السيرة النبوية بالعامية المصرية

زواج النبي ﷺ من السيدة خديجة

أنهاردة النبي ﷺ تحديدًا عنده ٢٥ سنة.. في ريعان شبابه.. أجمل مخلوق خلقه الله هو النبي ﷺ..
بدأ النبي ﷺ  يشتغل في التجارة بعد تعليمه على يد عمه أبو طالب، وبدأت سمعته تنتشر في قريش، وبدأت قريش كلها تتكلم على سيدنا محمد ﷺ وعلى أخلاقه  ، ومهارته في التجارة ، وأمانته وصدقه ووفاؤه لحد ما لُقب بين قومه بالصادق الأمين..

السيدة خديجة وقتها كان عندها ٤٠سنة، وكانت جميلة جدًا وغنية جدًا، وكانت أرملة وورثت زوجها أبي هالة وكان غني جدًا وكانت السيدة خديجة بتتاجر، بس مش بتنزل بنفسها السوق لكن بتأجر تاجر عشان يشغل فلوسها فى السوق، ويروح يبيع ويشتري ويجيبلها بعد كده الربح..

فبدأت أخبار النبي ﷺ تنتشر لغاية ما وصلت لخديجة بنت خويلد.. فبدأ يدخل في قلب السيدة خديجة شئ
من الحب إلى رسول الله ﷺ لدرجة إنها فكرت وقالت للغلام اللي بيشتغل معاها وكان اسمه "ميسرة" وسألته: ماذا سمعت عن محمد؟..
فقال لها: إنه صادق وأمين ووفّي وماهر في التجارة.. وقال لها كل صفات النبي ﷺ ، وكل اللي
قريش بتقوله عنه..
فقالت: يا ميسرة أذهب إلي محمد واسأله هل يقبل أن يتاجر في أموالي..
وفعلاً ميسرة راح للنبي ﷺ وقال له: يا محمد تسألك خديجة بنت خويلد أن تتاجر في أموالها ، فهل تقبل ؟

وافق سيدنا محمد ﷺ
(ولم يرفض أنه يكون مسئول عن أعمال امرأة)..
فالسيدة خديجة بعتت ميسرة مع سيدنا محمد ﷺ في تجارة لحدود الشام بمبلغ صغير (عايزة تعرف أخبار عنه أكتر)..
وفعلاً سافر ميسرة مع النبي ﷺ وخلصوا التجارة بتاعتهم، ورجع ميسرة ولاقى السيدة خديجة مستنياه ، فقالت: ما فعل محمد يا ميسرة؟
ميسرة رد عليها قال: ياسيدتى لم أرَ في حياتي مثل هذا الرجل قط كان يفعل كذا وكذا وكذا..
وقعد يحكيلها على أمانة النبي ﷺ وعلى صدقه وأخلاقه وعفته ﷺ ..
فبدأ يقع في قلب السيدة خديجة حب أكتر لرسول الله ﷺ ..

وفى يوم دخلت على السيدة خديجة واحدة صاحبتها أسمها نفيسة بنت المنبه، وسألتها عن أخبارها، وبدأت السيدة خديجة تتكلم عن النبي ﷺ وقعدت تحكى لنفيسة عليه.. محمد راح.. محمد رجع..محمد
أمين وصادق ..
فنفيسة فهمت وقدرت إحساس خديجة رضى الله عنها ومشاعرها الجميلة..
وقالت لها : يا خديجة تحبى أكلمهولك في الزواج منك؟فوافقت السيدة خديجه..

وراحت نفيسة للنبي ﷺ وقالت: يا محمد ما يمنعك من الزواج؟ فسكت النبي وقال: ما بيدى ما أتزوج به.. (كان لسه شاب فى بداية حياته)..
فقالت له: ما رأيك إذا تزوجت من صاحبة كفاءه وشرف ومال وجمال؟..
فالنبي ﷺ قال: من هى؟!
قالت: خديجة
فقال النبى ﷺ :وكيف لى بذلك ؟ (طب أعمل أي عشان اخد خطوة)..
فردت نفيسه وقالت: أنا أفعل..
(اتصرفت نفيسة بكل ذكاء من غير ما تسبب إحراج لخديجة رضى الله عنها).. وبسرعة تجرى نفيسة وهي
طايرة من الفرحة لحد ما وصلت لخديجة وقالت: أبشري ياخديجة قَبِل محمد.. قَبل محمد.. ففرحت السيدة خديجة فرح شديد..

