الصباح صحت ميعاد على صوت غاليه وهي تبكي
فزت بخوف وراحت لها
ميعاد:- شفيك ياغاليه وش صاير ؟
غاليه بدموع:- ميعاد تكفين خلينا نأجل الروحه مابغى اعمامي ما ابغاهم هالوقت تكفين اجليها بعد العيد
ميعاد حضنت غاليه وهي تتفهم شعورها وتبادلها نفس الحزن لان بيت اعمامهم مليان ذكريات ابوهم ومواقفهم الحلوه معه همست بحزن:- ماراح نروح بس امسحي دموعك لاتشوفك امي وتتضايق
نزلت ميعاد تحت عند امها وشافتها متضايقه
ميعاد ب ابتسامه :- شفيها ام ميعاد زعلانه؟
ليلى:- ضايق صدري عليكم ماودي تسافرون ويخلى علي البيت والله ان العيد بدونكم مايسوى
ميعاد:- افرحي يمه ميعادك وغلاك بيجلسون عندك هالعيد!
ليلى ب فرح :- عسى الله يخليكم لي يابهجة اعيادي وعسى ربي يخليكم لي واشوف عيالكم حوالينكم
غاليه بمحارش:- امين يارب تشوفين جسار الصغير يخرب عليك
ميعاد نزلت راسها وفكرت في موضوع السيف وكيف انها ماتقدر تبعد عن الديره هذي الفتره وبتضغط عليها امها لين ماتوافق عليه...
ليلى:- ميعاد يا امي شفيك زعلانه ومتضايقه
ميعاد:- لايمه مافيني شي ماودك نروح لجدي ؟
ليلى:- عاد توه متصل علي يقولون مشتاق للبنات
غاليه:- ياحبيبي هو الله لايحرمنا منه والله انه احن شخص واجهته ب هالدنياء
ابتسمت ليلى بحب وهي تشوف كيف بناتها يحبون ابوها وكيف ابوها يبادلهم الحب ودائماً يسال عنهم ويهتم لامرهم
اتجهت ليلى لاهلها وميعاد وغاليه قررو يجهزون الحلا والقهوه ويلحقون امهم
ليلى :- يبه وشرايك في السيف ابن بهاج ؟
ابو سطام :- ونعم الرجل يابوك والله ماقد دخلت المسجد الا وهو قدامي واخلاقه كلن يشهد له بحسنها
ليلى ابتسمت وارتحت لكلام ابوها
ابو سطام:- ليه تسالين يابنيتي لاتخافين على سلمان دامه معه الولد الصالح ماينخاف من قربه
ليلى:- لايايبه ماسالت عشانه رفيق سلمان السيف كلمتني امه وقالت انها تبي تخطب له ميعاد وانا جيت انشدك واشاورك عنه وانت تخبر ان ميعاد ابوها ماهوب موجود وانت بحسبة ابوها سلمان صغير ولا يدري عن هالامور وماجد صاد ولايعرف السيف ولا يشوفه الا من حين ل حين
ابو سطام ب ابتسامه:- والله انه من خيرة الرجال وتستاهله ميعاد وتطمني يابوك هالولد يشهدون له هل الديره كلهم ويكفيك انه ولدن لبهاح
دخلت ام سطام عليهم وهي سمعت بعض الكلام
وتجهل الخطبه نطقت بهدوء:- وش لك بالرجال يوم تنشدين عنه يابنيتي
ليلى :- السيف يايمه خطب ميعاد بنتي
ام سطام :- وحنا ماعندنا بنت للزواج وقولي لهم ميعاد لنياف وهالامر منتهين منه
ابو سطام:- يام سطام هذا الامر بين ليلى وبنتها انتي مالك ومالهم
ليلى:- يايمه ميعاد ماتبي نياف والبنت ردته وماني حابرتها عليه وهذا الموضوع خلصنا منه
ابو سطام :- هذا الصحيح ربي ماكتبهم لبعض
ام سطام:- والله ماتاخذه ياليلى ولا تكسرين كلامي انتي وبنتك السيف مايصلح لها وانا بكلمها فالموضوع بيني وبينها
ليلى :- يايمه لاتضغطين عليها كافيها اللي جاها منك
ام سطام ب ابتسامه:- معليك انا بكلمها ومايصير الا اللي هي تبيه وهذا وعد مني
اتجهت الجده لبيت ليلى وهي معصبه وثايره عليهم وحالفه انها تهدد ميعاد وتجبرها انها ترفض السيف
الجده :- وش بينك وبين السيف يا ميعاد ؟
ميعاد بقهر:- بيني وبين خطبه على سنه الله ورسوله
الجده:- الخطبه يا ميعاد ماجت الا بعد شي مايرضي الله
ميعاد:- ان كانكم متعودين على الردى لاتحسبوني مثلكم
الجده بعصبيه وحده :- اسمعيني يا ميعاد ان وافقتي عليه والله اني ل اقول اني شايفته معها وانك رادة نياف عشانه
ميعاد سكتت بقهر من تفكير جدتها وشكها فيها وتهديدها قربت من الجده ونطقت بحده:-
سوي اللي تبين والسيف باخذه واذا مار ضيتي ترضيك الايام وماني مجبوره اعيش ف الدنياء عشان رضاك وتعرفين ان ميعاد ماتقول الشي الا وتسويه
الجده :- تعودتي يابنت جسار على كسر كلامي وصرتي تسوين الشي اللي ما ابيه عشان تفرضين رايك
ميعاد:- ما فرضت رأيي الا على حياتي ومحد له الحق يتدخل فيني انا كبيره وافهم واعرف كل شي حولي
الجده:- بنشوف كيف تاخذينه ومن اللي بيمشي رأيه
تنكدت ميعاد من كلام جدتها وقررت تكلم امها وتعلمها بموافقتها من السيف وانها استخارت وارتاحت له
أنت تقرأ
في كل حزة لك مع البال ميعاد
Romanceانا" ميعاد بنت جسار " بطلة هذي الروايه عشت معاناه ايام وسنين واختصرتها لكم , عشت ايام عمري على تلك الامنيه : "وهي ان أكون جريئة لإني جداً أكره الخجل وأنا طبعي خجوله " لكن الحياه جعلتني قويه وجريئة .. وجود السيف بحياتي كان اقوى دافع لي للقوه : عل...
