بريق خافت ✨ - مكتملة

الفصل الرابع عشر

كان كنان جالسا بجوار الفتاتان يزفر بين الحين و الاخر لتقول له نوف بهدوء : اهدي يا كنان ..

- يعنى انا كل يوم فى النادي علشان التمرين بتاعي و الشغل تكدرنى يوم الاجازة ليه انا و تنزلنى ..

لتشيح بريق بذراعها و هي تقول : انت مش اخويا يبقي تقعد معايا ..

- و سارة مجتش ليه طيب و ايه القرف الى انتى لبساه ده ..

نظرت له بريق بغضب بعد ان القت نظره على ملابسها المتكونه من قميص شبابي واسع المقاس و بنطال اجابته متبرمه : سارة قالت ان احنا هنقعد نتكلم و حسان و عمو هيتمشوا سوا هتيجي تعمل ايه .. قالتلى لما نتفاهم سواء اه او لا هتيجي تحضر الاتفاقات هي و طارق .. و ماله الى انا لبساه ..

- ما قولتلك وحش اعيدها و لا ايه ..

لتقول نوف بسرعة تنهي الشجار : خلاص يا كينو بقى .. ادينا قضينا اليوم و هي اتفقت معاك هتعزمك على الاكل بعد ما تخلص .. و الى لبساه اتلبس خلاص .

نظر لها كنان قائلاً : بزمتك ده منظر تقابل بيه عريس لابسه تيشرت اسود اوفر سايز .. انتى ترضيها للراجل ..

بريق : ما انا بقابلك كده عادي ..

ليستغفر كنان فجذبتها نوف بهدوء و هي تهمس : كفاية عند البتاع الى لبساه مش حلوفعلا حسابنا فيه بعدين ..

ما كادت تجيب حتى اضاء هاتفها برقم حسان .. لتذهب اليه بعد ان القت التحيه عليهم و القليل من الاحاديث العامة تركهم كل من ابراهيم و حسان و تحركا ليقوما بجولة تمشيه معا ..

ما ان رحلا حتى قالت بريق و هي تكتف ذراعيها : اخر حاجه كنت أتوقعها رؤية طلعتك البهيه مره تانية .

قال هو بهدوء : نتكلم في المهم و لا لماضه و خلاص ..

قضبت ملامحها و لم تجب ليكمل هو : تمام اولا احنا علشان نكمل الموضوع ده في شويه شروط لو موافقه تمام .

ضحكت و هي تقول له بسخرية واضحه : انت عارف الموضوع ده اتهرس في كام فيلم و مسرحيه و رواية .

- عادي يتهرس في الحقيقه كمان الي عندي تسمعيه و تفكري فيه براحتك .. ربنا خلقلنا ودنين علشان نسمع اكتر ما نتكلم ..

زفرت متمته : متقفل الموضوع اسهل .

قال بنبره صادقه و هيو يحك رأسه : بصي من الاخر الموضوع مش سيئ لدرجه اني اقفله و في نفس الوقت ابراهيم مش هيحلني بصراحه و لو مش انتي هيبقي في غيرك .. علي الاقل انتي مش موافقه بس مضطره بصوره أو اخري زيي يعني ممكن نوصل لحل وسط .. انا كده كده مش هضايق لو انتى مش هتضايقينى طبعا .

رفعت احد حاجبيها قائلة : مش شايف أن كلامك محتاج فلتر .

- لا شايف انك اخر واحده تقول ملاحظه زي دي .