معجزتي بقلم/مريم عبد القادر

الجزء 42

اللهم صل وسلم وبارك على سيدنا محمد
بقلم/مريم محمد

سولاف بصت على الباب وبصت لآدم بصدمة وهو سحبها وراه : لو فاكرين إنكم هتقدورا تاخدوها مني زي جمالات يبقى بتحلموا ، انتوا فاهمين ، أنا هقتلكم قبلها

سولاف شدت آدم جامد لفته ليها : حبيبي في ايه مالك ؟ أنت بتكلم مين ؟

آدم شاور على الباب : دول ، كمال وعاصم ، أهم هنا ، بصي بيضحكوا بشر إزاى ؟ عايزين ياخدوكي مني

سولاف دموعها نزلت ومسكت وشه بين ايديها : آدم مافيش حد هنا ، أنا وأنت لوحدنا في الشقه

آدم بلع ريقه بصعوبة وبص على الباب وبصلها : و ، والله أهم هناك ، انتى ليه مش مصدقاني ؟

اتحرك من مكانه : أنا لازم اخلص منهم قبل مايعملوا فيكي حاجة

سولاف واقفه مش عارفه تتصرف ومصدومه من آدم واللي بيعمله ، سمعت الباب بيخبط وصوت جسار فجريت وفتحت الباب

جسار أول ما شافها استغرب وشها المخطوف وهي قعدت برعب على الارض واتكلمت بصوت مهزوز : جسار ، آدم ، آدم

جسار قلق ودخل الشقه بسرعه ولقى آدم واقف وماسك في ايده سكينه وشكله مش طبيعي ابدا فرفع ايديه قدامه بيحاول يهديه : آدم اهدى ايه اللي أنت بتعمله ده ؟

آدم : جسار أنت جيت ، بص هناك ، كمال وعاصم عايزين ياخدوا سولاف منى زي ماخدوا أمى ، بس لا أنا مش هسمحلهم ابدا

جسار بص حوليه ومالقاش حد في الشقه فقرب من آدم بحذر : ماتخافش ، أنا هخلصك منهم ، هات السكينه دي بس خليني أعرف اتصرف

آدم مد ايده بالسكينة وجسار مسك دراعه شده عليه وخبطه في رقبته جامد افقده الوعي ووقع على الارض

جسار اتنهد : هو في ايه ماله ده ؟

سولاف بعياط : مش عارفه

جسار شال آدم دخله سريره ورن على دكتور وطلب منه يجي بسرعه وقفل معاه : الدكتور جاي كمان شوية

راح وقف قدام باب الشقه وسولاف دخلت غيرت اسدال الصلاة وقعدت جنب آدم

شوية والدكتور وصل وكشف على آدم : كل حاجة طبيعيه

جسار : إزاى ؟ ده كان ماسك سكينه في ايده من شوية وبيقولي في ناس عايزين يخطفوا مراته وماكانش في حد معانا ساعتها اصلا

الدكتور بص لسولاف : ايه اللى حصل بالظبط يا مدام ؟

سولاف حكتله اللي حصل من ساعة ما لقت آدم نايم في الفرندا وبيحلم بكابوس لحد ما جسار وصل

الدكتور : امممم ، دي هلوسات نومية ، هو جوزك بيشرب مخدرات أو كحول أو عنده صرع أو انفصام ؟

سولاف هزت دماغها برفض : لأ خالص مافيش حاجة من دي

الدكتور : يبقى كده الظاهر إنه اتعرض لصدمة كبيرة قبل ماينام أو هو محطوط تحت قلق وأرق مأثر على عقله وده خلا عقله مشوش ودخل الخيال في الواقع ، إحنا المفروض نراقبه لحد ما يصحى ونتأكد انه فايق وعقله شغال كويس ، ولازم تعرفوا ايه المشكلة اللى عملت فيه كده وتحاولوا تحلوها وغالبا ممكن يحتاج لدكتور نفسي يتكلم معاه عشان تعملوا حسابكم