"مُزن"
لمن البت قالت علي حرامية كنت بعاين ليها وعيوني مليانه دموع قلت للاستاذة والله انا ما حصل شلت حاجه ما حقتي، وما عارفه المطبوعة دي جات هنا كيف ودي اول مرة اشوفها،
هنادي:سمح لو ما انت السرقتيها عملت ليها رجلين وجات دخلت شنطتك؟
-ما عارفه لكن والله دي ما انا، حتى اسألي أمال انا كنت معاها الوقت كلو.
أمال:اي كنا سوا وخليتك لمن دخلت الحمام.
هنادي:ماف داعي تنكري الفصل كلو شافني وانا بطلعها من شنطتك تعترفي ولا اوديك للوكيل ويرفدك؟
جمان:يرفدها عشان شايلة مطبوعتها وما سرقت شيء؟
هنادي:انت ما تدخلي ما كنت هنا لمن طلعت المطبوعة من شنطتها.
جمان:ما كنت هنا لكن عارفه مزن ما بتشيل حاجه ما حقتها والمطبوعة دي اشتريتها انا وختيتها في شنطتها حتى افتحي اخرة صفحة بتلقي نجمة مرسومة وجمبها توقيع بإسمي، وفعلا لمن الاستاذة فتحت الصفحة لقت النجمة والتوقيع ورجعت لي المطبوعة وبقو يفتشو حقت البت لكن ما لقوها،
جمان:ما مفترض تعتذري من البت الاتهمتيها بالسرقة دي وطلعتيها حرامية قدام البنات وهي ما عندها ذنب، ولا التربية البتقولي عليها دي فصاحة سااي.
هنادي:معليش يا مزن ما كان قصدي.
طلعت من الفصل وانا ببكي ما كان هاميني كلام استاذة هنادي ولا سمر القالت اني حرامية بتكون مضايقة من المرة الفاتت عشان الاستاذ طردها من حصصو بسببي؛ لكن أمال لمن يسألوها عني تقول خليتها ومشيت الحمام يعني في الوقت ده انا مشيت سرقت المطبوعة، جات لاحقاني جمان وبقت تعتذر مني عشان لو ما اشترتها لي ما حصل ده كلو،
-ما غلطك والله كان كلو سوء تفاهم وانحل.
جمان:برضو حاسة بالذنب وما عايزاك تفهميني غلط انا لمن اشتريتها عشان تشرحي لي منها ونستفيد الاتنين.
-قلت ليك ما زعلانه منك.
جمان:وعايزة اديك حاجه تانية لو ما بتفهميني غلط.
-شنو؟
جمان:ده كان تلفوني وهسي ما شغالة بيو فيو شريحة خط ومفعلة خدمة نت ومكالمات عشان قلتي ما بتقدري تمشي معاي البيت ممكن اتصل عليك وتشرحي لي وبعد الامتحانات رجعي لي.
-ما عارفه اقول ليك شنو.
جمان:يعني فكري فيها كده نحن مش بدفع قروش للمدرسة والاساتذة بقرونا وانتِ بقيتي لي استاذة وانا ما عايزة تشرحي لي ساااي.
-ما محتاجه تديني حاجه عشان اشرح ليك من غير اي شيء ما عندي مشكلة.
جمان:عليك الله اقبلي وكده بكون مرتاحه.
