حق المظلوم⅓

الأخير

سبحان الله وبحمده سبحان الله العظيم.

لا إله إلا أنت سبحانك اني كنت من الظالمين.

.

ايمن حتى الدم اللي في وجها جف عليه..

اول ما خش ل شقته ارتمي على الصالون وهو غارق في تفكيره ..

يبي يطمن عليها .. خليل زاده .. عرف ان في شي كبير صايرلها ..

قام نقاله من جنبه وشاف الساعه .. بيصبر هالساعه وبيتصل بسكينه ..

ناض خش للحمام دوش وطلع لبس وصلى الفجر..

بعد كمل من صلاته وقف ...

نزل ل سيارته خدي اللابتوب ورد ركب فتحه وقعد يخدم ..

وفاتوا ساعتين واتصل ب سكينه ..

سكينه اللي كانت في الكوجينه شافت ل نقالها خداته ورد لما لقاته ايمن..

سكينه: ايمن صباح الخير .. كيف حالك اليوم..

ايمن: صباح النور كيف حالك انتي؟

سكينه معجبهاش صوت خوها: الحمدلله .. خيرك ايمن صايرلك شيء؟

ايمن: انتم صاير شيء عندكم .. تقوى كذبت عليا.. ولا؟ ..

سكينه سكتت.. تقوى كلمتها في الليل وهي تبكي .. وقالتلها ايمن سألني على هبه .. وقلتله هبه كويسه ..

سكينه: اي كذبت عليك..

ايمن قلبه زاد قبضه: شن صايرلها ..

سكينه: هو الموضوع فات سوء التغديه .. قبل فتره اغمى عليها ورفعها عمي مفتاح للمستشفى .. ومن يومها وهي معش صحت .. حتى خليل رفعها لأكثر من مستشفى .. وقاعده في ضعفها .. وزنها نازل هلبا وقاعدين يحاولوا يردو دمها ووزنها للطبيعي..

ايمن قعد ساكت .. يسمع ويتقطع وهو ساكت ..

سكينه: خليل تأثر هلبا .. قبل مش راد ل قطر .. غر محمد غصبه ..

سكينه كملت كلامها: الإنسان .. المفروض ميهلكش روحه يا أيمن.. الإنسان لازم يكون اناني في شوي حاجات ..

ايمن: وانا أكبر اناني يا اختي .. واحد منحط وديما مخرب كل شيء .. انا كيف مزال بنقدر نشوف لوجهي. .. كيف مزال بنعيش .. انا معش نقدر .. ندعي في ربي كل يوم باش نموت ونتريح منه العذاب هاده .. كل يوم .. كل ساعه كل دقيقه كل لحظه وهي متمشيش من بالي.. انا درت اكبر مخاوفي.. انا حققتهم .. قربي وبعدي دمار ليها .. قربي وبعدي يا سكينه ..