بريق خافت ✨ - مكتملة

الفصل الخامس و الثلاثون - الاخير

كانت السيارة تستقر الان اسفل المنزل الذي يقطنان به .. ليباغتها بيجاد و هو ينظر الى ساعته : بصي الطيارة فاضل عليها ساعتين .. قدامك نص ساعه بالكتير تغيري الفستان و تجيبي شنطة صغيرة بالحاجات الضروري ليا و ليكي .. انا اصلا لقيت حجز بالعافية ..

كانت تنظر له بعدم فهم : طيارة ايه و سفر ايه مش فاهمة .. طب و برونو ..

- فى نسخة من مفتاح الشقة فى البيت هكلم بابا يجي ياخده اليومين طول .. خلصي بقي ..

صعدت للاعلى بسرعة .. و قد ضبطت حاجياتها الاساسية و هي تجهل وجهتها فى الاصل .. لكنها فعلت ما يريد حتى تري الى ماذا سينتهي كل ذلك .. شعرت ببرونو يمسح جسده بقدمها لترفعه قائلة : حبيب ماما و الله اللى وحشني .. تعالى ..

قامت بتحضير اشياءه و طعامه ايضا مما جعلها تستغرق بعض الوقت .. حملت الحقائب و الصغير و نزلت للقاطن بالاسفل لينظر بتعجب لبرونو بينما هي تصعد للسيارة : هنوديه لعمو الاول ..

- اذا كان عمو مش فى البيت ..

نظرت له ببراءه عكس كلاماتها : عادي يروح يلاقيه .. مش هسيبه لسه لوحده لحد ما حد يجي ياخده ..

و كان لها ما ارادت بالفعل .. وجدت نفسها تربط حزام الطائرة قائلة : لحقنا الطيارة ممكن افهم بقى ..

- الفندق الى كنت فيه سئلت و قالوا ان فى غرف متوفرة الاسبوع الجاي اللى هو الاسبوع ده .. فكنت مقرر نطلع شهر عسل بدل اللى اضرب او يومين عسل على حسب بس اللى حصل دربك الدنيا .. بس شوية اتصالات صغيره طلع فى غرف عادي .. و طيارة كمان ساعتين بس ..

قالت بتشوش : طب و حسان ..

- اقسم بالله انتى مراتي انتى ليه بتسقطي الموضوع ده .. كده كده انتى مالكيش دعوة .. لما نرجع من السفر نتصرف انا و هو هنخلي ابراهيم يحجز ..

- انت قولتله صحيح ..

ابتسم و هو يغمض عيناه حتى يستريح قليلا : بعتله رسالة ..

تنهدت بيأس و هي تقول : الجنان اللى انا فيه ده يا ربي ..

ليحتضن يدها بين كفيه و من ثم غفا .. نظرت له مليا و من ثم وضعت رأسها على كتفه تحاول استحضار النوم فقد كانا يومان طويلان بحق .. وصلا الى الفندق و قد تم الامر بسلام .. ليبدأن معا فصل جديد من حكايتهما معا او يبدئان حياتهما فى الاساس .. دون اضطرابات او قلق .. او كوابيس ..

فى صباح اليوم التالى ..

كان بيجاد يجلس على احد الكراسي بعيدا عن الفراش يزفر بضيق و هو يحدث ابراهيم محاولا استدراج عاطفته : خليك جدع يا هيما بقي ده اسبوع .. هو انا عمري خدت اجازة ..

- أنا مالي انت مقولتش انك مش هتيجي الشغل شغلك مين الي هيعمله يعني ..

استيقظت بريق تفرك عيناها و هي تبحث عنه .. لتهمس : بابا كويس ..