رجعت ام السيف بيتها بفرح تبشر سياف ان المها وافقت عليه
ام السيف:- سياف يولدي المها موافقه
سياف ب ابتسامه :- يبه متى نروح نخطب منهم رسمي
ابو السيف:- يوم الجمعه آن شاء الله
سياف:- يمه قلتي لهم اني مستعجل
ام السيف:- بعد شهرين العرس والملكه مع بعض وشرايك ياوليدي
سياف:- على خير ان شاء الله
ابو السيف:- خير ماخترتو نعم النسب والله
طلعو سياف وابوه يتجهوون للمسجد والسيف بقى يكلم امه عن الموضوع اللي ارسلها ل
السيف:- يمه كلمتي ميعاد عن زواجي مع سياف
ام السيف تنهدت بضيق:- رفضت ياولدي تقول دراستي مادونها شي
السيف:- والمها وافقت على سياف وماحطت الدراسه عذر
ام السيف:- ياولدي المها لها سنه من خلصت من دراستها
السيف :-وش قلتي لها انتي يمه
ام السيف:- يولدي كلمت ليلى وقلت بنحط عرس السيف مع اخوه
السيف:- يايمه وشهوله ترفض ماعاد باقي الا سنه وانا معها بالديره
ام السيف:- والبنت كلمتها وهذا رايها يالسيف
السيف:- يمه انا بكلمها
ام السيف:- يولد بهاج ارفع علمك ماعندنا هالامر
السيف بضيق :- اتصلي عليها وعطيني تكفين يمه
ام السيف:- بستاذنها وان وافقت خير على خير
اتصلت ام السيف على ميعاد وهي ضايقه من الشي اللي طلبه منها ولدها
ام السيف:- سلام يابنيتي كيفك
ميعاد بحنيه:- ياهلا ياخاله حمدلله كيفك انتي
ام السيف:-يابنيتي ابيك بموضوع ولاتزعلين مني
ميعاد بتوتر :- لبيه قولي اللي ودك والله لايجيب الزعل
ام السيف:- ولدي السيف يبي يكلمك وقلت بستاذنها وهو جنبي ويسمع اللحين
ميعاد بحده:- مابينا مواضيع ياخاله ان كان وده بشي سلمان وماجد موجودين
ام السيف :- من حقك يابنيتي من حقك
السيف :- اخذ شماغه وطلع من البيت وهو معصب وضايق من هالعناد اللي في ميعاد
ونطق:- عنيده يابنت جسار وعناد قوي علي اتجهه للبر يفرغ ضيقه وزعله بعيد عن الناس لجل مايجرح احد
جلس قدام النار ونطق :
- " حبيبتي فيها غرور و عنيده "
ما عمرها قامت لحاجه وطاحت
حتّى الكلام ان قالته ما تعيده!
ابتسم بحب وهو مايقدر يخفي حبها لذاتها ونرجسيتها وعنادها وقوتها
عند ميعاد كانت جالسه بالغرفه وهي ضايقه خافت تكون زعل منها او جرحت خالتها ام السيف تنهدت بضيق:-
اف ياميعاد كل ماقلتي زانت لك طحتي مصيبه ثانيه
دخلت ليلى عليها واستغربت هدؤوها وزعلها ونطقت
ليلى:- ميعاد يا امي شفيك ضايقه وزعلانه
ميعاد:- مافيني شي يمه بس احس بصداع وقلت ارتاح
ليلى:- بسم الله عليك يابنيتي من وش وش مزعلك
ميعاد بحب:- انا بخير ياحبيبتي ارهاق بسيط
طلعت ليلى من عند ميعاد وهمست :- استودعتك الله يابنيتي
بالحوش كانو الكل متجمعين ومبسوطين لكن تنقصهم ميعاد وسوالفها
ابو سطام:- وينها ميعاد ماشفتها الليله
ليلى:- يبه تعبانه شوي يمكن رجع لها صداعها
سلطانه بخوف:- وتركتيها لحالها ياليلى
