ف ناس هتدخل الجنه غصب عنها !!
لازم تفهم إن ربنا مش ضدك ، مش ضد سعادتك ، مش عدو عشان تخاف من أقداره وتحس إنه ممكن مايكتبلكش اللي نفسك فيه !!
بالعكس. كل أقدار الله خير.. كلها حرفياً بغض النظر عن ظاهرها..
يعنى وفاة الغاليين عليك ممكن تكون هي اللحظة اللي إتسببت في دخولك الجنة ، بصبرك وثباتك أو حتى ألمك!
الشغل الي كنت بتحلم بيه وشوفته فرصة عُمر وضاعت عليك ، جايز كان هيأثر على نفسيتك ، جايز كنت هتتغير فيه للأسوء جايز ربنا هيعوّضك بشغل تقدر تكسب منه ثواب فتبقى بتشتغل للدنيا والآخرة !!
الشخص الي كنت بتحلم تكمل حياتك معاه جايز يكون مكتوبله يتغيّر للأسوء ، أو هيكون أب ... أم سيء لأطفالك
جايز حتى يكون مكتوبله يتوفى صغير وربنا بيحميك من عذاب الفراق ده بفراق أهون شوية !!
مع كل مِحنة وابتلاء فيه حكمة ، فيه سبب قوي ومنطقي ، لكنه خفي.. ربنا بيكتبلنا الخير بس احنا إللى بقينا منطقين زيادة عن اللازم وبندور على تبرير لكل حاجه ...الدعوة وتحقيقها والقدر وتنظيمه مسؤل عنه إللى خلقلك فثق فيه واتاكد انه لو مالكش خير فى اى حاجه بتحصل فكان زمان عمرك انتهى ...وخليك عارف انك مش حمل انك تقول ياريت دعوتى ما كانت استجابت !!
تعرف ان في ناس هتدخل الجنه غصب عنها اه غصب عنها متستغربش !!
الابتلاءات والأمراض واي حاجه تضايقك (شغل مش مظبوط - علاقات وفشلت - ولادك تاعبينك حمل و مسؤليه تقيله عليك) كل الحاجات دي ممكن تكون سبب ان تدخل الجنه بالعافيه !!
قال النبي صلي الله عليه وسلم (عَجِبَ رَبُّنَا عَزَّ وَجَلَّ مِنْ قَوْمٍ يُقَادُونَ إِلَى الْجَنَّةِ فِي السَّلَاسِلِ) رواه البخاري .. ورد كذا تفسير منها ان اي حاجه الانسان بيُكره عليها ممكن تكون سبب دخوله الجنه !!
وهو ده معنى "يؤجر المرء رغما عن أنفه"
قال تعالى (وجَزَاهُم بِمَا صَبَرُوا جَنَّةً وَحَرِيرًا)
