- تعرفي؟ .. مش دايما الابتلاءات بتكون حسد .. ولا حتى ذنوب. ممكن تبقي إننا لم نشكر النعمة!
دايما كان عندي مشكلة إني بعد أي حاجة كويسة بتحصلي بعيش فترة سيئة جدا .. سواء بقي كان مرض كان ابتلاء أو حتى ضيق ف النفس والحزن الغير مبرر .. والاقي تعاملي مع الفترة دي سيء جدا جدا لا صابرة علي ابتلاء ولا قادرة أقاوم حاجة
لحد ما نبهتني صديقة بارك الله فيها لقوله عز وجل (لئن شكرتم لازيدنكم ولئن كفرتم إن عذابي لشديد) وإن كل الي أنا فيه دة وارد يبقي قلة شكري على أي نعمة في حياتي
ف أنا ما شكرتش نعمة الصحة كويس ف بمرض ، ما شكرتش نعمة التوفيق لأمر معين ف يتم سلبه مني ..
والحقيقة قلة الشكر في حياتنا -غفر الله لنا- بتتمثل في صور كتيرة أوي منها..
١) الامتنان للأشخاص والظروف والمواقف ونسيان أمر إن دة توفيق من الله ورزق .. ف أنا ممتنة جدا لفلانة ع وقفتها معايا متناسية أن الله عز وجل هو الي وضعها في طريقي، هو الي جعلني أفكر فيها ورزقها الهمة في قضاء حاجتي .. ممتنة للظروف والصدفة و و الي خلتني آخد فرصة معينة ومش واخد بالي إن (إنا كل شيء خلقناه بقدر)
٢) أنك ممكن تاخد بالك من أمر الرزق وتبقى ممتن جدا لقدر الله عز وجل وتوفيقه، وتنسى تشكره برضه! .. عارف الإيموجي دة (🥹) تبقى منبهر كدة من ازاااي ربنا رحيم بيك ورزقك كذا وكذا ومع ذلك لا تحمده! ولا تطيل الثناء عليه
٣) الحمد بدون تفكير .. والحمد أصلا في يومنا كثير ف بقي روتين ، ٣٣ الحمد لله بعد كل صلاة، ف بداية سورة الفاتحة ف كل ركعة ، حد بيسألك عامل ايه تقوله الحمد لله وأنت بجد مش بتحمده!
٤) ودي أسوأ صورة .. الذنب بعد النعمة! ، أو استخدام النعمة نفسها في ذنب ، دي أسوأ نسخة من ردة فعل عبد يجب أن يشكر ربه على نعمه ..
وخليني بجد أأكد إنك هتعيش أصعب سيناريو ف حياتك بعد النعم والأقدار الحلوة لو ما بتعرفش تشكر ربنا
ممكن ترجع من عمرة/حج وتعمل ذنوب وتبقى شخص سيء جدا عشان بس ما شكرتش نعمة أن ربنا رزقك إياها
ممكن تختمي القرآن وتنسيه تماما أو تعملي ذنوب عشان بس ما شكرتيش نعمة الختمة
ممكن تُسلب فرحتك بعد أي إنجاز، ممكن تُسلب صبرك لو حصلك أي ابتلاء بعد الفرحة عشان إنت ماكنتش شاكر كويس ف مش هتبقي صابر كويس ..
كل دي مواطن لا يرضاها الله عز وجل لك أبدا .. والله عز وجل كريم ، خلينا متفقين أنه (لا نحصي ثناءا عليك) يعني احنا المفروض بعد ما نحمد الله عز وجل نستغفر عشان الحمد دة مش كافي بس ربنا وعدك أنه هيزيدك .. هيزيدك بعد شكرك الي مش كافي على نعمة إنت أصلا لا تستحقها ..! كريم سبحانه
**اشكر ربنا ازاي؟
١) اتعلم عنه .. اتعلم شرح أسماء الله الحسنى عشان لما تلاقي نفسك بقيت كويس بعد الابتلاء تعرف إن دة اسم الله (الجبار) مش عشان إنت استرونج وكدة ، عشان تعرف إن ربنا اسمه (الخبير) ف سخرلك حاجة تنفعك وعلى مقاسك بالظبط ف دة مش بشطارتك ولا عشان حد بيدعمك و و
٢) اكتب النعم واقعد اعصر دماغك وافتكر النعم الي ف حياتك ، شوف حدث مهم ف حياتك أو شخص مهم وشوف ازاي ربنا سخرهولك بغير حول منك ولا قوة تماما ، احمد ربنا على اختيار الوقت المناسب ليك لحاجة معينة، احمده على كل موقف وكل شخص وكل لحظه
تفكر في مخلوقاته والمواقف الي شوفتها في صحابك.. يستحق أن يُحمد اي والله 🤍
