"جُمان"
فاتن:كيف يعني معرس والخلا يعرس شنو؟
-اجي يا الخلا يعرس شنو انت مالك عرستي.
+كنت شافعة هبلة وعو.يرة غشوني.
-اصلك ما تكضبي براك كستي درب العرس.
+اي اقعدي حاكي حبوبتك كويس لمن تسمعك.
-تسمعني وين وهي في بلدها ديك.
+اها ما قلتي لي الاستاذ ده عمرو كم وساكن وين، شفتو المرة الفاتت لمن تعبتي جه معاهم المستشفى.
-انت عايزة تطلعي ليو بطاقة وطنية؟
+لا بطاقة قلبية.
-فاتن ما ناقصة ظرافتك والله.
+يابت ده زوج امك المستقبلي.
للحظة كده صدمت وبقيت ما قادرة ارد عليها قرصتني في يدي وهي بتضحك قالت لي: بشاغل فيك سااي والله ما عجبني ولا شيء وكمان بقول لي الست الوالدة وزي ما بتقولي It's not my type، تحسي معقد كده ومكبر المواضيع وانا دايرة افرح واستمتع بشبابي،
-شبابك ده راح زمان خلي شبابي شبابي أصحي على نفسك انت بقيتي عجوز شوية وتبقي حبوبة.
+بررري يختي انا لسة في عمر الزهور عمر الهناء.
-ااي غشي نفسك كده.
+انت عاجبك ولا شنو؟
-منو؟ الاستاذ.
+اي شفتك وانت بتعاين ليو.
-no no no ابدا ولا فكرت فيو بالطريقة دي
+فكري يختي فكري لو خلتي أمير يضيع من يدك على الاقل حاولي مع ده، يكون ثلاثيني ولا في نهاية العشرينات محترم وراقي بعرف ربنا وما بفوت صلاتو، شغال في مدرسة مرموقة وبياخد الراتب الفلاني، وفوق ده وجيه ومهندم واسمر سمار بلادنا السمح اكتر من كده عايزة شنو؟ غايتو لو دايرة تجيبي لي نسيب وتبقيني حبوبة اقل من زي ده ما برضى كلمتك انا.
-ما ترضي يا فاتن ما اهو واقف جمب الباب معاو اهلو جو يتقدمو لي وانا الرفضت.
+يا عويرة وانت قايلاها حاجه صعبة يعني تخلي ولد يجي يتقدم ليك انت قايلاني خليت ابوك يصل بيتنا كيف دايرة ليها حبة شطارة انت اسمعي كلامي وشوفي لو ما جه.
-يختي انا ما عايزة اعمل اي شيء اذا ما جه بذات نفسو وأتى به قلبه مجرورا الى عُقر داري انا ما عايزة.
+قلبو يا موكو.سة خليك بالعقلية دي وبتنتظري كتير خلي بالك، قالت لي كده وانا بشيل حاجاتي وخاشة غرفتي.
رقدت في السرير بعد ما رتبت اغراضي وكنت بفكر للحظة كده في كلام فاتن بصورة جدية، بتخيل بيت عادي بتكون من تلاته غرفة، وحده كبيرة وهي غرفة نوم فيها سرير مزدوج الوانها هادية بين الابيض والبيبي بلو، وفيها مرايات وانوار مشكلة بتطلع نجوم بليل، اطلع منها على يدي اليمين في الغرفة حقت الاطفال مقسومة جزئين نص باللون الكحلي الغامق والتاني Pink، كأنها قاعة حرب فيها جزء بخص الاولاد والتاني عكس ليه خالص وخاص بالبنات وبالرغم من ده كانت حلوة شديد، واخر وحده كانت للضيوف فيها سريرين وكذا كرسي وطربيزة، كلهم فاتحين في صالون عليها طقم جلوس وسفرة، واخر شيء على يدي الشمال المطبخ اللي كان احب مكان بالنسبة لي، كنت حايمة بالمريول تبع الحمام ولافة شعري بالبشكير لمن سمعت صوتو وهو بفتح الباب، جه داخل باس جبيني وقال: حبيبي طابخة لينا شنو الليلة؟ قلت ليه وفي نبرة حزن في صوتي: معليش برضو ما طبخت حاجه وجهزت لينا اندومي، قال لي: احلى اندومي من تحت يدين القمر بقدر اساعدك في حاجه؟ قلت ليه: ممكن تمشي تستحم بسرعة وتجي ناكل عشان جيعانه، قال لي: حاضر وفعلا ربع ساعة وكنا بناكل في طربيزة المطبخ، فجأة سمعنا صوت التؤم المشاغب جود وجواد، جو جارين جواد شايل باربي بتاعت جود وما راضي يديها ليها عشان تلعب بيها، وجود يا عيني كانت بتبكي وعايزة لعبتها ابوها شالها مسح ليها دموعها و وعدها بلعبة جديدة، بعد ما شاكل ليها جواد وطلب منو ما يشيل لعبات اختو، شلت جواد عشان زعل وكنت براضي فيو وعملنا حزب الام مع ولدها والبت مع ابوها، وقامت حر.ب بينا المخدات اطايرت وما تعرف الضربة تجيك من وين، لكن برغم ده كلنا مبسوطين شديد ورقدنا في الارض من التعب، وانا بلمس في وش عماد فجأة اتبدل وشفت مهند قدامي، فتحت عيوني وكانت مليانه دموع نزلت من على السرير دخلت الحمام، وانا بغسل في وشي وبعاتب نفسي رجعت اتذكرتو تاني لي؟ لي متين ح افضل في الدوامة دي ما اطلع منها؟ شهور وانا على نفس الحال ما قادرة اعمل Move on ولا اتخطى وجودو في حياتي، ولمن اعمل فيها نسيت ولا كأنو كان جزو من يومي وحياتي اقل ذكرى صغيرة ترجعني لنقطة الصفر، كم ليلة قضيتها ببكي وانا شايلة التلفون فاتحه جهات الاتصال شايفة رقمو لكن ما قادرة اتصل علي، دموعي كملت وقلبي طلع من مكانو وجع وزعل على فراقو، لكن عمري ما برجع ليو لو كان اخر راجل في الدنيا مستحيل اغفر ليو كسرة قلبي والألم العيشني ليه، بكيت لمن حسيت انو عيوني عايزة تطلع من مكانها لكن وعدت نفسي انو دي اخر مرة وتاني لا يمكن ابكي عليو ولا انزل دمعة عشانو.
