اجتي اخذتني دخلت وياها للمحاضره ب 10 ونص يلا طلعنا وكولنا ب 12 نطلع نتغده
رحنا لمطعم الجامعه نتريك احنه كاعدين واجه ولد سلم عليه الولد قبل جيرانه وقبل خاطبني بس اني رافضه جنت احب عبدالله
سجاد: شلونج بنين اخبارج
بنين:الحمد لله وانت
سجاد : عادي اكعد
بنين: ي تفضل
سجاد: حليانه وصاير عدج كرش
بنين: لا حامل
سجاد: ليش تزوجتي
بنين: ي الي سنه ونص
سجاد: الله يسعدج وبيا شهر هسه
بنين: بالسادس
سجاد: الله يسهلج
بنين: تسلم
شو هاي سجى من وحدها كامت تحجي عالولد هو ما حاجاها بس هيه بقت تغلط عليه
سجاد: هاي تريد تفشلج اني اترخص واحسلج روحي للبيت والله يسعدج مره ثانيه
وراح
بنين: هذا اسلوب برأييج
سجى: انتي جايه علمودي لو علموده
بنين:زحمه احد يسلم عليه واطنشه وبعدين شنو علموده ترا صدفه شفته وتدرين بيه محد بعيني غير زوجي ولا افكر اخونه ولا ابد وعفتها وطلعت اتصلت بمحمد
بنين: محمد تكدر تجي تاخذني من كذا مكان
محمد: اي بس خو ما صاير شي
بنين: تجي وافهمك بس عفيه لتكول لحسين
محمد: ادللي نص ساعه اني يمج
هيه سجى اجتني كالت وين
بنين: راجعه للبيت
سجى: والله متروحين اسفه والله ما قصدي
بنين: لا خلاص واصلا حمايه جاي بالطريق
هيه كبل اخذت فوني ودخلت لمطعم الجامعه
بنين: سجى انطيني الفون
سجى: ماكو الا تكولين ما اروح يلا
بهالحجي سجاد يباوع اجه يمنه
سجاد: كولي بنين خو ما اكو شي
بنين: لا بس اريد ارجع للبيت وماخذه فوني
سجاد: تعالي اني اوصلج
سجى: انت لتدخل
سجاد: ساكت عليج وعلى سوالفج علمود بنين ما اريدلها حجايه لتخلينه نفضح المضموم
بنين: تسلم اخويه اصلا هسه حيجي حمايه
سجاد: براحتج واي شي تحتاجي اني هناك واكف لتترددين ابد
بنين: فدوه لعمرك
انطتني الفون وبقت واكفه يمي تعتذر شويه واتصل محمد طلعناله
محمد: هلا بمرت اخويه
بنين: هلو حماده
محمد: امشن خلي اغديجن
بنين: لا عليمن
محمد: دمشي يمعوده وجهج اصفر
اخذنا للمطعم هيه راحت للحمامُ تعدل مكياجها بقينا اني ومحمد
محمد: احجي شبيج
بنين: حجيتله السالفه كولها بدون ما اضم اي شي
محمد: هاي من شفتها عرفتها مو راحه فديربالج منها وعوفيها احسلج
طبعا هو جان كاعد يمي ماكو 5 دقايق واتصل حسين
حسين: انتي وين
بنين: بالمطعم
محمد اشرلي ما اكوله اني وياه بس شنو بعدني محاجية وهو كال
حسين: انطيني محمد
بقه يحجي وياه وما اسمع بس الصياح رغم مفاتح مايك
محمد: بنين اليوم روحي لاهلج حسين متحلفلج واصله حجي استحيت من نفسي والله من سمعته
بنين: يمه عزا شواصله
سجى اجت فسكتنا مندري هيه ام المصايب
رجعنا وصلنا سجى واجتني رساله من حسين صوره سجى دازتها اله اني ومحمد بس كاعدين ونحجي وكعده عاديه وكاتبتله مرتك عدها علاقه باخوك
شوفتها لمحمد كال ادري روحي خويه لاهلج واني احلها
بنين: محمد خاف يعوفني والله ما اكدر بدونه
محمد: شبيج خويه شو بطلي تمسلت يعوفها هو غير يعشكج وبعدين حسين ميشك لا بيج ولا بيه بس اخاف ليضربج لان حسين عصبي وميشوف كدامه
وصلني للبيت اني اول ما دخلت اتصلت بيه ميجاوب الف مره اتصلت وماكو ادز رسائل هم ماكو
3 ايام ع هلوضع واني عايشه ع المي والله من خلصن اتصل
بنين: ليش متجاوبني هيج بعينك اني رخيصه بحيث اخلى عيني ع حمايه الي بحسبه اخويه
حسين: اني لا شاك بيج ولا بحسين اثنينكم تربيتي بس هاي كتلج ابتعدي عنها عوفيها ميفيد الحجي
بنين: هاي هيه براحتك حسين اني هم بعد ما اريدك
حسين: فوكاها انتي الزعلانه
بنين: ي طبعا
سديته رجع اتصل مجاوبته خلي يصير بيه مثلي ضل اليوم كوله يتصل واني ما اجاوب اخر شي اجانه لبيت اهلي جنت متمدده ع ظهري حسب كلام دكتورتي
حسين: بعد طولي زعلتج
بنين: طبعا تستاهل
حسين: هاي ليش
بنين: مو عفتني 3 ايام بعد لتحاجيني
اجه يمي جان بيدي علاكه بيها بوكس جبير
حسين: اسف بنيتي بس ادري بهاي تدور وراج وضجت من شككت بعلاقتج بمحمد لا خلت حلال ولا حرام
بنين: اصلا اليوم ناويه اروحلها اموتها
حسين: ماكو مجرد تخابريها هسه وتقطعين علاقتج بيها ختولي واني هسه رايح وبليل اجي اخذج
بنين: وك
اتصلت بيها رزلتها وكوتلها تبتعد عني بعد
فتحت البوكس لكيته مليان فلوس حبيت 😂
لليل اجه اخذني وتراضينا فتره ورحت سويت سونار وطلع بيه ولد حسين فرح واني هم صح جنت متمنيه بنوته بس عادي الحمد لله ع كلشي
بديت اجهزله ماما تكول لتشترين هواي اني اجهزلج اول طفل علينا بس اني ابد قافله يمه فرحتي هذا
حسين اتفق ويه واحد يسوي الجربايه مال الطفل نفس الغرفه مالتنه
بهالفتره البيت السابع والثامن ما خليت شي ما اشتريته كوليوم وجايبتله شي او موصيه ع شي اكو غرفه جوه جنت مسويتها مخزن شلنا الغراض البيها لوحده من الغرف الفوك وصبغتها ورسومات وكذا وجبت بيها غرفه طفل وهم خليت غراضه بيها صارت تموت
بنص الثامن رحت للدكتوره كالت وضعي تمام والطفل هم بس دمي كالت حاولي تصعدي حسين من سمع خلصها عليه معلاك يوميه وكولشي يصعد الدم
اليوم 6/1 الي 23 يوم بشهر الثامن باقي اسبوع وادخل بشهري وان شاء الله الله يسهل وينورني ابني وينور حياتي
قصتي لهنا وانتهت وحياتي مستقرة والبنات هم الحمد لله حياتهن استقرت
ختامها 🫶🤍
افترت الدنيا وغلبت الدنيا داس
والله عوضني بولف يسواله ناس 🤍
