مرت الاشهر وماكو اي جديد بحياتنا غير ان ساره تزوجت اني مخلصتها دراسه ايات حاولو يرجعوها بس ما قبلت رادت وقت ترتاح بيه ورادت تسويلهم حل صار اكو توتر بعلاقتي بحسين والسبب جان مني لان مصار عندي حمل صرت انغث من كولشي وهم عماته هواي يضغطن عليه بالحجي بيوم رحنا لاهله كاعدين وره الغده وحجت ام هاجر
ام هاجر: شنو ما صار عدكم طفل
حسين: الرزق من الله
عمته : روح راجع بيها هسه تطلع متخلف
اني كالت هيج والدموع تجمعت بعيني
حسين حضني وحجه: على كيفج عمه تحسسيني سنين صارلنه متزوجين وما عدنا بعدين اني مقتنع بالي الله كاتبه وشوكت ميجي هلا بي
ام هاجر: عمه غير علمودكم انت كبرت ويرادلك طفل
حسين: اني شاكيلكم بعدين ليش متكولون يمكن الصوج بيه ليش كلشي براسها لو لان مرايديها يمه قسما بالله اذا انفتح الموضوع بعد لبيتكم ما اطب
ام حسين: لا يمه لتكول هيج ماكو شي هاي هيه الحمد لله على كل حال وشوكت ميجي خلي يجي
حسين: خويه بلا زحمه اخذيها لبيتكم ترتاح وشويه وجايكم
مرت مرتضى: صار خويه
ام حسين: وين والله متطلع من البيت بنيتي يمي تبقه اني شوكت شايفتكم
بنين: ميخالف خاله شويه واجي
ام حسين: براحتج يمه بس مو متجين ازعل عليج والله
بنين: لا ولله ساعه واجي
ويه مدنطلع اني ومرت مرتضى سمعنا هاجر واختها يحجن
اخت هاجر: ميخالف يصبر سنه سنتين بعدين يذبها ويرجعلج
هاجر: بلكت كون الله ميشوفها الطفل
اني طلعت كبل بس شنو اشهك من البجي بيت مرتضى جان بصف بيت اهله اول ما طبينا استلمتني مرت مرتضى
مرت مرتضى: انتي ليش هيج على كولشي وبجيتي وج غثيهن ضغطيهن لتضلين تتبكبكين
بنين: صعبه والله وين ما اروح وها مصار عندج شي خاف عندج خلل خاف متخلفين لو عماته كل ما حجن وكالن عاقر زين اني ما اكيف يصير عندي طفل بس مو بيدي اراده ربي ولا اعتراض ع حكمه
هيه كبل حضنتني وبقت تواسي بيه شويه واجه حسين هيه ترخصت وهو اجه خلاني بحضنه
حسين: ليش بابا ليش هالبجي
بنين: حسين يجي يوم تعوفني
حسين: شبيج بابا مخبله انتي احد لاعب بعقلج
بنين: جاوبني حسين
حسين: تعبت هواي يلا حصلتج اجي هسه اعوفج الا اذا طار عقلي
بنين: زين اذا مصار عدنا طفل هم تزوج عليه
حسين: الرزق من الله ولا اعتراض ع حكم ربي وهو مصارلنه كم شهر من تزوجنه
بنين: حسين النه 9 اشهر
حسين: لو 1000 سنه ميهمني
شويه هديت بس الخنكة بعدها بيه والخوف بده ياخذني خاف يسونها ويزوجنه ويخلنه يعوفني
ثاني يوم رجعنا جان مباقي شي ع امتحاني حسين التحق بحيث كبل ذبني ع اهلي وراح خلصتها دراسه صارت الامتحانات مجاوبت زين بسبب حالتي النفسيه وره الامتحانات رجعت لبيتي خطيه حسين هاملته الفترة الراحت
فترة الامتحانات يجي يدرسني مرات ياخذ اجازة علمودي
رجعت حياتنا طبيعيه بس وين اني كل ما يجي يوم كل ما انقهر اكثر جان باقي شهر ونص ويصير سنه ع زواجنا عبدالله جان مرات يراسلني واكعد افضفضله ع وضعي جان يحرضني اتطلك واعوفه قبل لا هو يطلكني بس وين واني صرت ما اكدر بدون حسين ثانيه من يروح للدوام ابقه كلساع متصله بيه
بهالفترة صارت عندي خربطه بالهرمونات فشكيت بنفسي حامل دزيت ايات ع اختبار حمل منزلي وكولت ما اكول لحسين الا أتأكد جابته ودخلت حتى اشوف بس شنو جنت خايفة كولش بعدني هسه فتحته وداجربه ولكيت الشهريه نازلة جان اصعب موقف طلعتلهم ابجي حاولن البنات يهدني وماما بس ماكو بدون فايدة اخر شي عفتهن ورحت تمددت وطفيت الاضويه ماكو نص ساعه وحسيت حسين يمي اني كبل حضنته وابجي
حسين: اني شكايلج بابا عوفي الموضوع لتضلين تحركين بكلبج علموده ووعد اذا عبرت السنه وما صار عدنا نبدي نراجع وحتى اذا اضطر الامر نسوي انابيب بس لتقهرين نفسج
بنين: حسين شذنبي اريد طفل باقيه اتحسر عليه
حسين: الرزق من الله بنيتي يلا كومي وياي
كومني غسل وجهي وشافني ارتاحيت يلا رجع لدوامه
ثاني يوم جان يوم نتائجي والحمد لله نجحت بمعدل زين وهم التهيت واتناسيت موضوع الطفل اهل حسين صارو من يجون وحدهم بدون بيت عمه لو عماته يدرون بيهم يقهروني
التهيت بالتقديم والتحضير للجامعه وحسين وياي بكولشي جنت طايرة من الفرح لان خلصت من المدرسة
بيوم اني يم اهلي وحسين بعدله 3 ايام وينزل واصلا بعد 3 ايام لعيد زواجنا
فجنا دنخطط اني والبنات داسويله حفله جنت جايبة هديته بعد بس الكيكه كولنا العصر اروح احجزها
بنين: بنات اكولجن شي بس ممتأكده منه
البنات: كولي
بنين: يمكن اني حامل بس اخاف أتأكد
ايه: شوفي خلي نروح تحللين لان الاختبار المنزلي مو دوم اصلي بس لتبنين امال وبعدين تنقهرين كولشي تقبلي وكولي الحمد لله
بنين: لا الحمد لله ع كل حال انتن ادعلي
البنات: ان شاء الله الله يفرحج وميكسر بخاطرج
اتصلت بحسين كوتله نريد نروح اني والبنات للسوك عندي نواقص كال روحي
اخذتنا ماما كولنا دخلت حللت
وبيقينا بره نص ساعه كاعده ع نار ولله ختمت القران شويه وصاحو اسمي سئلت البنيه كالت ادخلي للدكتوره
دخلنا اني وماما
................................................................................
