اللهم صل وسلم وبارك على سيدنا محمد
بقلم/مريم محمد
بعد كذا يوم آدم راح لدولت القصر مع سولاف ، طلعوا اوضتها وبعد ماسلموا عليها هي وهند آدم قعد قصاد دولت وحط قدامها ورق كتير وشيك : اتفضلي
دولت : ايه ده ؟
آدم : أملاكك
دولت : آدم أنا
آدم قاطعها : لو سمحتي ، فلوسك أنتى حرة فيها بس معلش ماتدخلنيش أنا في كل ده
دولت : بس
آدم : مابسش يا نانا ، أنا زمان ماكنتش فاهم أنتى ليه عملتي كده وكتبتي فلوسهم باسمي بس سوري أنا مش موافق على ده
دولت : ده حقك ، هما ظلموك
آدم : حقي منين ؟ جبتيها منين لما حد يظلمني أروح اظلمه أنا كمان ؟ ده في شرع مين ده ؟
شاور على الورق في ايديها : ده فيه حق مروان وتمارا ولوجي ، أنا مش ظالم يا نانا ، فلوسك أنا شغلتها كل السنين دي ورجعتهالك بأرباحها اعتبريها كانت صفقة وخلصت وانتى حرة بقى فيها
دولت : انت شايف كده
آدم : أنا مش شايف غير كده يا دولت
دولت هزت دماغها بفهم وسألت بتردد : وفلوس جمالات ؟
آدم بحزن : موجوده يا نانا ، أنا مش بضيع حاجتي ، فلوسه موجوده عايزها ياخدها يشبع بيها أنا مش عايز حاجة منه
دولت : وعهدك مع جمالات ؟
آدم سكت شويه : أكيد هتسامحني أنا كنت صغير ساعتها وكلامي____
دولت قاطعته : كنت مميز
آدم : معاكي حق كنت مميز بس ده مش معناه عشان احافظ على حلفان مش هتحاسب عليه آكل فلوس الناس بالباطل ، أنا بس كنت بعاند وبلفت الإنتباه إنما دلوقتى أنا مش عايز حاجة منهم ، وعموما أنا معايا اللي يكفيني باقي عمري من غير ماحتاج لحد أو حاجة
بص لسولاف وفتح دراعه : تعالي جنبي هنا
سولاف راحت وقفت جنبه وهو مسك ايدها : عندنا خبر حلو ليكم
دولت وهند بصوله وهو أبتسم : سولي حامل
هند زغردت بصوت عالي وآدم : الله أكبر على الصحة ودني يا حجه
هند راحت شدت سولاف وحضنتها جامد ودموعها نزلت : ألف ألف ألف مبروك يا بنتى
سولاف دخلت في حضنها أوي وباست كتفها : الله يبارك فيكي يا ماما ، أنا مبسوطة أوي بجد
هند باست خدها : ربنا يسعدك طول العمر يا حبيبة قلبي ويعوضك أكتر وأكتر
آدم بيبص عليهم وهو مبتسم بحب ومبسوط بالحب ده ، رغم ان مافيش روابط دم بينهم كلهم الا ان الحب بينهم كبير أوي وجميل
أنت تقرأ
معجزتي بقلم/مريم عبد القادر
Romance" بيقولوا دايما ان اللقاء نصيب .. وان القدر بيجمع الناس حتى لو بينهم بلاد وبلاد " . . بقلم/مريم محمد عبد القادر #ميمووو
