الساعه10 الصباح صحت ميعاد رايقه بعد نومه حنونه من كلام السيف وتقويته لهاا ابتسمت بحب وقررت تنزل ل امها وتصبح عليها وتجلس معها وهي فعلاً فاقده هذي الجلسه توجهت لامها وابتسمت بحنيه من شافتها جالسه مع ام سطام والقهوه تتوسطهم تقدمت وباست رأس جدتها بحب: صبحك الله بالخير ياحبيبه ميعاد
ام سطام بحنيه:- يااامرحبا ب امي تو ماتبارك يومي ياحبيبتي
تقدمت من ليلى وباست راسها وقالت:- ام ميعاد اليوم رايقه ومبسوطه عسى خير
ليلى بحب:- وشلون ما اكون رايقه وانا اشوف حبيبتي مبتسمه ونازله تتقهوى معي قهوه الضحى نزلت راسها بهدوء فقدناك ياميعاد فقدنا ضحكتك وسوالفك!
ميعاد بهدوء وابتسامه:- اسفه يايمه اوعدك ل اكون لك ميعاد اللي تحوم حولك وتطفشك
كملو جلستهم بحنيه وحب وسوالف وبدت ميعاد تتقبل الحياه بعد وفاة جدها
بعد العصر طلعت ميعاد متوجهه للبقاله ووقفها صوت نياف وهو يقول:- اليوم ب انهي حياتك مع السيف يابنت جسار والله ل اقلب راسه عليك
نطقت ميعاد بكل غرور وكبرياء :- سو اللي ودك
انقهر نياف من رد ميعاد وغرورها اللي مهما حاول يكسره الا انه يفشل
المغرب كان السيف مبسوط لان ميعاد وافقت ان يتواصل معها ب الرسائل وهذا الشي بالنسبه له اعظم شي قدمته له ميعاد لانه يعرف بغرورها وتمسكها بعادات الديره تنهد ب ابتسامه من تذكر قوتها وغرورها وقف من لمح زول نياف متوجه له
تنهد بضيق ولف عنه ماوده ب المشاكل
نياف بنرفزه:- لاتصد عن مقابل الرجال ياولد بهاج
السيف بضحكه:- ما اعدك من الرجال يابن سطام
نياف:- جاي ابي اقولك كلام كود انك تصحصح
السيف بنرفزه:- مابيني وبينك كلام يانياف ابعد عني
نياف بضحكه :- لا تعشم يالسيف ولا ترفع سقف امالك بنت جسار ماودها بك وافقت عليك لجل تبتعد عني
السيف شد ياقه نياف بقهر وعصبيه:- بنت جسار ماتجيب طاريها على لسانك يولد سطام !
نياف وهي يبعد عنه:- الايام بتثبت لك ولو ان بقلبها حب لك وافقت على العرس ! مثل ما المها وافقت على سياف
ابتعد السيف بحقد وهو دخله الشك في ميعاد وخاف يكون كلام نياف صح لان ميعاد دايم وهي تعصب من موضوع تقديم الزواج ركب السياره بكل عصبيه وحرقه ويحاول يبعد الشكوك عنه
اتصل على ميعاد بضيق وهو ناوي يشوف هل نياف صادق بكلامه او وده يبعده عنه!
السيف بضيق :- السلام عليكم ابغاك بموضوع يحدد مصير ايامنا
ميعاد بخوف :-وعليكم السلام ورحمه الله وشعندك يالسيف وهي حاسه ان نياف سوا اللي هددها به
السيف :- ابي اعرف وشهوله ترفضين زواجك مني ؟
ميعاد بنرفزه:- انا بيني وبينك شرط ودراستي اولى من الزواج وطاريه
السيف بحده :- ميعاد دراستك ماراح يضرك فيها شي وانا معك
ميعاد: وش قايل لك نياف؟
السيف وهو ضايق ومعصب :- وانتي وشعرفك بكلام نياف!
