"جُمان"
كنت حاسة بالوحدة والفراغ تعبانه ومقهورة لكن ما قادرة احكي لي زول رجعت البيت لقيت بابا وماما قاعدين يتونسو، قعدت في نصهم وقلت ليهم احضنوني انا تعبانه، بابا ختى يدو على جبهتي وقال دخلك شو صايرلك انت منيحة، قلت ليه: ماني منيحة كتير مقهورة،
أمير:تبين نروح المستشفى؟ يشوفك دكتور.
فاتن:جمان انت تعبانه من العرس ولا في شنو؟ اتشاكلتي مع زول من البيت؟
-ما عايزة دكتور ولا تعبانه وما متشاكلة مع زول بس انا محتاجه حب محتاجه وقت محتاجه اهتمام، محتاجه تقعدو معاي نتونس زي اي اهل طبيعيين احكي ليكم حصل شنو في يومي وتسمعوني، تعرفو بتكم دي منو بتحب شنو وبتكره شنو نفسها تبقى شنو في المستقبل، المواقف المرت بيها وخلتها تقوى والخلتها ضعيفة، الخوازيق الشافتها وغدر الصحاب وكيف اتعلمت من كل درس ما تفضل في الارض وتقوم تحارب من اول وجديد، نفسي تعرفو عني حاجات كتيرة انتو ما عندكم وقت ليها، محتاجة وجودكم في حياتي بدل القروش البترسلها لي دي لو اتكلمت معاي كل يوم نص ساعة كانت فرقت معاي جدن، وانت بدل نصايح الجمال والماسكات استايل الاسكين كير وكيف اطلع في احسن صورة ياريت لو ساعدتيني اكون حلوة من جوا، لو ساعدتيني ارتب نفسي واعرف اولوياتي اقدر افرق بين الغلط والصاح وما انجر ورا مشاعري، ياريت لو حاجات كتيرة عملتوها لي ومعاي كان غيرتني قبل ما يحصل ده ما عايزة الومكم وما زعلانه منكم لانكم برضو بشر زي وبتغلطو واحتمال كنتو شايفين ده الصاح بالنسبة لي لكن للاسف ما صاح، انفصلتوا بإرادتكم وكل واحد فيكم عاش حياتو من غير ما تراعو لي وجودي بينكم، وحتى لمن جيتو ترجعو لبعض ما كلفتو نفسكم توروني على الاقل اعرف بس ما باب المعلومية، فجأة تقيفو قدامي وتقولو لي رجعنا عموما انتو حرين في حياتكم لكن لو سمحتو ما تلعبوا بحياتي معاكم، لاني انا بجد تعبت وبقيت ما قادرة اتحمل طاقتي انتهت وفصلت،
أمير:يابنتي يانور عيني شو تبين ساويلك؟ ما ابغى اشوفك كذه والله قلبي يتقطع عليج.
-انا هسي بجد تعبانه ما عايزة شيء ومحتاجه اقعد مع نفسي شويه خلوني لمن اروق ونتكلم بعدين.
رغم انو ما حليت حاجه لكن على الاقل حاسة بالراحة عشان اتكلمت معاهم وعرفوا بالحاسة بيو، فرغت مشاعري وكتمان سنين طويلة كنت بدس وبتعامل عادي، اتوضيت صليت ركعتين ومسكت المصحف كنت مجروحة ومكسورة الخاطر وعارفه ربنا ما بفرط في عبادو.
كنت نايمة في المصلاية لمن صحيت لقيت العصر اذن صليت وطلعت ليهم برا، وزي الكانو منتظرني اول ما شافوني فاتن قامت مسكتني من يدي وقعدتني جمبها، كانت بتمسح على شعري وبتقول لي معليش يابتي امك شكلها طلعت جاهلة وقايلة التربية كده اعفي لي، كانت بتبكي ولأول مرة اشوفها عاملة كده، بابا برضو ضماني وقال لخاطر عيونك الحلوين ازود اجازتي كمان اسبوعين واجلس وياا بنتي، شو رايكن نروح نتعشى برا الجو وناسة، فاتن قالت ليو: فكرة حلوة نقوم نجهز وما بنتأخر عليك وساقتني معاها، دخلت غرفتي اخترت فستان طويل ومعاه طرحة ما عملت ميكب بس قلوس وطلعت، كانو مستغربين لكن في نفس الوقت فرحانين لأني اخدت الخطوة دي براي، اليوم كان لطيف اكلنا وكانو بتونسو معاي وبحاولو يخلوني اتكلم اكتر ويسمعوني، يعرفو راي واشاركهم في خططهم من هنا ولي قدام، وتقريبا كلامي معاهم جاب نتيجة ايجابية.
