اللهم صل وسلم وبارك على سيدنا محمد
بقلم/مريم محمد
دولت كانت بتشوف المؤتمر على التلفزيون واتصدمت من اللي آدم عمله ومن تسرعه، عرفت انه وصل القصر فقامت راحتله وداليدا معاها ، دخلت اوضته لقته بيلم في حاجته
دولت : آدم
آدم : لو سمحتوا لو سمحتوا مش عايز اتكلم دلوقتى
دولت : طيب فهمني بس ليه عملت كده ؟ وليه بتلم حاجتك أنت هتروح فين ؟
آدم بعصبية : هروح في أي داهية تاخدني
دولت بوجع : ليه يابني كده حرام عليك ، ايه سبب كل ده ؟
آدم : كله بسببك أنتي وأمي ربنا يسامحكم ، عملتلكم ايه أنا عشان تعملوا فيا كده
دولت بدموع : وهو إحنا عملنا فيك أيه بس ؟
آدم : كتبتوا كل ورثكم باسمي، أمي كتبت كل املاكها باسمي قبل ما تموت وحلفتنى اخدها وحرمت ابويا منها وانتى عملتي زيها وكتبتي كل نصيب ابويا وعمي من فلوسك باسمي وكل ماقولك ارجعلهم فلوسهم تقوليلي هغضب عليك
دولت : وهو إحنا عشان بنأمنلك مستقبلك يبقى كده بنأذيك ؟
آدم زعق بكل وجع : ايوه بتؤذوني ، انتوا عملتوا كده على أساس تأمنوا مستقبلي بس اللي ماتعرفهوش ان ده ولد الكره ناحيتي ، الكل بقى طمعان فيا وفي فلوسي ولو يطولوا يقطعوني حتت وأنا عايش هيعملوا كده ، وأنا مش عايز فلوسكم دي، مش عايز حاجة أنا
دولت سندت على باب الاوضة وسكتت ودموعها بتنزل وداليدا واقفه صعبانه عليها ومش عايزه آدم يلومها كده : أنت ليه بتلومها على حاجة مش في ايدها ؟ هي كانت خايفه عليك وعايزة تحميك وبس ، تعرف منين هي ان كل ده هيحصل ؟
آدم بصلها بغيظ : وانتى ايه دخلك بالموضوع ؟ انتى مين أصلا عشان تتكلمي ؟
داليدا قلبها وجعها من كلامه بس ردت : مش هتفرق أنا مين ، اللي يفرق هو الكلام بغض النظر عن اللي بيقوله
آدم : وانتى مين سمحلك تتكلمي أساسا ؟ بتحشري نفسك لييييه ؟
داليدا : عشان ماينفعش اشوفك بتجرحها كده بالكلام وفي الآخر تاخد بعضك وتهرب، واسكت
آدم اتنرفز ورمى الحاجة اللي كان ماسكها في ايده : وأنا مين يحس بيا وبجروحي ؟ ليه أنا دايما اللي مطلوب منه يستحمل ويسكت ؟ ليه كلهم بيرموا حمولهم عليا وأنا اللي مطلوب مني اسكت واكتم في قلبي ؟ مش بني ادم أنا ولا حيوان ؟ ده لو حيوان كانوا رحموه عن كده ، حتى أنتى عملتي زيهم قولت إنك هتفهميني بس طلعتي زيهم
داليدا الدموع اتجمعت في عينيها : أنت مش فاهم حاجة، قولتلك ماينفعش
آدم بصلها بغيظ ورجع يلم في حاجته بكل نرفزة وهي قعدت على الارض ودموعها بتنزل غصب عنها وهي بتراقبه ، كانت حاسه أنها تايهة في دوامه سودا ، نفسها تقوم تمسك فيه وتقوله ماتمشيش ماتبعدش عني أنا ببقى مطمنه طول مانت موجود بس ماينفعش تعمل كده فسكتت ، غمضت عينيها بحزن وفضلت قاعده على الأرض بصمت
أنت تقرأ
معجزتي بقلم/مريم عبد القادر
Romance" بيقولوا دايما ان اللقاء نصيب .. وان القدر بيجمع الناس حتى لو بينهم بلاد وبلاد " . . بقلم/مريم محمد عبد القادر #ميمووو
