لمن نسيبة شافتنا احمد اتوتر لمن ملامح وشو اتبدلت، انا طويت الرقم في يدي براحه ودخلو جوا جيبي وبدلو طلعت اللبانه الكنت مشترياها من شويه،
نسيبة:واقفين هنا لي ومع بعض؟
احمد:ماف شيء.
نسيبة:كيف ماف شيء وانتو مخلين الاحتفال وبتتونسو، كنتو بتقولو في شنو؟
احمد:يااخ ما تحكيها ما قلت ليك ماف شيء.
نسيبة:احمد انت قايلني عويرة ولا هبلة؟
احمد:انت الا تتحشري في اي شيء، خلاص بقول ليك عشان ترتاحي ده واحد صحبي وبقرا معاي عجبتو صحبتك دي وقال لي اديها رقمو عشان تتكلم معاو.
نسيبة:وما تقول كده من البداية مخليني افكر في حاجات تانيه.
احمد:فكرتي في شنو يا غيورة.
بقت تدلع فيو وانا بغير عليك وما تتكلم مع بت غيري ويلهوي على تقل الدم، مشيت من احساس الخ.نقة ودي شنو الهبالة الحاصلة دي، نفسي افهم البنات دي بفكرو كيف هسي انا لو غبيه وما بفهم بصدق كلامو ده، صحي الواحده منهم لمن تحب مخها ببقى ما شغال، حمانا الله من التخ.لف ده قال حب حب ولا عواليق وخلقنة، رجعت للاحتفال واخيرا الاستاذ المعاط داك نزل واتكلم بدلو المدير لكن قال حاجات بتخص المدرسة وكلام تشجيعي للمتحنين، بعدها وقف اصطاف من الاساتذة عشان يوزعو الهدايا ادو التسعة اول واخر شيء البت الفازت بالعربية.
"مُزن"
من كترت الأسئلة الكانت في بالي ما قدرت انوم كويس الليل كلو اتقلب، وكمان صحيت متأخرة ولا نضفت البيت ياداب لحقت اجهز للمدرسة، وما كنت مركزة ونبهوني كذه مرة في الحصة لو ما ركزت بنطرد، حتى امال صحبتي انتبهت لي وسألتني مالي لكن ما قدرت اقول ليها حاجه، كذبت وقلت مشاكل عادية مع خالي زي كل مرة وقفلت على الموضوع، الحاجه الوحيده الحصلت وكانت سمحه في اليوم داك احتفال المدرسة للمتفوقين، حسيت كأني سافرت بالزمن للمستقبل وشفت نفسي وانا ناجحه وجايبة نسبة حلوة، واستاذ أمين المدير قال لينا كلام حلو شديد عشان نشد حيلنا ونقرا كويس، ومنها نجيب نسب عالية ونخلي اهلنا فخورين بينا، كان كل ما يقول حاجه اتذكر امي وقدر كيف هي معتمده علي وعايزاني ابقى احسن وحده عشان افرحها، واتحمست اكتر عشان اقرا واحقق ليها حلمها، طردت كل الافكار ديك من راسي وقلت ربنا عالم اذا ابوي ظالم امي وهو قادر على اظهار الحقيقة وانا متوكلة عليو، ولو طلع بجد ظالمها الله يطلع ليها حقها من عيونو في الدنيا قبل الاخرة، عشان الاتحملتو بسببو ما هين وبإذن الله انا ببقى ليها الدرع البحميها من اي زول يحاول يأذيها، واحاول اعوضها عن كل المُرة الشافتو معاه واخليها تعيش باقي حياتها معاي وهي مبسوطة ومرتاحه، اصلي ما عندي غيرها في الدنيا وهي اغلى حاجه بالنسبة لي♡
