"جُمان"
العشاء قرب يأذن وانا في طريق اول مرة اشوفو وما عارفه امشي وين وتلفوني طفى شحن من لعبي بيو طول النهار، وحتى الشارج بتاعي ما كان معاي عشان اشحنو، نظرات الاولاد الفي الشارع لي وهمسهم لبعض ما طمنوني وابتديت احس بالخوف، وقفت جمب بتاع طبلية وطلبت منو يديني تلفونو اتصل على فاتن تجيني، ابى وقال الا اديه قروش فهمتو انو ما معاي كاش لو عايز بنكك ممكن قال لا الا كاش، اتحركت من جمبو و واصلت لغايه نهاية الشارع وقفت قريب من الاستوب، كذه عربية بتجي ماشه وبتقيف لكن ما بتحرك من محلي، شفت بنات قاطعين الزلط ومشيت معاهم عشان يقطعوني، بقيت بتلفت وحاسة المكان ما غريب علي لكن ما عارفه ده ياتو شارع، شفت محل عصير كان بيودينا ليو محمد صاحب فاتن وقال قريب من صالة الرياضة الشغال فيها، مشيت وأنا بسأل الناس منها لحدي ما وصلت ليها، دخلت وكان المكان كلو عبارة عن رجال وانا البت الوحيدة بقو كلهم يعاينو لي وانا ما عارفه اتصرف، جاني واحد قال لي: انت ضايعه ولا جايه عايزة زول؟ قلت ليو: بتعرف كوتش محمد، قال لي: اي بعرفو لكن هو الليلة ما شغال، ختيت يدي الكانت بترجف في وشي وخلاص عايزة ابكي ما عارفه اعمل شنو تاني راسي شطب وبقيت ما قادرة افكر، اداني باقة موية وقال لي اقعدي هنا واهدي شويه لو محتاجه ليه ضروري ممكن اتصل عليو، قلت ليو: اي عليك الله واديني اتكلم معاو، فعلا ضرب ليو وقلت ليو يجيني وطلعت انتظرو برا عشان ما ارتحت في قعدتي جوا، مسافة على بال ما جه اول ما نزل قال لي: انت واقفه هنا بتعملي شنو وفي الوقت ده؟ ما كان تنتظري جوا طلعت مني شهقت وقربت انفجر من البكى لو ما مسكت نفسي حكيت ليو بالحصل لي ومشيت ركبت معاو العربية.
محمد:غبية انتِ يا جمان؟ في زول بعمل عملتك دي؟
-قاصدة يعني؟
=ما اكلتي صاح؟
-هئم.
=خليني اضرب لي امك دي اشوفها وين وتجينا محل نمشي بتكون قلقانه عليك.
-بتكون ما انتبهت لغيابي من الاساس.
=لي بتقولي كده هي بتحبك لو انت ما عارفه.
-اممم صاح، قلتها بعدم مبالاة.
ختيت تلفوني في وصلة عربيتو لمن كان بتكلم معاها وقالت ليو:طيب انا جاية، مشينا مطعم طلب لينا اكل وبديت أكل من قبله لاني كنت ميتة جوع، بعد خلصت مشيت الحمام غسلت وشي وهديت تاني بقيت بعاين للمكان من حولي وحاسه بالتوتر، جات فاتن داخلة وقالت بأعلى صوتها:كنتِ وين يا صايعة وقافلة تلفونك ده ليه؟ فرجت العالم كلو علينا، محمد قام على حيلو وقال ليها:وطي صوتك واقعدي نحن في مكان عام، قعدت وهي بتحمر لي وقالت:صايعة وين وبتتحاومي مع منو لحدي الوقت ده؟ لمن عايزة تتأخري ما تضربي تقولي لي وكمان قافله تلفونك مني؟ ما مشيتي المدرسة صااح لافه وحايمه النهار كلو؟ ما رديت عليها وكنت بعاين ليها بس، محمد بقى يحكي ليها الحصل لي شنو ولقاني وين، ما كنت عايزة اقعد معاها ولا متحملة اسمع منها كلمة فشلت مفتاح عربيتو ومشيت قعدت فيها وشغلت الاغاني بصوت عالي لدرجة بقيت ما سامعة صوت افكاري.
