"دعنا نلتقي عند البحر وتحت ضوء القمر، نتسامر واتبادل معك الضحكات والقُبل"
"جُمان"
قعدت مع فايزة كتير وهي بتحكي وتشكي لي عن حبيبها الله يجازي محل ما مشى، كانت مجروحة منو شديد وما قادرة تتجاوز الحصل، وبسبب ذنبو عاقبة كل ولد عرفتو من وراو، اي في اولاد كذابين وبتاعين لعب وما جادين لكن برضو في المتربي والبخاف الله والعايز الحلال، زي الود العايز ريهام ده يارب وانا كمان يكون في زول بحبني وعايزني بالحلال ما يتكلم معاي ولا اي شيء يمشي لي أهلي وخلاص، فترت انا من الحب الما منو فايدة ده عايزة احب راجلي وخلاص يارب زوجني البخافك فيني، يارب يكون حنين صوتو حلو في القرآن متربي وود اصول، يارب ما يشقى معاي ولا اشقى معاو، ويارب يساعدني ونربي ابناء صالحين، يارب ما مشكلة لو كان حلو حبه كده ما شديد ما متمسكة المهمة شوية جمال، يارب يكون طويل اسمر ولا حلبي ما فرقت لكن يكون معضل حبة عشان الحضن بعدين استغفر الله لا ما كده، يارب انت عالم بالفي نفسي يارب يجي قدر امنياتي واحلامي، يارب اصلحني واصلحو عشان نلتقي صالحين، لكزتني فايزة لمن لقتني سرحت في عالم تاني،
فايزة: وين انت يابت لي ساعة بتكلم معاك؟
- ماف شيء فكرت في حاجه، انت عارفه ارح نعمل خيانات وناكل شوكليت الصباح قيامتنا بتقوم لكن بناكل، مشيت شلت لينا براحه من غير ما زول يحس وقعدنا ناكل، كنت بعاين لي فايزة وبتأمل فيها انا كنت متأكدة ماف انسان كعب، مرات الحياة بتجبرنا نختار نكون قايسين، عشان نحمي نفسنا بنبقى زي جوزة الهند قايسة من برا وطرية وحلوة من جوا، اشكر كل انسان علمك القساوة لانو اداك درع تحمي بيه نفسك من الصدمات الجاية، قعدنا اتونسنا وتقريبا كل الحساسيات الكانت بينا انتهت.
"صباحاً"
صحيت وكنت رايقة شديد وعندي طاقة إيجابية لو وزعوها على الدنيا كلها تكفي وتزيد كمان، مبسوطة لانو قدرت اتجاوز حاجز فايزة الكانت عاملة وما عايزاني اقرب منها، لكن خلاص امبارح هدمنا وشوية شوية علاقتنا بتتكون، ومن الروقان عملت ليهم شاي بلبن وانا شاي بنعناع وقعدت في البلكونة، الساعة كانت ياداب سته صباحا في هوا بارد وسمح والشمس بتشرق مشغلة فيروز وكلو رواق، جاني إتصال من رقم غريب قلت يا صباح الخير متين الدنيا اصبحت للإتصالات،
- صباح النور.
= صباح الخير.
- اتفضل.
= محمد مالك أمين العلاقات العامة.
- اهاا سوري امبارح نسيت ما سيفت رقمك كنت ملخومة والله.
= حصل خير، شفت جدولكم والليلة بتخلصو بدري عايزين نمشي لمقر شركة ابو وردة عشان نتكلم مع المدير.
- اوكي تمام تمام، اصلا شوية كده وطالعة لمن اجي نتلاقى.
= خير ان شاء الله.
