"لو كانت لي أمنية ستكون أنت، الجلوس بجانبك والحظو بإنفعالاتك وضحكاتك جل ما أريد"
"جُمان"
انا اتوقع انو الجامعة دي كلها دكاترها عندهم كك في راسهم والحصل هسي خير دليل، ده شنو ده شلت شنطتي و ورقي وشفت اقرب مكان قعدت فيه والطلبة لسه بعاينو لي، انا ما مستوعبة زيهم بالظبط ولا عارفه الحصل ده حقيقة ولا الدكتور بلعب علي، وهو كان في عالم تاني موازي رجع كمل محاضرتو وكأن شيء لم يكن، طلعت دفتري وحاولت اكتب معاه سامر كان قاعد جمبي وكتب لي على ورقة صغيرة "وت ذا هيل از زذ" رديت ليه: "اي دونت نو والله" وقربت اموت من الضحك وهو كاتمها بالعافية، المهم بعد خلصنا قال لي: انت محظوظة عارفه كده؟
- بالنسبة؟
= الدفع القبلينا قالت لينا ده اصعب دكتور في الجامعة والامتحان بتاعو بجي بل عديل، واحتمال من الدفعة كلها ما ينجحو عشرة وانت بالبارد كده اخدت لي نجاح ضمان.
- بجد انا ما عارفه ده حصل كيف.
= انت زاتك لو ما حفارة بتقري البحث الكتبتي وتحفري ليو كده، انا لو قال لي اقرا الكتبتو بغلبني.
- بالجد محظوظة.
= عاديني بالحظ يحسن حياتي معكسة.
- دقيقة ارقيك من كل نحس.
= دي تعرصة حامضة.
- سوري.
= الطقة كيف؟
- لو بتدفع لي لا.
= يابت انا لاقي اكل خلي ادفع ليك امشي شوفي اهلك وين.
- ههه خلاص ارح.
على بال ما نصل الكافتيريا سامر ده سلم على دلشمية نفر كل خطوتين في زول بسلم عليه، لمن زهجت قلت ليه: انت جيت متين لمن عرفت الناس دي كلها؟ قال لي: في الجامعة أهم حاجه العلاقات كل ما كانت شبكة علاقاتك واسعة انت امورك بتوضح بالنسبة لي حاجات كتيرة، وانت ما عارفه الزول البتتونسي معاو الليله بكرة بكون وين وبفيدك بشنو، قلت ليه: شتت ياااه انت قاعد تفكر لي بعيد عديل قال لي: لازم تحسني علاقاتك لانها الدفة البتحرك حياتك، اقتنع بكلامو لانو فيه وجهة نظر وتفكير لقدام،
= بتاكلي بوش؟
- بوش؟
= انا اصلا قلت بت ميكي زيك ما بتاكل.
- منو القال ليك انا بت ميكي؟
= من على بعد سبع كيلو متر بتعرف.
- انت قاعد تظلمي خلي بالك.
= بقول الشايفة عيوني.
- احتمال عيونك ما شايفة صااح.
= اثبتي لي.
- مضطرة؟!
= ابدا.
شلت شاورما وفراولة وسامر مشى مع اولاد بعرفهم ياكلو بوش، كنت بفكر في كلامو هل بجد من برا ظاهر اني بت ميكي؟ ايوا فيني شوية دلع لكن ما لي درجة بت ميكي يااخ، بعد خلصت قعدت في بينش تحت شجرة ظليلة وكنت بشخبط على الدفتر بتاعي،
