لاتحرم الروح من وصلك ، وترى الوصل منك يحييها

20

في المغرب كانت نجود وفاطمه جالسين بالحوش حقهم .
لأنهم يعيشون في نفس البيت .
كان قدامهم جلسه والانوار البرتقالية تنور عليهم .
الاكل والفشار والعصيرات اول الحاضرين .
نجود وهي تشرب العصير وبحقد : اول يوم عمل لي يخليني نادله ، لا والله ماصارت
فاطمه كانت سارحه بعيد عن نجود .
نجود نظرت لها وقالت وهي تدقها : بنت وشفيك
فاطمه نظرت لنجود وقالت لها اللي صار .
نجود : اففف يابنت الحلال انا قلت لك أشغال الحب مامنها فايده ، وخصوصا لما شفته يهرب منك ماكان عندي امل انكم تكونون مع بعض
فاطمه عضت شفايفها : يعني ولا مره حط عينه بعيني ، وش ذا الخجل الغريب
نجود ابتسمت : يابنتي لو الشخص اللي احبه زي حقك بوقف قدامه واقول له كل شي
فاطمه ضحكت .
وقالت نجود : ايه اضحكي ، المهم اسمعي انا لازم اغير مكانتي بالمركز لاني بفقد جنوني من الشايب
ضحكت فاطمه وهي تاكل الفشار : في الحقيقه خالد مو صارم وانه طيب بس مدري وشفيه عليك وهو ماشافك من قبل
نجود بفضول : لا يعني  فالعاده اول مره اشوفه يتصرف بلطف وأدب لكن واضحه الصوره
فاطمه وهي تكتم ضحكتها : ايت صوره
نجود نظرت لفاطمة بعدم فهم : ايت صوره ؟
فاطمه : مو قلتي واضحه الصوره ايت صوره
نجود ضحكت : اقصد انه واضح من الحين دب
ضحكت فاطمه وضحكت معاها نجود .
فاطمه سكتت وقالت : انا مقدر اكمل اشتغل في نفس مكانه
نجود تلاشت ابتسامتها : رجعنا لنفس الموال ! ، يابنت اذا هو مايبيك هو اللي يروح!
فاطمه وهي تلعب بيدها : لكن طلعت انا خفيفه
نجود نظرت بشفقه وحضنت فاطمه وهي تمسح على شعرها وقالت وهي تبتسم بهدوء : عشت دايم بكلام ابوي اللي كان يغرزه فيني " انا اللي مايعجبني ادعس عليه"
نظرت لفاطمة : علشان كذا اذا في احد مايبيك ادعسي عليه وامشي
فاطمه بدأت تفكر بكلام نجود .

-------------

على أذان العشاء | هتان

دخلت هتان للاسطبل ودخل ابوها وراها .
راجح بفضول : كيف حالها
هتان ابتسمت بلطف : بخير ، يعني تحاول تكون بخير
راجح اكتفى بالابتسامه .
دخلت هتان للبيت وشافت عمها يشرب الشاهي بالمطبخ .
ابتسمت وحطت شنطتها على الكنب وقالت : سلام
مساعد : وعليكم السلامه
دخلت غرفه نسيم .
وشافتها جالسه على الجوال .
قامت بسرعه وسحبت هتان وقفلت الباب .
ضحكت هتان وقالت : كل بعد التذمر طلعتي انتي المتحمسه
نسيم : اقول قولي وش صار
هتان بتمثيل التفكير : يعني مالقيت شي !
نسيم بصدمه وفضول : كيف يعني
هتان وهي تلعب بيدها : يعني مالقيت
نسيم ضربت هتان على يدها وقالت : لاتدورين يمين ويسار وقولي وش صار
ضحكت هتان وقالت : خلاص طيب ، الحقيقه دخلت غرفه تركي بعد معاناه ، وبديت ادور بكل مكان موجود بالغرفه لكن مالقيت شي ، بعدها سمعت صوت تركي قريب من الغرفه ونطيت للدولاب ، هو سهل انه يشوفني بس مدري كيف ماشافني
سكتت نسيم بصدمه وقالت : وش اللي قاعده تقولينه يابنت ! كيف دخلتي غرفه الرجال كذا
هتان قامت : اجل كيف بلقى الدفتر ياذكيه !
نسيم قامت وقالت بتفكير : يمكن الرجال مايحط الدفتر بالبيت ولا غرفته ، ولا يمكن مو دفتر اوراق يدسها بمكان
هتان نظرت لنسيم بتفكير وقالت : باقي سعود
نسيم : ياويلي وش بتسوين بعد ؟ لايكون بتزورين جده
هتان بلعت ريقها : شدخل بروح أزور امه
ضحكت نسيم بسخريه وجلست على السرير : ياخي هتان ، ام سعود ميته من سنين
هتان تعدلت ملامحها وقالت : اما توني ادري
نسيم : اقول يابنت انتي مو قد الشي هذا اتركيه احسن لك قبل لايدري ابوي
هتان ب اصرار : بس لازم القاه فضولي قاعد ياكلني وينهيني
نسيم : بكيفك لكن إذا كشفك ابوي مالي شغل
هتان ميلت شفايفها وطلعت من الغرفه لغرفتها .
وماتدري ليه كلام تركي عالق بمخها .
وهي تغير ملابسها قالت : خلاص !
حست بشي غريب وسخيف بسبب انها تفكر وتشغل عقلها الجميل .
تنهدت بعصبيه وطلعت من البيت الخشبي .
كان مساعد وراجح جالسين جنب بعض وشابين النار .
مساعد : هتان على وين
راجح لف يناظرها .
هتان ابتسمت بتسليك وقالت : طالعه اتمشى مع الجوهره
راجح ابتسم : تمام
مشت من الجهه الثانيه اللي تطلع على سور الجوهره .
وكانت ساحه الاسطبل كبيره .
وبالنص السور الكبير .
دخلت لبكج الجوهره وفتحت الاحبال اللي فيها وركبت عليها .
جرت فيها بسرعه للسور وبدات تجري .
ومره ثانيه عقلها مو راضي يتوقف عن التفكير بكلام تركي .