"جُمان"
-الو أمير.
=ايوا يا جمان.
-انت وين؟
=في البيت رجعت قبل شويه.
-عليك الله تعال لي لكن من غير ما زول من ناس البيت يحس عليك.
=خير الحصل شنو قلقتيني عليك.
-واقعة في مصيبة، تعال في قسم شرطة الخرطوم2.
"العودة لبداية الحدث"
اتوقعت انو القميص يعجبوا لكن ما لي درجة يقلع اللابسو ويغير بالجبتو، وطلع مزبوط فيو بالملي وكأنو مفصل عشانو بالتحديد،
=طالع حلو؟
-احلى من كده بتجيب لي كو.مة.
=ما تمشي اي مكان انا عايزك هنا جمبي.
-حاضر، تلفونو اتصل وكان واحد من اصاحبو شلت منو الفون ورديت عليو، سألني عن هنو قلت ليه: ببح اكلتو، قال لي: كيف يعني؟ قلت ليه: عديل اكلت صاحبكم بقو يضحكو يظهر انو كان فاتح الاسبيكر، قال لي: ادينا صاحبنا شويه نحن كمان عايزين نحتفل بيو، قلت ليه: عشان طلبت بأدب حاضر شويه وبنجي عليكم قال لي: في انتظاركم، اتحركنا عليهم وكانو في مطعم قريبا مننا ربع ساعة وكنا معاهم، دخلت مع هنو وهو ماسك يدي وماشي قدامي بسلم على اصحابو وبعرفهم على اني حبيبتو وزوجة المستقبل القريب، وقفنا جمب شلة من البنات والاولاد اتوقع ديل الاقرب ليه، وحده من البنات ما كانت بتشيل عنها منو متابعة كل حركاته، ما عارفه بس اتوقع انها معجبة بيو او كانت حبيبتو وما حبيت نظراتها لي، قمت جريتو ناحيتي وهمست ليه في اذنو وخليتو يضحك، ولاحظت لملامح وشها اتغيرت، المكان كان ممل بالنسبة لي ناس ما بعرفها وتكلموا في حاجات نصها ما فهمت منها شيء، كنت شارده لمن هنو طقطق بيدو في وشي وقال لي: لو زهجتي خلينا نمشي، هو كان مبسوط بالقعدة وما حبيت اخربها عليهم وقلت ليه: لا خلينا قاعدين، مشيت الحمام اظبط الروج بتاعي لحقتني البت، سلمت علي وقالت: انا مرام الEx بتاعت مهند سلمت عليها بطرف يدي وما اتكلمت فضلت بعاين للمراية وبرجع خصل شعري لورا، كملت كلامها: على فكرة مهند ده ما زي ما متخيله هو اكعب ولد ممكن تشوفي ظاهر من وشو ملاك لكن في الحقيقة هو شيطا.ن، انا كمان في البداية كان معاي كده عيشني في دنيا من الاحلام صح ما عرفني على زول من اصحابو ولا وعدني انو يتزوجني لكن برضو ما خلاني في حالي فضل يجري وراي ويزن في راسي لغايه ما ارتبطت بيو وبعد زهج مني خلاني برسالة قال لي ننفصل فيها، نفسيتي تعبت وقعدت شهور بحاول افهم انا غلطت في شنو لمن خلاني بالطريقة دي لكن على الفاضي، انا بقول ليك كده عشان ما عايزاك تعيشي نفس العشتو احسن ليك تخليه وتعيشي حياتك انت لسه صغيرة على كلام الحب ده وابعدي منو احسن ليك قبل ما يأذيك وما تقدري تتعافي بعدها، كلامها قلقني لكن ما شكيت ولا لحظة في حب مهند لي لانو الشعور لو ما طالع من القلب ما بصل القلب، وبعدين يمكن تكون بتقول كده عشان غيرانه مني وهي وقعت بلسانها وقالت مهند ما عرفها على زول قريب ليه يعني اساسا ما خاتي العلاقة جدية ما زي هسي وهو معاي.
