كنت لسة ما فاهمة شيء وبحاول استوعب الود الاديتو ك.ف قاعد هنا بسوي في شنو؟ وبعرف نسيبة من وين؟ لمن بتعرفني عليو على اساس انو صاحبها؟!
نسيبة:اعرفك يا جمان على مهند او حلبي، قال وهو ماسك يدي وبعاين جوا عيوني نحن بنعرف بعض ما محتاجين تعريف الحصل بينا ما هين، جريت يدي منو ورجعت خطوة لي ورا وانا لسه بعاين ليه عشان اتأكد اذا نفس الشخص ولا غلطانة، جرتني نسيبة لجمبها وقفنا قدام الطربيزة الفيها الكيك، كانو بغنو ليها وهي بتصفق لكني ما مركزة معاهم وبعاين للود، والمشكلة انو هو برضو بعاين لي وبضحك اتوترت والقعدة غلبتني، قلت انسحب قبل ما نسيبة تشوفني وتقعدني بالغصب، وانا طالعة وقف قدامي نزل لمستوى طولي وهمس لي: ماشه وين لسه الوقت بدري ما شفناك، قربو مني بالطريقة دي وكلامو لي وترني وخوفني منو، ولأول مرة في حياتي اخاف من زول وحقيقي الشعور ما حلو خالص، جرا لي كرسي عشان اقعد وهو قعد قصادي وعيني في عينو، طلع سيجارة ولعها مع انو البت الشغاله قالت ليو ممنوع التدخين بس ما اشتغل بيها ولا كأنها اتكلمت معاو، قال لي حاجه وبسبب الصوت الاغاني العالي ما سمعتو، قام جرا كرسي ناحيتو وبقى الفصيل بينا انشات بسيطة، نفخ هوا السيجارة وقال: انت خايفه لي؟
-ل..لا..م..ما..خايفة، قلتها وانا بتأتأ.
ختى يدو فوق يدي وكمل :طيب جسمك بارد زي التلج ليه؟
سحبتها وقلت تكيف المكان عالي عشان كده بردت، طلعت جكت الليزر الكان لابسو ختاه في كتفي ولبسني ليه وقال: يلا شوفي ليك حجه غير التكيف، ما عرفت ارد عليو قام على حيلو وقال ماشي يجيب لينا حاجه ناكلها، لمن مشى اخدت نفسي الكان محبوس وهو قدامي ما كنت قادرة اتنفس ولا حتى افهم انا مالي، رجع وهو شايل صحن كيك وبارد بس الملعقة وحدة،
-لي ما جبت لي ملعقة؟
=ما لقيت.
-طب ما مشكلة اصلا ما ضروري اكل كيك في الوقت ده.
=اكلي معاي من حقتي.
-لا ما عايزة.
ما رد علي وشال قطعة واكلني ليها وروجي كلو اطبع فيها، بقى يضحك وقال : يا سلام شكلو الروج طعمو حلو، اكلة حته واداني تاني بالطريقة دي لحد ما الصحن فضى قال لي :الجاك شنو؟ قلت ليو :و..لا...ولا حاجه، ضحك ومشى وانا عايزة اجري بعد حصلت الباب انتبهت اني لابسه الجكت تبعو، رجعت اختو ليو لقيتو قاعد منتظرني قال لي: كان تجري بيو رجعتي لي؟ قلت ليو :انا ما جريت على فكرة بس جاني تلفون وطلعت ارد برا عشان اقدر اسمع، هزا راسو بمعنى انو ما اقتنع لكن مشاني وقال: على سيرة تلفونك وينو ليو؟
-Pardon?
=عفوا شنو تلفونك وين؟
-في شنطتي.
=جيبي.
-ليه؟
=انت جيبي؟
-ما ليه؟