وغابت نفيسة فترة (كأن يعنى السيدة خديجة محتاجة وقت تفكر)..
وبعد فترة قالت خديجة للنبى ﷺ : يا ابن العم وجدت فيك الأمانه وحسن الخلق.. وصدق الحديث فرغبت فى الزواج منك..
ففرح النبي ﷺ  أوى وتم الزواج.. وكان النبى ﷺ بيحبها لدرجة إنه بعد وفاتها كان لما ييجي يتكلم عن خديجة كان يقول "إنى قد رُزقت حبها"

*حب النبي ﷺ للسيدة خديجة* 🍒..

مرة كان النبي ﷺ قاعد في البيت بعد وفاة السيدة خديجة.. وكان اتجوز السيدة عائشة.. فالباب خبط وكان حد بيستأذن.. فالنبي ﷺ قال: إيه ده.. كأنه صوت خديجة.. فيقول: " اللهم اجعلها هالة أخت خديجة" ..
فيفتح الباب ، وفعلاً تطلع هالة أخت خديجة..
فيفرح النبي ويدخلها ويقعد يتكلم معاها لحد ما تمشي..

ولما كانت كل القبائل جاية تبايع النبي ﷺ  على الإسلام وقت فتح مكه.. النبي ﷺ لقي ست عجوزة جاية..فالنبي وشه فرح أوي بعد ما شافها.. وراح خالع العباية اللي على ضهره وفرشها على الأرض ، وقعدت الست عليها ، وقعدوا يتكلموا سوا ساعة..
وأول ما الست مشيت ، تيجي السيدة عائشة تقول: يا رسول الله من هذه العجوز؟ ..
فيقول: يا عائشة هذه صاحبة خديجة، كانت تأتينا أيام خديجة..
قالت: وفيم كنتم تتكلمون؟
قال ﷺ :كنا نتذكر الايام الخوالي.. أيام خديجة..

ولما كان النبى ﷺ يحكى عن السيدة خديجه.. كانت السيده عائشة بتغير لدرجه انها مره قالت: "أوليس فى الدنيا غير خديجه.. و الله قد أبدلك الله خير منها"..
فالنبي ﷺ رد عليها وقال:
لا والله.. لقد آوتني حين طردني الناس.. وصدقتني حين كذبني الناس.. وواستني حين حرمني الناس..

لما النبي ﷺ  اتجوز خديجة كان عنده ٢٥سنة وهي عندها ٤٠سنة..
واتوفت خديجة لما النبى ﷺ كان عمره ٥٠سنة.. يعني عاشوا سوا ٢٥سنة.. وبعد وفاتها فضل النبى ﷺ زعلان عليها اوي لدرجة إن واحدة من الصحابيات لقت النبي ﷺ قاعد في طريق من طرقات المدينة وحاطط وجهه الشريف في كفيه ، فوقفت وقالتله: يا رسول الله أنت لسه حزين على خديجة!!
فسكت وماردش عليها..
فقالتله: يا رسول الله.. هون على نفسك.. طب إيه رأيك تتجوز؟
فبتقول الصحابية فرفع النبي ﷺ رأسه فلاقيته بيبكى وبيقول: وهو فيه في الدنيا حد زي خديجة..
ومن شدة حزنه وبكاؤه.. الصحابية بتقول: ندمت وقلت لنفسي ياريتنى ما كنت نطقت بكلمة واحدة..

على فكرة الزوجة اللي النبي ﷺ اختارها بنفسه هي خديجة بنت خويلد.. وباقي الزوجات كان زواجهم بأسباب.. وفي منهم زواجهم كان بأمر من الله عز وجل.. وهنرد ونوضح سوا أسباب زواجه من كل زوجة..
وده هيبقى رد على أي حد بيخوض في عرض النبي ﷺ ويقول إن النبي كان بيحب يتجوز كتير.. حاشاه ﷺ..

صلوا على الحبيب ﷺ