ميعاد بتمثيل الهدوء :- جاء العصر وهددني فيك ! وكان تهديده صادق بكلمه منه خلنك تجيني شايش!
السيف بحده:- هالنياف تمادى وبزياده كيف يجي ويكلمك بالطريقه هذي !
قفلت ميعاد منه وهي شايشه ومعصبه ليه يفكر فيها كذا ؟ وليه يسمح ل نياف يتدخل في علاقتهم تنهدت بضيق وقالت :-
كل ماقلت زانت عيت انها تزين
ياصوادف عمري وش به ماجرى؟
اتجهت لسريرها تهرب للنوم وتبتعد عن كل شي يشغل بالها لانها ماعاد فيها طاقه صبر ولا تحمل
عند السيف اتجهت للبر يطلع غضبه كله وهو ضايق من نفسه كيف سمح ل نياف يدخل بحياته وكيف لامسه الشك في ميعاده تنهد بضيق وقرر انه يبتعد هذي الفتره عن الديره لانه خجلان يقابل سلمان ويخاف لو درا عن موضوعه مع ميعاد
يوم الخميس العصر عند ام السيف كانت ضايقه من عزلة السيف اللي تدري ان وراها ضيقه وعصبيه وموضوع مشغله خافت تكون ميعاد لها يد بالموضوع لانها لامست الضيق بعيونها ودايم تحاول تبعد طاري السيف عنها قررت تبعد شكوكها وتروح تسالها بهدوء عشان توصل لحل لبست عبايتها واتجهت لبيت ليلى وكانت تدري ان ليلى وسلطانه وام سطام رايحين السوق يتجهزون لزواج المها ومتاكده مافيه احد بيستقبلها الا ميعاد وهذي فرصتها
دخلت ام السيف البيت وبدت تنادي :- ميعاد ي امي وينك
ميعاد بضيق :- هلا ياخاله تفضلي نورتي البيت
ام السيف:- النور نورك يابنيتي
جلست ام السيف وضيفتها ميعاد بالقهوه والحلا والشاهي والمكسرات
ام السيف بحزن:- وش بينك وبين السيف يابنيتي
ميعاد وهي تخفي عتبها :- مابينا الا كُل خير
ام السيف:- بس السيف له يومين مختفي وبالبر ومايسوي كذا الا وهو ضايق وانتي لك يومين ووضعك ضايق وزعلانه
تنهدت ميعاد تخفي دموعها:- السيف اللي بغيته يحميني من عوق الحياه طعني ب شكوكه فيني
فزت ام السيف بدموع وحضنت ميعاد :- ماعاش من يطعنك يابنيتي وش صاير
قالت لها ميعاد الموضوع بكل ضيق ودموع وشدت على حضنها من قالت ام السيف:- حسبي الله عليك ياولدي ! تنزل دموع بنيتي اللي حلفت انها ماتنزل الا من فرح
ميعاد تنهدت وقالت:- ماصار الا كل خير ياخاله ولا تشيلين هم
طلعت ام السيف من ميعاد وهي ضايقه من دموعها وقررت تنتظر السيف يجي وتبدا تقوله الموضوع وتعب ميعاد وقررت انها تقرص اذنه على الشي اللي سواه ..
عند السيف كان جالس قدام النار بضياع وتشتت وهو يحاول يبتعد عن ميعاد والتفكير فيها لكن فشلت محاولته كلها ونطق:- غلاك ما يمحيه قل المواصيل
"في كل حزة لك مع البال ميعاد"
أنت تقرأ
في كل حزة لك مع البال ميعاد
Romanceانا" ميعاد بنت جسار " بطلة هذي الروايه عشت معاناه ايام وسنين واختصرتها لكم , عشت ايام عمري على تلك الامنيه : "وهي ان أكون جريئة لإني جداً أكره الخجل وأنا طبعي خجوله " لكن الحياه جعلتني قويه وجريئة .. وجود السيف بحياتي كان اقوى دافع لي للقوه : عل...
