سبحان الله وبحمده سبحان الله العظيم ..
.
فارس كان مقعمز في القهوه ويشوف ل طاسة الشاهي اللي في ايده ..
شاهي خفيف .. زي ما يحبه ..
شرب منه شوي وشاف للي جي .. وكان الشخص المطلوب..
عمران سلم على فارس وقعمز ..
عمران: ان شاء الله خير يا فارس ..قلتلي موضوع ميتأجلش؟؟
فارس: اشرب قهوه ونطلعوا نتكلموا برا .. منبيش حد يسمع
عمران: نوض توا معناها ..
فراس هز براسه ووقف ..
وقف عمران وطلعوا هما التنين...
كان في كرسي خشبي بعيد على القهوه في حديقه صغيره يلعبوا فيها الصغار ..
قعمز عمران وقعمز جنبه فارس..
فارس: علاش سيبتها؟
عمران استغرب..
فارس: مروه .. علاش سيبتها؟
عمران سكت .. معرفش شن يقول!.. مفهمش .. كيف فارس هادي ..
فارس شافله: عاطي وعد .. كمهاده راني قتلتك يا عمران .. انا شخص بايع دنيتي واخرتي .. اي حد يمس خواتي مش حانحسب شيء وبنقتله .. انت كلمتها .. وخنت صاحبك .. وبعدين سيبتها وكأنك كنت تتسلى بيها ..
عمران: مكنتش نتسلى بيها .. انا شخص مبتعد على المحرمات .. وكسرت القاعده هادي معاها .. كلمتها .. ولأني عارفها عندها عقد .. سايرتها هلبا .. بس هي اللي رفضتني وسيبتني مش انا ... اختك غريبه لدرجة ان الولد اللي يحبها قاللها بنبعت اماليا باش يخطبوك .. رفضت وكأنه الزواج مرض بالنسبالها .. انا تحديت العقد اللي انا فيهم .. وغيرت هلبا شيء في عقلي .. غيرتهالي هي .. وتجاوزت عقدتي مع الزواج ورغبت بيها هي .. بس اختك صكرتها قبل ما تفتح .. عاملتها زي صديقتي ... عاملتها بحدود كبيره .. تجاوزت عقدتي في الزواج وهي لا.. قاعده غارقه في عقدها النفسيه..
فارس: انت متعرفش هي ب شن مرت ..
عمران: وانت متعرفش انا ب شن مريت ..
فارس ابتسم بهزوه: امك تحبس فيك ايام في دار مظلمه بدون اي شيء معاك؟؟
عمران: امي أطلقت .. وحكمت عليا بالحرمان من كل شيء .. امي معش شافت لوجهي .. وحتى بوي .. مفيش شيء أصعب من انك تفقدهم الزوز في نفس الوقت وهما عايشين وتلقى روحك وسط الناس اللي هما خوتك وامهاتهم زي العاله والحمل..