ليلى:- رفضت اني اقعد معها وتقول انها بتنام
ابو سطام:- بنتك ياليلى عنيده عنيده بالحيل
محمد ب ابتسامه:- يليق بها العناد يايبه
كملو سهرتهم بالحوش وجلستهم اللين انتصف الليل وكانو مايجهلون تعب الجد اللي يخفيه ولكن يبغون يبعدون الافكار عنهم واتجهو لغرفهم ينامون بعد يوم سعيد
عند السيف رجع للبيت وهو اقتنع ان ميعاد معها حق لانها صغيره وماراح تكون قد مسؤوليه بيت وزوج ودراسه
دخل ولقى امه تنتظره تقدم وباس راسها ونطق:- ليه مانمتي يابعد دنياي
ام السيف:- مايغفى لي جفن ووليدي ضايق
السيف بحب:- يايمه مانيب ضايق ومن حق ميعاد ترفض
اتجهو لغرفهم ونامو بكل هدوء
ابو سطام:- ياسلطانه كلمني ابو سياف وقال انه بيجي الليله لجل يخطب المها لولده سياف
سالم:- سياف الدكتور يبه
ابو سطام:- ايه ياولدي وش قولك فيه
سالم:- ونعم الرجل يايبه رافع راس اهل الديره كلها مايحتاج قولي
سطام بفرح:- تستاهل المها ويليق بها الدكتور وتليق به هي
محمد وهو يغمز لابوه:- يبه كلن اعرس الا انا ماودك تشوف ولدي يلعب حولك
ابو سطام:- اخلص من دراستك وابشر بالعرس
ام سطام :- ماني مزوجتك يامحمد ودك يقولون اني عجوز واصغر عيال تزوج لا والله ماصارت
ضحكو كلهم بحب من كلام امهم اللي دايم تحب تكون صغيره وماتحب احد يشوفها جده او كبيره بالعمر
الساعه 6 المغرب كانو بهاج وعياله متوسطين مجلس ابو سطام وريحه العود والقهوه ماليه اركان المجلس وترحيب ابو سطام ماوقف
انتهت الخطوبه على خير وكانت خطوبه بس والزواج والعقد بعد شهرين لاجل تستعد المها وتتجهز
بعد صلاة العشاء كانو مجتعمين بالحوش ابو السيف وابو سطام وعيالهم حوالينهم وتتوسطهم النار
ابو سطام:- سطام ياولدي انتبه على اخوانك بعد راسي
سطام بحزن:- بعد عمر طويل يايبه عسى مانعيش يوم بدونك
ابو السيف:- يابو سطام هالكلام ماله داعي
ابو سطام:- ياولدي انا ماعاد باقي لي من العمر كثر ماراح
محمد فزو وباس راس ابوه ونطق:- يايبه والله مانعيش بدنياء مانت فيها ولا تفاؤل على نفسك
ابو سطام تنهد بضيق وهو يحس ان ايامه قليله وماوده يشوف هالحزن والضيق بعياله
ب طرف بالحوش كانت ميعاد سرحانه ومتجهه لبيت جدها لكن حست ان رجولها ماتشيلها بعد ماسمعت كلام ابو سطام وضاقت بها دنياها كلها ورجعت بيتهم بكل ضيق ودموع
ميعاد على سجادتها:- يارب لاتذوقني مرارة اليتم مرتيين يارب انه كان عوض لي عن ابوي طول لي بعمره
بكت بكل شعور وحرقه واتجهت لسريرها بكل انكسار وضيق
أنت تقرأ
في كل حزة لك مع البال ميعاد
Romanceانا" ميعاد بنت جسار " بطلة هذي الروايه عشت معاناه ايام وسنين واختصرتها لكم , عشت ايام عمري على تلك الامنيه : "وهي ان أكون جريئة لإني جداً أكره الخجل وأنا طبعي خجوله " لكن الحياه جعلتني قويه وجريئة .. وجود السيف بحياتي كان اقوى دافع لي للقوه : عل...
