"سارة"
اختي الصغيرة
ديل ما كلمتين حسيت بيهم رصاصتين اتغر.زو في نص قلبي، في النهاية طلعت خاتيني في مقام اختك وانا عيوني ما شايفة راجل غيرك، معقولة ما حاسي بمشاعري تجاهك انت غب.ي للدرجة دي ولا بتحاول تتغا.بى، لهفتي عليك لمن تكون ماف وترجع لهفة اخت؟ ولا عيوني ونظراتي ليك نظرة اخت لي اخوها؟ لي عملت كده فيني وكسرت قلبي؟ ناقصني شنو عشان ما تحبني؟ لمحت ليك مرة واتنين وتلاته وبرضو ما يئست وقلت الا ما يحس بي يوم، لكن الليلة اثبت لي اني ضعيت عمري ومشاعري على واحد ما يستاهل، منك اتعلمت درس قاسي لكن شكر ليك فوقتني من الحلم الكنت عايشة فيو، ما اتكلمت ولا نطقت بحرف لكن نظراتي قالت كل الكلام الفي قلبي، قال لي: ساكته مالك ما تتكلمي قلت ليو: الكلام لو بقدم ولا بأخر كان اتكلمت، مشيت خليتو واقف بنده علي وانا من العبرة والخنقة ما قادرة اتنفس.
"جُمان"
فتحت باب الشقة ودخلت لقيت فاتن بتحضر وماسكة الريمود وبتتكلم بالتلفون، دخلت غرفتي عشان ابدل لبسي جات لحقاني،
+كنت وين؟
-في مشوار.
+مع منو؟
-ما حاسه انك مهتمة زيادة عن اللزوم.
+ده منو الجه وصلك بالعربية لغاية البيت.
-مراقبة قلتي لي.
+بسألك انا.
-أمير.
+أمير ياتو ود عمتك؟
-بعرف أمير غيرو.
=ومالو قال؟
-ماف شيء طلب مني نطلع وانا وافقت مشينا اتغدينا ورجعنا.
+فجأة كده ومن غي اي سبب؟
-Yaa.
+ما تكوني عاجباه يابت؟!
-انت ما بتفكري غير في الحاجات دي؟
+ما قلت شيء غلط وما تعجبي ليه اسم وجسم و وش مبتسم، بيتهم داك كلو في وحده في جمالك ولا رقتك ولا انوثتك، لو خلطوهم كلهم ما بجيبو ضفرك.
-ايوا ايوا اطلعي بالعالي زي ما متعودة عليك.
+يابت انت قايلة نفسك هينة ولا هينة انت بت فاتن.
-عرفت الموضوع في النهاية بصل ليك بشكل او اخر انا حلوة عشان بتك.
=اكيد طبعا فرخ الوز عوام.
-لو اكتفيتي من تشكير نفسك اطلعي عايزة ابدل وارتاح.
=عايني لو حاول يطلع معاك تاني امشي ما ترفضي، ولو اتصل عليك ردي واتونسي معاو يمكن يكون عايزك وتخشي البيت داك عروس كيتن فيهن كلهن.
-عايزة تدخلني بيتهم عشان انت ما قدرتي وتنتقمي لنفسك عن طريقي، لا ياستي ما تعشمي حتى اكتر من الصداقة ما بلقى مني.
