي شي بس الاسم والعمر والدراسه صح اجه يوم الخميس اجيت راسلته ما جاوب بس فاتح نت وينشر حزين اني استغربت للعصر يلا جاوب
عبدالله: انتي ليش تختفين هيج
بنين: اني طالبه ثالث ودادرس للوزاري
عبدالله: هيج حشتاقلج
بنين: شسوي يسحبون الفون مني ومينطو الي بس الخميس
عبدالله: انً شاء الله التوفيق والنجاح
بنين : ميرسي
عبدالله: بنين
بنين: ها عيني
عبدالله: اريد اسمع صوتج عادي اتصل
بنين : بليل اتصل
واجه الليل وحجينا جان عبدالله صاحب اسلوب حلو تعلقت بيه بفتره قليله بس مشكلتي الكبرياء
مرت الايام واني وعبدالله نحجي كل خميس الا ان اجه يوم تسليم بطايق الامتحانات وانصدمت من شفت صديقه عمري مموجوده رحت سئلت الاداره عليها طلعت مداخله بكلوريا اني تخبلت وخرب واهسي من الدراسه
رجعت واني مقرره ما امتحن حاولو اهلي رادو حجو ماكو ما اقتنعت اعيد يعني اعيد انجبرو يتقبلون ضميت كتبي وبقيت ع الفون نحجي اني وعبدالله مرت اشهر واني وياه سوا بيوم حاجاني عبدالله
عبدالله: بنين اريد اكولج شي
بنين : كول عبدالله
عبدالله: بنين اني احبج
من كالي هيج معرف شكول رغم اني جنت منتضرته يعترف بس سبق وكولت مشكلتي الكبرياء
بنين: عبدالله معرف شكولك بس الصراحه بعدنا لا نعرف بعض هواي ولا ابد خلينا اصدقاء افضل
عبدالله: خلص براحتج
وراها ضلينا نحجي واتصالات دوم اليوم ميمر اذا ما احجي وياه
بيوم اجتنا ايه وجانت حامل بالشهر السابع كعدنا كعدتنا المعتاده عاد كوتلها ع علاقتي بعبدالله ايه بقت تنصحني ابتعد عنه وكالت احنه ليش نضحك ع نفسنا منو الكال اهلنا يقبلون ساره حبت واحد من الممكن الهم نهايه سوا وايات نفس الشي انتي لا الولد سني من الانبار محد يقبل لتغلطين غلطي
حجيها جان منطقي واني ادري محد حيقبل بس جيب اليقنع عقلي بيومها ما راسلته شكد راسل مجاوبت التهيت ويه ايات
حاجيته بليل ما جاوب ل 2 اني منتضرته هو ماكو ساد النت استغربت هلشي ولا عندي رقمه ولا ابد تواصلي وياه جان بس ع الماسنجر
..................................................................................
