طلاق
الكلمه تخوف .. ولما بتشوفها بتفكر في الف حاجه كان مش اكثر ..
اللي أطلقت هل هي نظيفه؟ ..
اللي أطلقت هل هي مظلومه؟
اللي أطلقت هل هي ظالمه؟
+ مرات تكون مظلومه وظلمت حد في جرتها.
الطلاق مرات يكون منفذ واسع يريح هلبا نفسيات من وراه
ومرات يكون العكس
الطلاق مرات يكون الحل الأنسب اللي بينقص الحاله النفسيه اللي بتتكون من المشاكل مستقبلاً في اي عيله
وللأسف مجتمعنا ميتقبلهاش لأنهم بيجاوبوك على أول ثلاته اسئله سألتهم انا اهما اللي فوق ..
-اللي أطلقت وحده مش تمام ..
-ووه عليها سيبت سربط صغار وراها ...
- مسكينه كانت متحملاته بالسيف ..
- كان صبرت شوي وتحملت على خاطر صغارها
- يطلعوا عليها كلام عمره ما صار ..
- اللي شاد عنده حاجه عليها يقولها..
الطلاق ظلم .. رغم انه حل
ظلم للشخص اللي اطلق
وظلم للي قعدوا في وسط اللي أطلقوا
وظلم في حالة انه مصارش منه.
مجتمعنا واعر .. واعر هلبا وكل شيء عيب ومعبي عيوب عندهم..
مش حانوسع الكلام اكثر..
في اللي بتقول يا ريتهم ما أطلقوا لأنهم دمروا..
وفي اللي بتقول يا ريتهم أطلقوا لأنهم دمروا..
مش حاتفهموا كلامي هاده الا لما تغوصوا معاي في أعماق روايتي ..
القصه مدورش على الطلاق بس ..
بتلقوا على اثاره الجانبيه ..
وبتلقوا شوي قصص جانبيه ..
اكثر العقد النفسيه اللي بتخلي اي شخص يغلط .. بيكون اول وأقوى سبب ليهم عيلتك ..
انا منقولكش اقعد عدو عيلتك لا!!
انت حاتتأثر بعيلتك ..
كان حد تلاقيت معاه في الشارع قالك انت فاشل مش حاتتأثر..
لكن كان شخص متربي وانت تقوله بوي .. امي خوي اختي قالهلك اكيده بتتأثر! وهلباا!!
قوي روحك وطلع روحك ومتخليش عقدك النفسيه مدفونه .. عالج نفسك .. غير نفسيتك ..
بالقرآن طبعاً ..
الروايه من صنع خيالي .. الشخصيات ليست حقيقيه والقصص اغلبها حقيقيه بس طبعاً مغيره فيهم باش يتماشوا مع الشخصيات ...
