-حبيبتك يا سفيان؟
=اي.
-انت ود متين لمن بتحب؟
=الحب ما عندو عمر معين، هو شعور بتحس بيو لمن تلقى الزول البترتاح معاو، وتقدر تعبر عن مشاعرك والجواك من غير خوف انو الطرف التاني يفهمك غلط ولا يفسر تصرفاتك على انك انسان سيئ ولا مؤ.ذي، وبرضو تحترم وتقدر كل الحاجات البعملها عشانك مهما كانت صغيرة او كبيرة، وتوري قدر كيف وجودو مهم في حياتك وفارق معاك، بالإضافة لانك تدعمو لمن يمر بظروف او اوقات صعبة وتقيف معاو، كل الحاجات دي بتزيد في رصيدك عندو وتخلي علاقتكم قوية ومتينة ومن الصعب تنكسر بسهولة، ولازم تعرفي انو في الحياة تقلبات وما دايما بنقدر نواكبها واذا حصل ظرف وانفصلتو لاي سبب تكون حافظ الود محترم ومقدر الكان بينكم وتتكلمي عنو قدام اي زول بإحترام لانو النهايات اخلاق وزي ما دخلنا بالحسنى نمرق بالحسنى، بقيت فاتحه فمي وبعاين ليه وفي الكلام البقولو ده.
-انت عارف ده كلو من وين؟ انت بتحب بجد؟
=لي ما مصدقة؟
-سفيان انت لسه صغير على الحب والكلام الفاضي ده انتظر لمن تكبر حبه، رغم انو كلامك بدل على الوعي عارف حاجات عمري ما سمعت عنها مع انك لسه صغير.
=قلت ليك الحب ما عندو عمر.
-غايتو ما بسألك، لكن دي منو القاهرة الخلتك تحبها دي، لمن عرفت بسببها الحاجات دي كلها؟
=هيي ما تتكلمي في مرت اخوك كده ما برضى فيها.
-مرت اخوي؟ سفيان والله بتجيب لي جل.طه بم.وت ليك في الشارع ده.
ضحك وانا لسه ما مستوعبة كلامو، بعد شربنا عصرنا ونحن بنتناقش في حتت حبو دي، مشينا store بتاع هدايا وبقيت اختار ليو في special gift عشان يديها لي مرت اخوي دي، شلنا ريحة معاها ساعة وقلوسات وكم اكسسرز كده، وبعد غلفوها لينا بقت تحفة قلت ليو عااد انت البقدر عليك منو، اتونسنا شويه ورجعنا البيت نزلت وقلت ليو خلي بالك ما تكون البت دي دايراك على طمع حلاوتنا وسكرنا ده ما بندي سااي، اداني الهدية وقال لي: ماف بت ولا شتين انا اشتريتها ليك عشان امبارح كنت زعلانه وعايز اراضيك بيها، للحظة وقفت في مكاني وما قدرت اتحرك كنت فرحانه لكن دموعي نازلة وما اتكلمت خالص، نزل قال لي: انت عو.يرة ولا شنو بتبكي لي انا لو عايز ابكيك ما جبتها ليك، بقيت حاضنه في الشارع والناس بتتفرج علينا ولسه ببكي، لمن زهج وهو بحنس فيني قال لي: غلطان انا الجبتها ليك اصلو وشك ما وش هدايا، ضحكت وكنت بعاين ليو ما عرفت اقول شنو لكن اظن هو فهمني، دخلت البيت بعد مشى وكنت طايرة بالفرح زي التقول اول هدية تجيني في حياتي، صورتها الف صورة وعملت فيديوهات ورسلتها لي بابا وقلت ليو شوف سفيان جاب لي شنو، لكن ما رده علي عشان شكلو مشغول كالعاده يعني، بس ما مهم انا مبسوطه بهديتي♡
