في كل حزة لك مع البال ميعاد

بارت"10"

يوم الخميس قررت ليلى تعزم اهل الديره وتعلمهم ان ميعاد فسخت خطوبتها من نياف وربي ماكتب نصيب

ليلى:- خايفه ياسلطانه من امي وكيف بتتقبل هذا الكلام وقدام اهل الديره
سلطانه:- ماسويتي شي غلط ومستقبل بنتك معتمد على هذا الكلام لاتقطعين نصيبها عشان خاطر احد
ليلى :- بس هذي امي اخاف تغضب علي
سلطانه:- لاتظلمين بنتك انتبهي ياليلى ولو زعلت امي رضاها بسيط بس ظلم بنتك له حوبه
الساعه 7 المغرب تجمعو كلهم ب جلسه الحوش والاجواء البارده والنار تتوسط جلستهم
ام السيف :- وين ميعاد وغاليه ياليلى ليه ماعاد نشوفهم والله اني فاقدتهم
دخلت ميعاد وتكلمت بحب :- موجودين لكن اشغلتنا الدراسه ياخاله وعساك ماتفقدين غاليك
جارتهم نوريه :- ميعاد يا امي كم باقي لك وتخلصين دراستك ودنا نفرح بك انتي ونياف
ليلى بتوتر:- ميعاد ماعادها خطيبه نياف وربي ماكتب القرب لهم
ام سطام بضيق :- صحيح ربي ماهو كاتبهم لبعض وعسى الله يوفقهم جميع
نوريه:- خسرتو الذهبه والله انكم ماتلقون مثلها
ام نياف بحده:- ولدي بيلقى اطيب البنات واسنعهم ماوقف نصيبه على بنت جسار
ام السيف بعصبيه:- وميعاد ربي بيرزقها بالنصيب الصالح وتستاهل كل خير

طلعت ميعاد لغرفتها وقلبها مليان قهر وبكت لان شعورها مر وهي تسمع هذا الكلام منهم وليه ام نياف دايم توضح لهم ان ميعاد سيئه وماتستاهل نياف بكت بقهر ونامت بدون ماتحس بنفسها

انتهت العزيمه على خير وكانت ليلى سعيده من ناحيه امها وكيف رضت على هذا الموضوع وماعصبت عليهم ولا ضايقتهم او حتى ناقشتهم ، لكن متضايقه من كلام ام نياف واسلوبها اللي حطم ميعاد

رجعت ام السيف بيتها وكان السيف جالس ومشتته تفكيره يحب ميعاد ومن صادف عيونها وهي ماراحت من باله وخايف من شعور انها ترده وترفضه وانها تخضع لكلام خوالها وتاخذ نياف
لمح امه تمشي ومتوجهه له نطق بحب:-
يامرحبا يام سياف اشوفك طولتي عند ليلى وجايتنا والابتسامه ماتفارق وجهك
ام السيف:- ياولدي خلني انا سعيده ميعاد فسخت خطوبتها من نياف والله اني من دريت والجمره اللي بقلبي تبرد ميعاد حنونه ورهيفه كثيره على هالنياف كثيره يوليدي عسى ربي يرزقها باللي اطيب منه

فز السيف ونطق ب ابتسامه :- يمه انا ابي اخطب ميعاد
ام السيف بحده:- وخر عني ماهو وقت مزحك
السيف:- يمه والله اني ابيها تكفين يايمه اخطبيها لي
ام السيف:- ياولدي ميعاد هاللحين مصدومه من نياف وتصرفاته ومعاد تثق ب احد لا تعلق روحك فيها
السيف بتنهيده:- يايمه روحي تعلقت بها من يوم واجهتها وصادفت عيوني عيونها من بعد هذيك الليله وانا اهوجس بها طلبتك يايمه لاتروح من يديني
بكت ام السيف من عمق شعورها لان ميعاد تعني لها الكثير وتشوفها مثل بنتها ، وهي واثقه ان السيف بيكون القلب الحنون اللي يحتويها لانه حنون ومايحب يضايق او يزعل احد صحيح انه عصبي لكن حنيته تغلبه
مسحت على شعره ونطقت:- اصبر ياولدي لو كلمتها هالفتره بتردك لانها تحت تاثير صدمتها لكن اوعدك اني اخطبها لك
السيف غمز لانه ونطق ب ابتسامه:- استعجلي اذا ودك تشوفين بهاج الصغير ومن ميعاد
ابتسمت ام السيف ودعت بكل حب :- يارب انك تكتبها من نصيبه وتجمع قلوبهم على خير
ورحت لغرفتها تنام
بينما السيف جلس بالحوش يحس روحه خفيفه بعد الكلام اللي قالته له امه وصار يفكر بميعاد وكيف انها بتصير زوجته وتشاركه ايامها كله تذكر عيونها الحزينه ونطق:-
"بشتري حزنك لا ضاقت الدنيا عليك
‏و ابيع روحي لجل فرحة عيونك "